پولس په قرنتس کې

^۱ او له هغې وروسته پولس له آټن څخه روان شو او قرنتس ته راغې  ^۲ او هلته له اکیلا نومی سړي سره چې یهودي ؤ او د پونطوس اوسېدونکی ؤ وپېژندل، چې له خپلې ښځې پرسکیله سره نوي له ایتالیا څخه راغلي وو، ځکه چې کُلودیوس فرمان صادرکړې ؤ چې باید ټول یهودیان له روم څخه لاړشي، نو د هغوی خوا ته راغی  ^۳ او پدې خاطر چې هغه هم د هغوی په شان خېمه جوړوونکی ؤ، نو له هغوی سره پاتې شو او یو ځای یې ورسره کار کاوه  ^۴ او هره خالي به یې په کنیسه کې بحث کاوه، یونانیانو او یهودوته به یې قناعت ورکاوه  ^۵ او کله چې سیلاس او تیموتاوس له مکدونیې څخه راغلل نو پولس په پوره توګه خپل ژوند د تعلیم لپاره وقف کړ او یهودو ته یې ګواهي ورکوله چې عیسی هماغه مسیح دی  ^۶ خو کله چې هغوی مخالفت وکړ او بد رد یې ورته وویل، نو خپله د چپن لمن یې پر هغوی وروڅنډله او ویې ویل: ستاسو خون ستاسو په غاړه دی زه بري یم او لدې وروسته به غېر یهودو ته ورځم  ^۷ او له هغه ځای څخه یې کډه وکړه او د تېطیوس یوستوس نومي خدای پرسته سړي کور ته چې کور یې د کنیسې ترڅنګ ؤ راغی  ^۸ او د کنیسې مشر کرِسپوس له خپلې ټولې کورنۍ سره پرمالک ایمان راوړ او کله چې د قرنتس اوسېدونکو واورېدل نو ډېرو ایمان راوړ او تعمید یې واخیست  ^۹ یوه شپه مالک په رؤیا کې پولس ته وویل: مه وېرېږه، خبرې وکړه او مه غلی کېږه  ^۱۰ ځکه چې زه ستا سره یم، هېڅوک به تا ته کړاو ونشي رسولی، ځکه چې پدې ښارکې زما ډېر خلک دي  ^۱۱ نو یونیم کال تم شو او هغوی ته به یې د خدای د کلام ښوونه کوله  ^۱۲ خو کله چې ګالیو د اخایې والي ؤ، نو یهودیان یو لاس شول او پر پولس یې یرغل وکړ او هغه یې محکمې ته ویوړ  ^۱۳ او ویې ویل: دا سړی خلک بې لارې کوي ترڅو دخدای عبادت د شریعت د حکمونو خلاف وکړي  ^۱۴ او کله چې پولس وغوښتل خبرې وکړي نو ګالیو وویل: اې یهودو! که چېرې ظلم یا ښکاره ګناه وای نو د عقل غوښتنه وه چې ستاسو خبره مې زغملې وای  ^۱۵ خو دا ستاسو د خبرو، نومونو او شریعت په هکله مسله ده، نو خپله سره پوه شئ او زه پدې ډول چارو کې قضاوت نه کوم  ^۱۶ او هغوی یې له محکمې څخه وشړل  ^۱۷ بیا هغوی ټولو سوستینوس راونیوه کوم چې د کنیسې مشر ؤ او هغه یې د محکمې پر وړاندې وواهه خو ګالیو ددې چارو هېڅ پروا نه کوله  ^۱۸ او پولس لدې وروسته ډېرې ورځې هلته تم شو، بیا یې له وروڼو سره خدای پاماني وکړه او د بحر له لارې سوریې ته لاړ، پرسکله او اکیلا هم له هغۀ سره لاړل او په کنخریه کې یې خپل سر وخرېلو ځکه چې همداسې نذر یې کړی ؤ  ^۱۹ او کله چې افسیس ته ورسېد نو هغه دوه تنه یې پرېښودل، خپله کنیسې ته ننوت او له یهودو سره یې بحث وکړ  ^۲۰ او کله چې هغوی وغوښتل چې څه موده له هغوی سره پاتې شي نو ویې نه منل  ^۲۱ او له هغوی سره یې خدای پاماني وکړه ویې ویل: که خدای غوښتې وي بیا به تاسو ته راستون شم نو هغه له افسیس څخه په بېړۍ کې روان شو  ^۲۲ او کله چې قیصریې کې کوز شو نو اورشلیم ته لاړ او د کلیسا پوښتنه یې وکړه بیا انطاکیې ته راغی. 

دریم بشارتي سفر

^۲۳ څه موده هلته پاتې شو او بیا یې سفر ته مخه کړه، د غلاطیې او فریجې په سیموکې ځای په ځای ګرځېده او ټول شاګردان یې تشویقول  ^۲۴ نو اپولوس نومې یو یهودي چې د اسکندریې اوسېدونکی ؤ افسیس ته راغې، د هغۀ خبرې خوږې وې او د سپېڅلي کتاب تکړه عالم ؤ  ^۲۵ هغه د مالک په لار کې روزنه موندلې وه، د مالک په هکله یې په ځیرکتیا سره خبرې کولې او د عیسی په هکله یې سم تعلیم ورکاوه خو یواځې د یحیی له تعمید څخه خبر ؤ  ^۲۶ همدغه سړي په کنیسه کې په زړورتیا سره خبرې پېل کړې او کله چې اکیلا او پرِسکله د هغۀ خبرې واورېدې نو هغه یې له ځانه سره راوست او په پوره تفصیل سره یې هغۀ ته د خدای لار ور زده کړه  ^۲۷ او کله چې هغه د اخائیې لور ته د سفر تکل وکړ نو وروڼو هغه وهڅاوه او شاګردانو ته یې مرسته لیک ولیکه، ترڅو د هغۀ هرکلی وکړي او کله چې هغه ځای ته ورسېد نو هغو چې د فېض په وسیله یې ایمان راوړي ؤ، ور سره ډېره مرسته وکړه  ^۲۸ ځکه چې په پوره ځواک سره یې د یهودو پرخلاف دلایل ویل او له سپېڅلي کتاب څخه یې ثابتول چې عیسی هماغه مسیح دی.