دبرناباس او ساؤل لېږل

^۱ د انطاکیې په کلیسا کې نبیان او ښوونکي وو، برناباس، شمعون چې په نیجېر مشهور ؤ، لوکیوس کرېني، مناهین چې ډېره موده د هیرودېس پاچا ملګری ؤ اوساؤل  ^۲ کله چې هغوی د مالک عبادت کاوه او روژه یې نیولې وه نو سپېڅلي روح ورته وفرمایل: برناباس او ساؤل د هغه کار لپاره ما ته جلا کړئ، دکوم لپاره چې ما رابللي دي  ^۳ نو هماغه شیبه یې روژه ونیوله، دعا یې وکړه، د هغوی پرسرونو یې لاسونه کېښودل او ویې لېږل. 

په قبرص کې د بشارتي خدمتونو لومړې سفر

^۴ بیا هغوی د سپېڅلي روح له لوري ولېږل شول او سلوکیې ته لاړل او له هغه ځایه د بحرله لارې قبرص ته راغلل  ^۵ او کله چې هغوی سلامېس ته ننوتل نود یهودو په کنیسو کې یې دخدای د کلام وعظ کاوه او یوحنا ورسره مرسته کوله  ^۶ او کله چې تر پافُسه په ټوله جزیره کې وګرځېدل نو هلته یې د باریشوع په نوم یو تن یهودي وموند چې کوډګر او دروغژن نبي ؤ  ^۷ هغه د والي سرجیوس پولس ملګری ؤ. والي چې پوه سړی ؤ، برناباس او ساؤل یې راوبلل او ویې غوښتل چې د خدای کلام واوري  ^۸ خو همدغه جادوګر چې په یونانی کې ورته الیماس وایې، د هغوی مخالفت وکړ او غوښتل یې ترڅو والي له ایمان څخه واړوي  ^۹ خو ساؤل چې پولس هم ورته وایي له سپېڅلي روح څخه ډک ؤ، په هغۀ کې یې سترګې ښخې کړې  ^۱۰ او ویې ویل: اې د ابلیس زویه او د رېښتینولۍ دښمنه، له فریب او شېطانت نه ډکه! د مالک له نېغې لارې نه له اړولو څخه لاس نه اخلې؟  ^۱۱ خو ګوره اوس دمالک لاس پرتا دی ته به ړوند شې او د څه مودې لپاره به لمر ونه وینې، هماغه شېبه پردې او تیارې هغه ونیو، ګیرچاپېره ګرځېده او د مرستې غوښتنه یې کوله  ^۱۲ او کله چې والی دا پېښه ولیده نو د مالک له لارښوونې څخه حېران شو او ایمان یې راوړ  ^۱۳ بیا پولس او ملګري یې له پافس څخه په بېړۍ کې سپاره شول او پرجې پمفلیې ته راغلل خو یوحنا له هغوی څخه بیل او اورشلیم ته ستون شو  ^۱۴ هغوی له پرجې څخه تېر شو او انطاکیې پیسیدیې ته راغلل، د خالي په ورځ کنیسې ته ننوتل او هلته کېناستل  ^۱۵ د تورات او نبیانود صحیفو له لوستلو وروسته د کنیسې مشرانو هغوی ته پېغام واستاوه، ویې ویل: اې وروڼو! که د خلکو لپاره د نصیحت کلام لرئ نو ورته یې ووایاست  ^۱۶ نو پولس پاڅېد، په خپل لاس یې اشاره وکړه او ویې ویل: اې اسرائیلیانو او له خدای څخه وېرېدونکو! غوږ ونیسئ  ^۱۷ د بني اسرائیلو د قام خدای زموږ پلرونه غوره کړل، قام یې سره له بې وطنۍ د مصر په مځکه کې سر لوړې کړ او هغوی یې په لوړ مټ سره له هغه ځایه راوویستل  ^۱۸ نږدې څلوېښت کلونه یې په دښته کې د هغوی خوځښتونه زغمل  ^۱۹ او په کنعان کې یې د اوو قامونو له بربادولو وروسته هغۀ د هغوی مځکه خپلو خلکو ته په میراث ورکړه  ^۲۰ او دا هرڅه شاوخواڅلورسوه او پنځوس کلونو کې وشول او له هغې وروسته یې د سموییل نبي تر زمانې پورې ورته قاضیان وټاکل  ^۲۱ او له هغې وخته یې پاچا وغوښته نو خدای ورته ترڅلوېښتو کلونو پورې د بنیامین له قبیلې څخه دساؤل زوی قېس ورکړ  ^۲۲ بیا یې هغه له منځ څخه اوچت او داؤد یې را پورته کړ ترڅو د هغوی پاچا شي او دهغۀ په حق کې یې ګواهي ورکړه چې: داؤد بن ېسي مې د خپل زړۀ مطابق سړی وموند چې زما په ټولو غوښتنو به عمل وکړي  ^۲۳ او د خپلې ژمنې پربنسټ یې د هغۀ له اولادې څخه د اسرائیلو لپاره یو ژغورونکی یانی عیسی راولېږه  ^۲۴ څرنګه چې یحیی له خپل راتګ څخه وړاندې د اسرائیلو ټول قام ته د تعمید وعظ کړی ؤ  ^۲۵ او کله چې یحیی خپله دوره پاې ته ورسوله نو ویې ویل: ما څوک ګڼئ؟ زه هغه نه یم، خو زما څخه وروسته داسې څوک راځي چې زه د هغۀ د څپلیو د بندونو خلاصولو وړتیا هم نه لرم  ^۲۶ ای خوږو وروڼو او د ابراهیم اولادې، او په تاسو کې هغه خلک چي له خدای څخه وېرېږئ! هم موږ ته د ژغورنې دا کلام رالېږل شوی دی  ^۲۷ خو د اورشلیم اوسېدونکو او د هغې چارواکو هغه ونه پېژانده او د هغۀ په ملامتولو یې د انبیاو هغه کلام پوره کړ چې د هرې خالي په ورځ به لوستل کېده  ^۲۸ او که هرڅو یې په هغۀ کې د وژلو هېڅ دلیل ونه موند، خو له پېلاطوس څخه یې غوښتنه وکړه چې هغه ووژل شي  ^۲۹ او کله یې چې هرهغه څه بشپړ کړل کوم چې د هغۀ په هکله لیکل شوي وو، نو هغه یې له صلیب څخه راکوز کړ او قبر ته یې وسپاره  ^۳۰ خو خدای هغه له مړو څخه راپورته کړ  ^۳۱ او هغه ډېرې ورځې هغوی ته ښکاره شو کوم چې له هغۀ سره له ګلیل څخه اورشلیم ته راغلي وو او اوس قام ته د هغۀ ګواهان دي  ^۳۲ او موږ تاسو ته هغه زیری در کوو، کوم چې خدای زموږ له پلرونو سره د هغې ژمنه کړې وه  ^۳۳ او خدای دا وعده زموږ لپاره چې موږ د هغۀ بچي یو د عیسی له مړو څخه په بیا را ژوندي کولو سره بشپړه کړه لکه څرنګه چې په دویم زبور کې لیکلي دي چې: ته زما زوی یې او ما نن ته وزېږولې  ^۳۴ او دا چې هغه یې له مړو څخه را ژوندی کړ ترڅو نور هېڅکله خاورې نشي، نو داسې یې وفرمایل: هغه پاک اوحقیقي برکتونه چې له داؤد سره مې وعده کړې ده، تاسو ته به یې درکړم  ^۳۵ د زبور په یوبل ځای کې یې هم فرمایلي دي: ته به خپل سپېڅلي خاورې کېدو ته برېنږدې  ^۳۶ ځکه کله چې داؤد په خپله زمانه کې د خدای د ارادې خدمت پوره کړی ؤ مړشو، له خپلو پلرونو سره یو ځای شو او خاورې شو  ^۳۷ خو هغه کس چې خدای راپورته کړ خاورې نه شو  ^۳۸ نو ای خوږو وروڼو! تاسو ته دې مالومه وي چې د هغۀ پوسیله تاسو ته د ګناهونو بخښنه اعلانېږي  ^۳۹ او هرڅوک چې ایمان راوړي نو د هغۀ په وسیله رېښتیني شمېرل کېږي، له هر هغه څه نه چې د موسی په شریعت کې مو ونشو کولای رېښتېني وشمېرل شئ  ^۴۰ نو پام کوئ، ګواکې هغه څه چې د انبیاؤ په صحیفوکې لیکل شوي پر تاسو رانشي  ^۴۱ چې، ای سپک شمېرونکو ګورئ! حېران او هلاک شئ، ځکه چې زه ستاسو په ورځوکې داسې کار کوم، که هرڅومره څوک هغه تاسو ته اعلان کړي نو رېښتیا به یې ونه ګڼئ  ^۴۲ او کله چې له کنیسې څخه بهر تلل نو غوښتنه یې ترې وکړه چې د راتلونکې خالي په ورځ ورته بیا دا خبرې وکړي  ^۴۳ او کله چې د کنیسې خلک خواره شول نو ډېر یهودیان او خدای پرسته نوي یهودیان د پولس او برنابا پسې شول او هغوی دواړو ورسره خبرې کولې او هغوی یې هڅول ترڅو د خدای په فېض کې ثابت پاتې شي  ^۴۴ او په بله خالي نږدې د ښار ټول خلک راغونډ شول ترڅو د مالک خدای کلام واوري  ^۴۵ خو کله چې یهودو د خلکو ګڼه ګوڼه ولیده نو له کینې څخه ډک شول، کُفر یې ووایه او د پولس له خبرو سره یې مخالفت پېل کړ  ^۴۶ هماغه وخت پولس او برنابا زړور شول او ویې ویل: اړینه وه چې د خدای کلام لومړی تاسو ته واورول شي، خو دا چې هغه مو رد کړ او ځانونه مو د تلپاتې ژوندون وړ ونه ګڼل، نو اوس موږ د غېر یهودو قامونو لور ته پاملرنه کوو  ^۴۷ ځکه چې مالک موږ ته داسې امر وکړ چې: ما ته دغېر یهودو قامونو لپاره رڼا ګرځولی یې، ترڅو د مځکې ترآخري برخو د ژغورنې وسیله واوسئ  ^۴۸ او کله چې غېر یهودو دا واورېدل نو خوشاله شول او د مالک دکلام ستاینه یې وکړه او هغوی چې د تلپاتې ژوندون لپاره ټاکل شوي وو، ایمان یې راوړ  ^۴۹ او د مالک خدای کلام په هغو ټولو سیمو کې خپور شو  ^۵۰ خو یهودو څو تنه دیندارې ښځې او د ښار مشران ولمسول، هغوی یې پولس او برنابا ته د کړاو ورکولو لپاره وهڅول او هغوی یې د ښار له حدودو څخه بهر وویستل  ^۵۱ هغوی د خپلو پښو خاورې پر هغوی وڅنډلې او ایقونیې ته لاړل  ^۵۲ او شاګردان له خوښۍ او سپېڅلي روح څخه ډک شول.