د فِلیکس په دربارکې د پولس محاکمه

^۱ پنځه ورځې وروسته د مذهبي مشرانومشرحنانیا له مشرانو او ترتلس نومې وکیل سره راورسېدل او والي ته یې له پولس څخه شکایت وکړ  ^۲ او کله یې چې هغه حاضر کړ نو ترتلس خپله دعوه داسې پېل کړه او ویې ویل: ښاغلیه فِلیکسه! لکه څرنګه چې ستا له شتون څخه په بشپړه هوساینه کې ژوندکوو او تا پدې قام باندی لوی احسانونه کړي دي  ^۳ نو په هرځای او هر وخت کې دا په پوره شکرګزارۍ سره منو  ^۴ خو دا چې نه غواړم ستا ډېر وخت ضایع کړم هیله کوم چې د لورینې له مخې زموږ عرض واورې  ^۵ موږ ته مالومه شوې ده چې دغه سړی د نړۍ د ټولو یهودو په منځ کې فتنه او فساد اچوونکی او د ناصریانو د ډلې مشر دی  ^۶ او کله چې هغۀ هڅه کوله د خدای د کور سپکاوی وکړي نو هغه مو ونیوۀ،  ^۷ خو د پوځ قوماندان لسیاس راغی او هغه یې په زوره زموږ له لاسونو څخه خلاص کړ  ^۸ نوکه چېرې ته پخپله له هغۀ څخه پوښتنه وکړې نوته به له هرهغه څه نه خبر شې چې موږ پر ده دعوه کړې ده  ^۹ یهودو هم له هغۀ سره هوکړه وکړه چې همداسی ده  ^۱۰ او کله چې والي له پولس څخه وغوښتل چې خبرې وکړي نو هغۀ ځواب ورکړ: زه پوهېږم چې ډېر کلونه وشول ته ددې قام د قضاوت کولو دنده لرې، نو په ډېرې خوښۍ سره د خپل ځان په هکله دلیل وایم  ^۱۱ ځکه ته کولای شې ځان پوه کړې چې له دولسو ورځو ډېری ندي تېری شوي چې زه د عبادت لپاره اورشلیم ته لاړم  ^۱۲ دوی د خدای په کور کې زه له چا سره په بحث کولو لیدلی نه یم او نه مې په کنیسو او ښار کې خلک په خوځښت راوستي  ^۱۳ او هغه څه چې اوس پرما د هغې دعوه کوي، دوی نشي کولاې چې اثبات ته یې ورسوي  ^۱۴ خو ستا پر وړاندې د دې اقرار کوم چې کومې لارې ته دوی بدعت وایي، زه د پلرونو د خدای عبادت کوم او پرهغه څه چې په تورات او د انبیاؤ په صحیفو کې لیکلی ایمان لرم  ^۱۵ او له خدای څخه هیله من یم لکه څرنګه چې دوی هم مني چې رېښتیني او بد دواړه به له مړو څخه را ژوندي کېږي  ^۱۶ او خپله پدې هکله هڅه کوم ترڅو خپل وجدان د خدای او خلکو پر وړاندې تل پاک وساتم  ^۱۷ اوس له څو کلونو وروسته راغلی یم ترڅو خپل قام ته خېرات ورکړم او نذرانې ورته وړاندې کړم  ^۱۸ او پدی کارکې د آسیا څو تنو یهودو زه په سپېڅلي کور کې له خوځښت او غوغا پرته وموندلم  ^۱۹ هغوی هم باید دلته ستا پر وړاندې حاضر کړای شي، که چېرې زما پرخلاف کومه خبره لري نو دعوی دې وکړي  ^۲۰ يا دې دوی خپله ووایي، کله چې زه د جرګې پر وړاندې ولاړ وم او په ما کې یې کومه ګناه موندلې وي  ^۲۱ خو هغه یوه خبره کله چې د هغوی په منځ کې ولاړ وم او ومې ویل چې نن د ستاسو په وړاندې زما څخه د مړو د بیا را ژوندي کېدو په هکله پوښتنه کېږي  ^۲۲ بیا فِلیکس چې د لارې څخه ښه خبر ؤ، د هغوی خبره یې وځنډوله او ویې ویل: کله چې پوځی قوماندان لیسیاس راشي نو ستاسو د خبرو حقیقت به له هغۀ څخه معلوم کړم  ^۲۳ بیا یې د زندان افسر ته امر وکړ ترڅو پولس وساتي، هغۀ ته آزادي ورکړي او د هغۀ دوستانو ته د هغۀ له خدمت او کتنی څخه منع نکړي  ^۲۴ او څو ورځی وروسته فِلیکس له خپلې یهودۍ میرمنې دورسیلا سره راغی، پولس یې راوغوښت او پرعیسی مسیح باندی د هغۀ د ایمان په هکله یې د هغۀ خبرې واورېدې  ^۲۵ او کله چې هغه د رېښتیېنولۍ، پرهیزګارۍ او راتلونکي قضاوت په هکله خبرې کولې نو فِلیکس ووېرېد او ځواب یې ورکړ چې، اوس ولاړ شه او کله مې چې فرصت وموند بیا به دې راوغواړم  ^۲۶ او همدغه راز یې هیله درلوده چې پولس هغۀ ته بډې ورکړي تر څو هغه آزاد کړي، لدې کبله یې څو څو ځله هغه راوغوښت او ور سره یې خبرې کولې  ^۲۷ خو له دوو کلونو وروسته فورکیوس فستوس د فِلیکس پرځای والي وټاکل شو، لکه څرنګه چې فِلیکس غوښتل پر یهودو احسان وکړي نو پولس یې په زندان کې وساته.