پولس په افسیس کې

^۱ او لکه څرنګه چې اَپُولوس په قرنتس کې ؤ نو پولس په پورته سیمو کې ګرځېده، او افسیس ته ورسېد، هلته یې څو تنه شاګردان وموندل  ^۲ او هغوی ته یې وویل: آیا کله مو چې ایمان راوړ نو پر تاسو سپېڅلی روح نازل شوی ؤ؟ نوهغۀ ته یې وویل: خو موږ ندي اورېدلي چې سپېڅلی روح هم شتون لري  ^۳ هغوی ته یې وویل: نو په څه شي موتعمید واخیست؟ ویې ویل: د یحیې په تعمید  ^۴ پولس وویل: البته یحیی د توبې تعمید ورکاوه او خلکو ته یې ویلې په هغه چا ایمان راوړئ کوم چې زما څخه وروسته راځي، یانی عیسی  ^۵ او کله یې چې دا واورېدل نو د مالک عیسی په نوم یې تعمید واخیست  ^۶ او کله چې پولس پر هغوی لاس کېښود نو سپېڅلی روح پر هغوی نازل شو، په نورو ژبو یې خبرې پېل کړې او نبوت یې وکړ  ^۷ او ټول هغه نږدې دولس تنه ؤ  ^۸ بیا کنیسې ته ننوت او درې میاشتې یې په زړورتیا سره خبرې کولې، د خدای د پاچاهۍ د چارو په هکله یې بحث کاوه او پریکنده دلیلونه یې راوړل  ^۹ او ځینې چې زړونه یې سخت شوي ؤ، ایمان یې رانه وړ او د نورو په وړاندې یې د خدای لارې ته بد ویلې، نو له هغوی څخه ګوښه شو، شاګردان یې بېل کړل او هره ورځ به یې د تېرانُس په تالار کې بحث کاوه  ^۱۰ او پدې توګه دوه کلونه تېر شول او د آسیا ټولو اوسېدونکو که یهودیان وو، یا یونانیان د مالک عیسی کلام واورېد  ^۱۱ او خدای د پولس په لاس لویې لویې مُعجزې ښکاره کولې  ^۱۲ پدې ډول چې د هغۀ له بدن سره لګېدلي دستمالونه او ملاتړوني به یې وړل او پر ناروغانو به یې کېښودل او له هغوی څخه به ناروغۍ لرې کېدې او پېریان به ترې وتل  ^۱۳ خو ځینې دم اچوونکې سیلاني یهودو هم پر هغو خلکو چې پېریان یې درلودل د مالک عیسی نوم اخېستل پېل کړل او ویل یې چې تاسو ته د هغه عیسی په نوم حکم درکوو چې پولس د هغۀ په نوم وعظ کوي راووځئ  ^۱۴ او هغوی چې دا کار کاوه د یهودي د مذهبي مشرانو د یو تن مشر اِسکیوا اووه زامن وو  ^۱۵ خو پېریانو به ورته په ځواب کې ویل: موږ عیسی پېژنو او د پولس په هکله مالومات لرو نو تاسو څوک یاست؟  ^۱۶ او هغه سړي چې پېری یې درلود پر هغوی ورمنډه کړه او پرې زورور شو، تر دې چې له هغه کور څخه بربنډ او ټپیان وتښتېدل  ^۱۷ او کله چې د افسیس ټول یهودي او یوناني اوسېدونکي لدې پېښې خبر شول نو پر ټولو وېره ولګېده او د مالک عیسی د نوم درنښت به یې کاوه  ^۱۸ او ډېرو هغو خلکو چې ایمان یې راوړی ؤ راتلل، پرخپلو کارونو یې اعتراف کاوه او هغه یې بربنډول  ^۱۹ او یوه ډله مداریانو خپل کتابونه راوړل او د خلکو په شتون کې یې وسوزول او کله یې چې د هغې قیمت وشمېره، نو پنځوس زره دسپینوزرو سېکې وې  ^۲۰ او پدې توګه د مالک د کلام پرمختګ کاوه او ځواکمن کېده  ^۲۱ لدې پېښو وروسته پولس په روح کې دا فېصله وکړه چې له مکدونیې او اخائیې تېر شي او اورشلیم ته لاړ شي او ویې