د شل سړي روغول

^۱ یوه ورځ ماسپښین درې بجې پطروس او یوحنا دعبادت لپاره سپېڅلي کور ته تلل  ^۲ نو یو سړی چې له موره پېدایشي شل ؤ او خلکو به هره ورځ دخدای دکور له دروازې سره چې ورته ښکلې دروازه هم وايي د خېر غوښتو لپاره کېناوه  ^۳ او کله چې هغۀ پطروس او یوحنا ولیدل چې د خدای کور ته ننوځي، نوخېریې ترې وغوښت  ^۴ نو پطروس او یوحنا هغۀ ته په غور سره ولیدل او پطروس ورته وویل، موږ ته وګوره  ^۵ بیا هغه سړي په غور سره پطروس ته وکتل او د خېرات تمه یې ترې کوله.  ^۶ نو پطروس ورته وویل: ما سره سپین او سره زر نشته خوڅه چې لرم هغه تاته درکوم، د ناصري عیسی مسیح په نامه پاڅېږه او وګرځه  ^۷ بیا یې هغه له ښي لاس څخه ونیو، پورته یې کړ، نو سمدلاسه د هغۀ په پښو او بندونو کې ځواک پېدا شو  ^۸ هغۀ ټوپ کړ، په پښو ودرېد او روان شو، هغه له هغوی سره سپېڅلي کورته ننوت او د خدای په ثنا ویلو یې پېل وکړ  ^۹ هر چا هغه په ګرځېدو او د خدای په ثنا ویلو ولید  ^۱۰ او ويې پېژانده چې دا هغه سړی دی کوم چې به دسپېڅلي کور د ښکلې دروازې سره ناست او خېر به یې غوښته، نو د هغه کار له امله چې له هغۀ سره شوی ؤ، هک حېران شول. 

په سپېڅلي کورکې د پطروس موعظه

^۱۱ او پداسې حال کې چې هغه د پطروس او یوحنا پورې کلک نښتی ؤ، نو خلک په حېرانتیا سره دسلیماني دالان لورته په ځغاسته ورغلل  ^۱۲ کله چې پطروس ولیدل چې خلک دهغوی لور ته را روان دي نو هغوی ته یې وویل: ای اسرائیلیانو! ولې پدې کار سره حېران شوئ، ولې زموږ لور ته داسې ګورئ چې ګوندې موږ دغه سړي ته په خپل ځواک او تقوی سره روغتیا ورکړې ده  ^۱۳ د ابراهیم، اسحاق او یعقوب خدای او زموږ د نیکونو خدای، خپل خادم عیسی ته جلال ورکړ، خو تاسو عیسی وسپاره ترڅو ووژل شي او کله چې پېلاطوس د هغۀ د خوشې کولو فېصله وکړه نو تاسو د پېلاطوس په مخکې انکار وکړ  ^۱۴ یانې له هغه سپېڅلي او رېښتیني څخه مو انکار وکړ او د یو فاتل دخوشې کولو غوښتنه مو وکړه  ^۱۵ او تاسو د ژوند ورکولو سردار وواژه، خو خدای هغه بیا له مړو څخه را ژوندی کړ او موږ د دې خبرې ګواهان یو  ^۱۶ دغه سړی چې تاسو وینئ او پېژنئ، د عیسی د نوم د قدرت په وسیله ځواک ورکړل شو او د هغۀ په نوم د ایمان په وسیله روغ جوړ شو  ^۱۷ خو اوس ای وروڼو! کله چې تاسو او ستاسو چارواکو دا کار د غفلت له مخې وکړ  ^۱۸ خو خدای پدې توګه هغه پېش بینۍ چې د خپلو ټولو نبیانو په واسطه یې کړې وې چې مسیح به راځي او کړاونه به ویني، پوره کړې  ^۱۹ نو توبه وکړئ او د خدای لور ته را وګرځئ، ترڅو ګناهونه مو وبخښل شي  ^۲۰ د مالک له حضورڅخه به پر تاسو د آرامښت وخت راشي او هغه به تاسوته عیسی چې مسیح دی بیا درولېږي، کوم چې د تاسو لپاره ټاکل شوی دی  ^۲۱ او لکه څرنګه چې له پېله خدای د خپلو سپېڅلو نبیانو په وسیله فرمایلي، هغه به ترهغې په آسمان کې پاتې شي، ترڅو چې هرڅه بیا نوي شي  ^۲۲ موسی هم فرمایلي وو: مالک خدای به تاسو لپاره ستاسو له خلکو څخه زما پشان یو نبي وټاکي، نو هغه چې هرڅه وايي تاسو د هغۀ خبره واورئ  ^۲۳ او څوک چې د هغۀ خبروته غوږ ونه نیسي او هغه ونه مني نو هغه به په بشپړ ډول له خپلوخلکوڅخه وویستل شي  ^۲۴ همدغه راز سمویل او ټولو هغو نبیانو چې له هغۀ څخه وروسته راغلل د اوسني وخت پېش بینی یې کړې وه  ^۲۵ تاسو د نبیانو وارثین یاست او په هغې وعده کې شامل یاست کومه چې خدای ستاسو له پلرونو سره کړې وه، کله چې هغۀ ابراهیم ته وفرمایل: ستا له نسل څخه به د مځکې ټول خلک برکت ومومي  ^۲۶ او کله چې خدای خپل خادم غوره کړ نو لومړی یې تاسو ته درولېږه ترڅو تاسو ته برکت درکړي او پتاسو کې هر یو له بدو لارو څخه راوګرځوي.