د فرښتې په لاس د پطروس خلاصون

^۱ شاوخوا همدغه وخت هیرودیس پاچا پرهغو ایماندارانو د ظلم لاس واچاوه چې له کلیساګانو سره یې اړیکې درلودې  ^۲ او د یوحنا ورور یعقوب یې په توره وواژه  ^۳ او کله یې چې ولیدل یهودیان پرې خوشاله شول نو پردې سربېره پطروس یې هم ونیو او دا د پتېرې د اختر ورځې وې  ^۴ نو هغه یې ونیو او په زندان کې یې واچاوه او د عسکرو څلورو ډلو ته یې وسپاره چې، په هره ډله کې څلور تنه وو ترڅو د هغۀ سآټنه وکړي او غوښتل یې چې، دفسحې اختر وروسته یې دقام مخې ته راوباسي  ^۵ نو، پطروس یې په زندان کې ساتلو او کلیسا د خدای په حضورکې د زړه له کومې دهغۀ لپاره دعا کوله  ^۶ او په کومه شپه چې هېرودیس غوښتل هغه بهر راوباسي، نو پطروس په دوو زنځیرونو تړلی د دوو عسکرو په منځ کې پروت ؤ او ساتونکو د زندان په دروازه کې څوکۍ کوله  ^۷ ناڅاپه د مالک فرښته هغۀ ته حاضره شوه او په کوټه کې رڼا وځلېده، پطروس یې په څنګ وواهه، را وېښ یې کړ او ورته یې وویل: ژر راپورته شه او هماغه شېبه زنځیرونه د هغۀ له لاسونو څخه ولوېدل  ^۸ او فرښتې هغۀ ته وویل: خپله ملا وتړه او څپلۍ دې به پښو کړه، هغۀ همداسې وکړل او هغۀ ته یې وویل: چپنه دې واغونده او ما پسې راځه  ^۹ نو هغۀ پسې روان شو او په دې پوه نه ؤ چې هغه څه فرښته کوي هغه حقیقت دی، خو ګمان یې کاوه چې رؤیا ویني  ^۱۰ نو د لومړي او دویم قراول څخه تېر شول اوهغې وسپنېزې دروازې ته ورسېدل کومه چې د ښار لوري ته خلاصېدله، هغه دروازه پخپله د هغوی پرمخ خلاصه شوه، له هغې څخه ووتل او د یوې کوڅې تر پایه لاړل او ناڅاپه فرښتې هغه پرېښود  ^۱۱ بیا پطروس په هوښ کې راغی او دځان سره یې وویل چې اوس زماپوره یقین دی چې مالک خدای خپله فرښته رالېږلې وه او زه یې د هیرودیس او له هغه څه څخه چې یهودو انتظار درلود خلاص کړم  ^۱۲ او کله چې هغه پوه شو نو د مریمې کور ته راغی چې د یوحنا مور ده او په مرقس مشهور دی او هلته ډېر خلک راټول شوي وو، چې دعا یې کوله  ^۱۳ کله چې هغۀ دروازه ووهله نو رودا نومي خادمه دروازي ته ورغله  ^۱۴ او کله یې چې د پطروس غږ واورېد نو له خوښۍ څخه یې ورخلاص نه کړ، دننه یې منده کړه او هغوی یې خبر کړل چې پطروس په دروازه کې ولاړ دی  ^۱۵ هغې ته یې وویل: ته لیونۍ یې، خو کله چې هغې ټینګار وکړ نو ویې ویل: د هغۀ فرښته به وي  ^۱۶ خو پطروس پر له پسې دروازه ټکوله او کله چې هغوی دروازه خلاصه کړه نو هغه یې ولید او سخت حېران شول  ^۱۷ خو هغۀ په لاس سره هغوی ته اشاره وکړه چې غلي شي او ویې ویل چې څه ډول مالک هغۀ ته له زندان څخه خلاصون ورکړ او ویې ویل: یعقوب او ټول ورونه لدې پېښو څخه خبر کړئ، بیا بهر شو او بل ځای ته لاړ  ^۱۸ او کله چې سهار شونوعسکر پدې سخت خفه وو چې پطروس څه شو؟  ^۱۹ او هیرودیس چې کله هغه راوغوښت نو ویې نه موند، له پیره دارانو نه یې پوښتنې وکړې او بیایې د هغوی د وژلو حکم ورکړ، لدې وروسته هیرودیس له یهودیې څخه قیصریې ته لاړ او څه موده هلته پاتې شو. 

د هیرودیس مړینه

^۲۰ هیرودیس د صور او صیدون پر اوسېدونکو په قهر شوی ؤ، نو هغوی په یو زړه هغۀ ته ورغلل، د پاچا ناظر بلاستوس یې له ځان سره کړ او د سولې غوښتنه یې وکړه، ځکه چې د هغوی ټاټوبی د خوراکي توکو لپاره د پاچا هېواد ته محتاج ؤ  ^۲۱ او په ټاکلې ورځ هیرودیس شاهانه جامې واغوستې، د پاچاهۍ پر تخت کیناست او هغوی ته یې وېنا کوله  ^۲۲ او خلکو چیغې وهلې چې، دا د انسان غږ نه بلکې د خدای غږ دی  ^۲۳ سمدلاسه دمالک خدای فرښتې هغه وواهه ځکه چې د خدای ستاینه یې نه کوله، هغه چینجو وخوړ او مړشو  ^۲۴ خو د خدای کلام وده او پرمختګ وکړ  ^۲۵ برناباس او ساؤل چې کله هغه خدمت ترسره کړ نو له اورشلیم څخه راستانه شول او یوحنا یې چې په مرقس هم شهرت لري له ځانه سره راوست.