ویل: هلته له تللو وروسته باید له روم څخه هم کتنه وکړم  ^۲۲ نو خپل دوه تنه مرستیالان یعنې تیموتاوس او ارسطوس یې مکدونیې ته ولېږل او خپله د څه مودې لپاره په آسیا کې تم شو  ^۲۳ او په هماغه وخت کې د خدای د لارې پخاطر سختې ستونزې راولاړې شوې  ^۲۴ ځکه چي یو تن دیمیتریوس نومي زرګر چې د ارتیمیس د بُتخانې انځورونه به یې له سپېنو زرو جوړول او د تجارانو لپاره یې لویه ګټه کوله،  ^۲۵ هغوی او نور چې پدې کسب بوخت وو را وغوښتل او ورته یې وویل: اې خلکو! تاسو خبر یاست چې زموږ رزق په همدی کسب کې دی  ^۲۶ او تاسو لیدلي او اورېدلي چې دې پولس نه یواځې په افسیس بلکې په ټوله آسیا کې ډېر خلک غولولي او بې‌لارې کړي او وایي دغه د انسان په لاسونو جوړ شوي شيان خدایان ندي  ^۲۷ نو خطر دی چې نه یواځې به زموږ کسب به له منځه لاړ شي بلکې زموږ د لوی خدای ارتیمیس دغه عبادت ځای به هم سپک وګڼل شي او د هغې عظمت به چې ټوله آسیا او نړۍ د هغې عبادت کوي ختم شي  ^۲۸ او کله چې ټولو دا واورېدل نو ډېر په قهرشول او چیغې یې وهلې چې: د افسیسیانو ارتیمیس لویه ده  ^۲۹ او ټول ښار کې بلوا جوړه شوه او ټول یو ځای د نندارتون لوري ته لاړل او ګایوس او ارسترخُس چې د مکدونیې اوسېدونکي او د پولس د سفر ملګري وو له ځان سره راښکل  ^۳۰ او کله چې پولس قصد وکړ ترڅو دخلکو منځ ته راشي نو شاګردانوهغه پرېنښود  ^۳۱ او ځینو آسیایې مشرانو چې هغه یې خوښاوه، هغۀ ته خلک ور ولېږل او له هغۀ څخه یې غوښتنه وکړه چې دغونډې ځای ته لاړ نشي  ^۳۲ او هر یو تن ځانګړې چیغې وهلې ځکه چې ګڼه ګډه وډه وه او نه پوهېدل چې د څه لپاره راغونډ شوي دي  ^۳۳ بیا یې سکندر د خلکو له منځ څخه راوویست کوم چې یهودو رامخکې کړی ؤ او سکندر په خپل لاس سره اشاره وکړه او غوښتل یې خلکو ته دلیل ووايي  ^۳۴ خو کله چې پوه شول یهودي دی نو ټولو نږدې دوه ساعته په یو غږ چیغې وهلې چې د افسیسیانو ارتیمیس لویه ده  ^۳۵ لدې وروسته د ښارمشرخلک غلي کړل او ویې ویل: ټولو ته مالومه ده چې د افسیس ښار د لویې ارتیمیس دعبادت ځای او دهغې سپېڅلې تيږې ساتونکی دی کومه چې له آسمان څخه راغورځېدلې ده  ^۳۶ نو پداسې حال کې چې لدې کارونو څخه انکار نشي کېدای نو تاسو آرامه اوسئ او هېڅ کار په تادۍ سره مه کوئ  ^۳۷ ځکه تاسو چې دا خلک راوستي، نه دوی د عبادت ځای غله دي او نه یې ستاسو خدای ته بد ویلي دي  ^۳۸ نو که چېرې دیمیتریوس او د هغۀ مرستیالان پر چا دعوه لري نو د قضا ورځې مقررې دي او قاضیان هم ټاکل شوي دي، یو د بل خلاف دې شکایت وکړي  ^۳۹ او که چېرې په نورو مسائلو کې د څه شي غوښتونکي یاست نو په یوه رسمي غونډه کې به فېصله وشي  ^۴۰ ځکه په خطر کې یو چې ګواکې د نننۍ فتنې په هکله زموږ څخه پوښتنه وشي، ځکه د دې ټولنې په هکله هېڅ عذر او دلیل نلرو  ^۴۱ دا یې وویل او ټولنه یې خپره کړه.