د کرنیلیوس په هکله د پطروس سپیناوی

^۱ نو رسولانو او هغو وروڼو چې په یهودیه کې وو، واورېدل چې غېر یهودو هم د خدای کلام منلي دي  ^۲ او کله چې پطروس اورشلیم ته بېرته راستون شو، نو سنت کړای شویو پر هغۀ اعتراض وکړ  ^۳ او ویې ویل: ته ناسنت کړي شویو خلکو ته ورغلی وې او له هغوی سره دې ډوډۍ وخوړه  ^۴ پطروس له پېله هرڅه هغوی ته بیان کړل او ویې ویل:  ^۵ ما د یافا په ښارکې دعا کوله چې بېهوښه شوم او رؤیا مې وليده چې د یو لوی څادر پشان یوشی چې له څلورو څنډو څخه له آسمانه راکښته کېدو او ماته راورسېد  ^۶ او کله مې چې ورته په غور سره وکتل نو په هغې کې مې د مځکې څاروي، ځناور، حشرات او د هوا مارغان ولیدل  ^۷ او یو غږ مې واورېد چې ماته یې ویل: اې پطروسه! پاڅېږه، حلال یې کړه او ویې خوره  ^۸ نو ما وویل: نه مالکه، ما هېڅکله حرام او پلیت شیان په خُله کې نه دي اچولي  ^۹ او یوځل بیا له آسمانه غږ وشو چې: هغه څه چې خدای حلال کړي ته یې حرام مه بوله  ^۱۰ درې ځلې داسې وشول او بیا هغه ټول د آسمان لوري ته پورته کړای شول  ^۱۱ او هماغه شېبه درې تنه له قیصریې څخه زما لورته راولېږل شول او هغه کور ته راورسېدل چې زه پکې وم  ^۱۲ او سپېڅلي روح ما ته وفرمایل: له هغوی سره لاړشه او هېڅ اندېښنه مه کوه، نو دا شپږ وروڼه هم زما سره راغلل اوموږ د هغه سړي کور ته ننوتو  ^۱۳ او موږ ته یې وویل چې څه ډول یې په خپل کورکې یوه فرښته ولیده چې ولاړه وه او هغۀ ته یې وویل: یافا ته څوک ولېږه او شمعون چې په پطروس مشهور دی را وغواړه  ^۱۴ هغه به تاته داسې کلام واوروي چې د هغې په وسیله به ته او ستا د کورنۍ ټول وګړي ژغورنه ومومي  ^۱۵ او کله مې چې په خبرو کولو پېل وکړ نو سپېڅلی روح پرهغوی نازل شو، لکه څرنګه چې لومړی پر موږ نازل شوی ؤ  ^۱۶ نو هغه وخت مې د مالک خبره را یاده شوه چې فرمایل یې: یحیی په اوبو تعمید ورکړ خو تاسو ته به په سپېڅلي روح سره تعمید درکړای شي  ^۱۷ نو که چېرې خدای هغوی ته هماغه برخه وروبخښله کومه یې چې موږ ته په مالک عیسی مسیح باندې د ایمان له کبله را بخښلې وه، نو بیا زه څوک یم چې خدای منع کړم  ^۱۸ او کله یې چې دا واورېدل نو غلي شول او د خدای ستاینه یې کوله ویې ویل په حقیقت کې خدای غېر یهودو ته هم ژوند بخښونکی توبه وربخښلې ده. 

د انطاکیې کلیسا

^۱۹ خوهغه ایمانداران چې دسټېفان د محاکمې له امله کړېدلي او خواره واره شوي وو، په فینیقا، قبرص او انطاکیه کې ګرځېدل او له یهودو پرته یې بل هېچا ته زیری ونه رساوه  ^۲۰ خو ځینې له هغوی څخه چې د قبرص او قیروان اوسېدونکي وو، کله چې انطاکیې ته ورسېدل نو له یونانیانو سره یې خبرې وکړې او هغوی ته یې د مالک عیسی زیری ورکړ  ^۲۱ د مالک لاس له هغوی سره ؤ، ډېرو خلکو ایمان راوړ او د مالک لور ته راستانه شول  ^۲۲ او کله چې د هغوی خبر د اورشلیم کلیسا ته ورسېد نو برنابا یې انطاکیې ته ولېږه  ^۲۳ کله چې ورسېد او دخدای فېض یې ولید، نو ډېر خوشاله شو او ټولو ته یې نصیحت وکړ ترڅو د زړۀ له کومي له مالک سره وفاداري وکړي  ^۲۴ ځکه چې هغه نېک سړی او له سپېڅلي روح او ایمان څخه ډک ؤ، نو ډېرو خلکو پرمالک ایمان راوړ  ^۲۵ او برناباس د ساؤل د لټون په موخه ترسوس ته لاړ  ^۲۶ کله یې چې هغه وموند نو انطاکیې ته یې راوست هغوی ټول کال په کلیسا کې راټولېدل او ډېروخلکوته یې تعلیم ورکاوه، شاګردان د لومړي ځل لپاره په انطاکیه کې د مسیحي په نامه ونومول شول  ^۲۷ او په هغو ورځو کې څو تنه نبیان له اورشلیم څخه انطاکیې ته راغلل  ^۲۸ او یو له هغوی څخه چې اغابوس نومید را پاڅېد او د سپېڅلي روح په مرسته یې پېش بینی وکړه چې په ټوله نړۍ کې به سخته قحطي را منځ ته شی او هغه قحطي د قیصر کلودیوس په ورځو کې رامنځ ته شوه  ^۲۹ او شاګردانو هوکړه وکړه ترڅو دخپل وس په اندازه خپلو هغو وروڼو ته چې په یهودیه کې مېشت دي مرستې ور ولېږي  ^۳۰ نو همداسې یې وکړل او هغه مرستې یې د برنابا او ساؤل په ذریعه د کلیسا مشرانو ته ولېږلې.