له عیسی څخه د ستورو پېژندونکو لیدنه

^۱ او کله چې عیسی د هیرودیس پاچا په زمانه کې، د یهودیې په بېت‌لحم کې وزېږید، نوڅوتنه ستوري پېژندونکي له ختیځ څخه اورشلیم ته راغلل او ويې ویل:  ^۲ هغه ماشوم چېرې دی کوم چې به په راتلونکي کې د یهودو پاچا وي؟ ځکه موږ دهغۀ ستوری په ختیځ کې په راختلو لیدلی دی او راغلي یو ترڅو د هغۀ عبادت وکړو  ^۳ کله چې هیرودیس پاچا او د اورشلیم خلکو دا واورېدل نوسخت اندېښمن شول،  ^۴ ټول لوی مذهبي مشران او د شرعې عالمان يې را غونډ کړل او له هغوی څخه یې پوښتنه وکړه چې مسیح به چېرې پېدا کېږي؟  ^۵ نو هغوی هغۀ ته وویل: د یهودیې په بېت‌لحم کې،ځکه چې یونبي داسې لیکلي دي:  ^۶ او ته ای بېت‌لحمه! ته د یهودا په مځکه کې د یهودا له ټولو حاکمانو څخه هم کوچنی نه یې، ځکه لتا څخه به یو داسې حاکم را ووځي چې زما د قام اسرائیلو شپونتوب به وکړي  ^۷ بیا هیرودیس ستوري پېژندونکي په پټه راوبلل او د ستوري د راښکاره کېدو د وخت په هکله يې ترې پلټنې وکړې  ^۸ بیا يې هغوی بېت‌لحم ته ولېږل او ورته يې وویل: لاړ شئ او د هغه ماشوم په هکله کلکه پلټنه وکړئ او کله مو چې پیدا کړ نو ما ته خبر راکړئ، ترڅو زه هم ورشم او د هغۀ عبادت وکړم  ^۹ او کله یې چې د پاچا خبرې واورېدې، نو روان شول او ناڅاپه یې هغه ستوری چې په ختیځ کې لیدلی ؤ ولید، چې د هغوی نه مخکې روان ؤ او په کوم ځای کې چې ماشوم ؤ د هغه ځای لپاسه ودرېد  ^۱۰ او دستوري په لیدلو ډېرخوشاله شول  ^۱۱ کورته ننوتل، ماشوم یې دهغۀ له مور مریمې سره ولید او د عبادت لپاره هغوی ته په ګونډوشول، خپلې همیانۍیې پرانیستلې او دسرو زرو، لوبانو او مُرتحفې یې ورته ډالۍ کړې  ^۱۲ او لکه څرنګه چې په خوب کې هغوی ته الهام شوی ؤ چې بېرته هیرودیس ته ورنشي، نو له بلې لارې خپل وطن ته ستانه شول. 

مصر ته تښتېدل

^۱۳ او کله چې هغوی روان شول، نو ناڅاپه دمالک خدای فرښته یوسف ته په خوب کې ورښکاره شوه او ورته یې وویل: پورته شه! ماشوم او مور يې راواخله او مصرته وتښته او ترهغې هلته واوسېږه ترڅو زه درته ووایم، ځکه چې هیرودیس د دې ماشوم په لټه کې دی ترڅو هغه ووژني  ^۱۴ نودشپې مهال راپاڅېد، ماشوم او مور يې راواخیستل او د مصر لور ته روان شول  ^۱۵ او د هیرودیس تر مړینې هلته پاتې شول، ترڅو د خدای هغه کلام پوره شي کوم چې یې د نبي په ژبه ویلی ؤ: ما خپل زوی له مصرڅخه را وباله. 

د ماشومانو وژنه

^۱۶ کله چې هیرودیس پوه شوچې ستورو پېژندونکو هغه تېر ایستلی دی نو سخت په غصه شو او دهغې نېټې په اساس چې له ستورو پېژندونکو څخه يې مالومه کړې وه، د ټولو دوه کلنو او تر دې د کم عمره ماشومانو د وژلو حکم يې وکړ  ^۱۷ نو دغه وخت هغه څه هم پوره شول، کوم چې د ارمیا نبي په ژبه ویل شوي وو:  ^۱۸ په رامه کې یو غږ واورېدل شو، ژړا، زارۍ او لوی ویر، راحیل د خپلو بچو لپاره ژاړي او تسلي نه مني، ځکه هغوی فنا شول. 

ناصریې ته راستنېدل

^۱۹ او کله چې هیرودیس مړشو نو په مصرکې د مالک خدای فرښته یوسف ته په خوب کې ورښکاره شوه او ورته يې وویل:  ^۲۰ پورته شه! ماشوم او مور يې را واخله او د اسرائیلو مځکې ته روان شه، ځکه هغوی چې د دې ماشوم د وژلو تکل یې درلود مړه شوي دي  ^۲۱ نو هغه راپاڅېد، ماشوم او مور یې را واخیستل او د اسرائیلو مځکې ته راغلل  ^۲۲ خو کله يې چې واورېدل چې ارخلاؤس د خپل پلار هیرودیس پرځای پر یهودیې پاچا شوی دی، نو هغې لور ته له تللو څخه ووېرېد، په خوب کې ورته خبر داری ورکړل شو او د ګلیل سیمې ته ستون شو  ^۲۳ هغه لاړ او د ناصریې په نوم ښار کې مېشت شو ترڅو هغه څه پوره شي کوم چې د انبیاو په ژبه ویل شوي وو چې: هغۀ ته به ناصري وویل شي.