د کرنیلیوس ایمان راوړل

^۱ او په قیصریه کې کرنیلیوس نومی یو سړی ؤ، چې د ایټالیوي پلټنې افسر ؤ،  ^۲ هغه له خپلې ټولې کورنۍ سره رېښتینی او له خدایه وېرېدونکی ؤ، قام ته یې ډېره صدقه ورکوله او پر له پسې یې خدای ته دعا کوله  ^۳ يوه ورځ یې ماسپښین مهال په رؤیا کې د خدای فرښته ولیده چې هغۀ ته راغله او ورته یې وویل: اې کرنیلیوسه!  ^۴ نو هغۀ ورته په ځیرځیر وکتل، ووېرېد او ویې ویل: څه وایې مالکه! نو هغۀ ته یې وویل: ستا دعاګانې او صدقې د یادښت په موخه د خدای سره قبولې شوې دي  ^۵ اوس یافا ته خلک ولېږه او شمعون چې په پطروس مشهور دی را وغواړه  ^۶ کوم چې د شمعون نومي موچي سره چې کور یې د بحیرې په غاړه دی میلمه دی  ^۷ او کله چې هغه فرښته چې له ده سره یې خبرې کولې پناه شوه، نو کرنیلیوس خپل دوه خادمان او یو عسکر چې رېښتینی او هغۀ ته خاص وو راوبلل  ^۸ ټوله پېښه یې هغوی ته بیان کړه او یافا ته یې ولېږل  ^۹ بله ورځ غرمې مهال چې هغوی لا په لار او ښار ته نږدې ؤ، نو پطروس د کوټې لپاسه وخوت ترڅو دعا وکړي  ^۱۰ او داسې وشول چې پطروس اوږې شو او غوښتل یې چې څه شی وخوري خو کله یې چې هغۀ ته خوراک تیاراوه، نو هغۀ رؤیا ولیدله  ^۱۱ آسمان یې خلاص ولید او یو شی چې د یو لوی څادر په څېر له څلورو څنډو څخه تړلې او د مځکې لور ته راځوړند ؤ پر هغۀ را کوزېږي  ^۱۲ او په هغې کې هر ډول څاروي، خزندې او مرغان وو  ^۱۳ بیا هغۀ ته یو غږ وشو چې ای پطروسه! پاڅېږه، حلال یې کړه او ویې خوره  ^۱۴ خو پطروس وویل: هېڅکله نه مالکه، ځکه ما هېڅ کله پلیت یا حرام شيان ندي خوړلي  ^۱۵ بیا هغۀ ته غږ وشو چې، هغه څه چې خدای درکړي، ته یې حرام مه ګڼه  ^۱۶ درې ځلې داسې وشول او بیا هغه څادر آسمان ته پورته کړای شو  ^۱۷ پطروس له ځان سره ډېر حېران ؤ چې د دې رؤیا څه مقصد دی او په همدغه وخت کې ناڅاپه د کرنیلیوس استازو چې د شمعون د کور پوښتنه یې کوله دروازې ته راورسېدل  ^۱۸ غږ یې کولو او پوښتنه یې وکړه چې: آیا شمعون چې په پطروس مشهور دی همدلته دی؟  ^۱۹ او پطروس لا په هغې رویا کې فکر کاوه چې سپېڅلي روح ورته وفرمایل: درې تنه تا غواړي  ^۲۰ نو پاڅېږه، کوز شه او د هغوی سره لاړ شه او هېڅ شک مه کوه ځکه چې هغوی ما درلېږلي دي  ^۲۱ نو پطروس د هغو کسانو څنګ ته لاندې راکوز شو او ویې ویل: زه هغه څوک یم چې تاسویې لټوئ، ستاسو د راتلوموخه څه ده؟  ^۲۲ هغوی وویل: کرنیلیوس پوځي افسر چې نېک او له خدایه وېرېدونکی دی او د یهودو د ټول قام په وړاندې نېک نومی دی، دخدای د سپېڅلې فرښتې له لوري ورته الهام شوی ترڅو هغه تا خپل کور ته راوبلي او لتا څخه خبرې واوري  ^۲۳ نو پطروس هغوی خپل کور ته بوتلل، ورته یې مېلمستیا وکړه، سبا راپورته شو او له هغوی سره روان شو، د یافا څو وروڼه هم ورسره لاړل  ^۲۴ بله ورځ قیصریې ته ورسېدل، کرنیلیوس خپل خپلوان او خاص دوستان رابللي وو او د هغۀ انتظار یې کاوه  ^۲۵ کله چې پطروس ورننوت نو کرنیلیوس ور ته هرکلی ووایه، پر پښو یې ولوېد او سجده یې ورته وکړه  ^۲۶ خو پطروس هغه را پورته کړ او ورته یې وویل: پاڅېږه زه هم ستا پشان انسان یم  ^۲۷ او پداسې حال کې چې له هغۀ سره یې خبرې کولې کور ته ننوت او هلته یې غټه ډله ولیدله  ^۲۸ نو هغوی ته یې وویل: تاسوخبر یاست چې د یهودي لپاره ناروا ده ترڅو له غېر یهودي سره معاشرت او تګ راتګ وکړي، خو خدای ما ته ښوونه وکړه چې هېڅ چا ته پلیت او ناپاک ونه وایم  ^۲۹ لدې کبله ستاسو د غوښتنې په اساس بې له ځنډه راغلم او اوس پوښتنه کوم چې زه مو د څه لپاره راغوښتی یم؟  ^۳۰ نو کرنیلیوس ورته وویل: څلور ورځې وړاندې همدغه وخت درې بجې په خپل کور کې په دعا بوخت وم چې ناڅاپه یو تن په ځلېدونکو جامو کې زما په مخکې ودرېد  ^۳۱ او ویې ویل: اي کرنیلیوسه! ستا دعا قبوله شوه او ستا صدقې هم د خدای په وړاندې یادې شوې دي  ^۳۲ نو یافا ته څوک ولېږه او شمعون چې په پطروس مشهور دی راوغواړه، کوم چې د بحیرې په غاړه د شمعون موچي په کور کې میلمه دی  ^۳۳ نو بې له ځنډه مې سړي درولېږل او تا ښه وکړل چې راغلې، اوس ټول د خدای په حضور کې حاضر یو ترڅو هغه څه چې تا دخدای څخه ترلاسه کړي واورو  ^۳۴ پطروس ژبه پرانیسته او ویې ویل: ما داحقیقت موندلی دی چې خدای د هېچاطرفداري نه کوي  ^۳۵ خو له هر قام څخه هر څوک چې له هغۀ څخه ووېرېږي او نېک عمل وکړي نو د هغۀ په وړاندې به غوره وګرځي  ^۳۶ هغه بني اسرائېلو ته خپل کلام ولېږه او د عیسی مسیح په وسیله یې، چې د ټولو مالک دی د سلامتۍ زیرې ورکړ  ^۳۷ او تاسو پوهېږئ چې یحیی ته د تعمید له وعظ کولو څخه وروسته چې له ګلیل څخه پېل او په ټوله یهودیه کې خپور شو څه پېښ شول  ^۳۸ یانې ناصري عیسی چې خدای څه ډول هغه په سپېڅلي روح او ځواک سره مسح کړ، هغه به ګرځېده او نېک کارونه به یې ترسره کول او د ابلیس رټل شوو ته به یې روغتیا ورکوله ځکه چې خدای له هغۀ سره ؤ  ^۳۹ او موږ د هغۀ په ټولو کارونو چې د یهودو په سیمه او اورشلیم کې یې ترسره کړل ګواهان یو او هغه یې هم پرصلیب وخېژاوه او مړ يې کړ  ^۴۰ خو خدای په دریمه ورځ هغه راپورته او ښکاره کړ  ^۴۱ خو ټول قام ته نه بلکې هغو ګواهانو ته کوم چې خدای له وړاندې څخه غوره کړي وو، یانې موږ چې د مړو څخه له را پورته کېدو وروسته مو له هغۀ سره خوراک څښاک وکړ  ^۴۲ او موږ یې وګمارلو تر څو قام ته په دې وعظ وکړو او ګواهي ورکړو چې خدای هغه ټاکلی ترڅو د مړو او ژوندو قضاوت کوونکی واوسي  ^۴۳ او ټول انبیاء پر هغۀ ګواهي ورکوي چې هرچا پر هغۀ ایمان راوړ نو د هغۀ په نوم به له ګناهونو څخه بخښنه ومومي  ^۴۴ دا خبرې لا د پطروس په ژبه وې چې سپېڅلی روح پر ټولو هغو چې کلام یې واورېد نازل شو  ^۴۵ او سنت شوي ایمانداران چې له پطروس سره راغلي وو، پدې حېران شول چې دسپېڅلی روح نعمت پرغېر یهودو هم نازل شو  ^۴۶ ځکه هغوی واورېدل چې په نورو ژبو یې خبرې کولې او د خدای ستاینه یې کوله  ^۴۷ بیا پطروس وویل: آیا داسې څوک شته چې دا خلک په اوبو له تعمید اخیستلو څخه منع کړي، کومو چې زموږ په شان سپېڅلی روح موندلی دی؟  ^۴۸ نو هغوی ته یې امر وکړ ترڅو د عیسی مسیح په نوم تعمید واخلي، بیا هغوی له هغۀ څخه وغوښتل چې څو ورځې له هغوی سره پاتې شي.