پطروس او یوحنا د یهودو د جرګې په وړاندې

^۱ او هغوی لاخلکو ته وېنا کوله چې مذهبي مشران، د سپېڅلي کور د ساتونکو قوماندان او صدوقیان پرهغوی ورغلل  ^۲ او سخت خفه شول چې هغوی خلکو ته تعلیم ورکوي او وايي چې عیسی بیا له مړو څخه را ژوندی شوی او مړي به د عیسی پوسیله ژوندي شي  ^۳ هغوی پطروس او یوحنا ونیول او د یوې شپې لپاره یې بندیان کړل، ځکه چې ماښام ؤ  ^۴ خو ډېرو خلکو چې دغه پېغام واورېد هغوي ایمان راوړ چې شمېر یې پنځه زره تنو ته رسېده  ^۵ بله ورځ د يهودو مشران او د شرعې عالمان په اورشلیم کې سره را ټول شول  ^۶ چې د مذهبي مشرانومشرحناس، کیاپاس، یوحنا، سکندر او د مذهبي مشرانو د مشر د کورنۍ ټول خلک هم پکې موجود وو  ^۷ هغوی رسولان جرګې ته وړاندې کړل او پوښتنې یې ترې پېل کړې، هغوی پوښتنه وکړه چې: تاسو په کوم ځواک او د چا په نوم دا کار کړی دی؟  ^۸ بیا پطروس چې له سپېڅلي روح نه ډک شوی ؤ ځواب یې ورکړ: ای چارواکو او د قام مشرانو!  ^۹ که چېرې تاسو له موږ څخه د هغه ناروغه سړي د روغتیا په هکله پوښتنه کوئ، چې څنګه روغ شو  ^۱۰ نو تاسو او د اسرائیلو ټول قام دې پوه شي چې: دغه سړی د عیسی مسیح ناصري د نوم په قدرت روغ جوړ ولاړ دی، کوم چې تاسو پر صلیب وخېژاوه او خدای هغه بیا له مړو څخه راژوندی کړ  ^۱۱ دا هماغه ګټ دی چې تاسو ګلکارانو رد کړی ؤ، خو هغه د وداني اصلی ګټ وګرځېد  ^۱۲ بل په هېچا کې ژغورنه نشته، ځکه په ټوله نړۍ کې بل داسې نوم چا ته ندی ورکړل شوی چې د هغې پوسیله موږ ژغورنه ترلاسه کړو  ^۱۳ کله چې هغوی د پطروس او یوحنا زړورتیا ولیده او پوه شول چې دوی خو عام او نالوستي خلک ؤ او ویې پېژندل چې دوی خو دعیسی ملګري وو نو سخت حېران شول  ^۱۴ او کله چې هغوی هغه سړی ولید چې له هغوی سره روغ جوړ ولاړ ؤ، نو له هغوی سره هېڅ دلیل نه ؤ  ^۱۵ نو هغوی ته یې امر وکړ ترڅو د جرګې نه ووځي او خپله یې پدې موضوع بحث پېل کړ  ^۱۶ او ويې ویل چې لدې خلکو سره څه وکړو؟ ځکه په اورشلیم کې ټول خلک خبر دي چې د دوی په لاس حېرانوونکې مُعجزه ښکاره شوې او موږ ترې انکار نشو کولای  ^۱۷ خو د دې لپاره چې دا خبره نوره هم په خلکو کې خپره نشي، نو غوره به وي چې هغوی ته اخطار ورکړو ترڅو لدې وروسته د عیسی په نوم له چا سره خبرې ونکړي  ^۱۸ بیا یې هغوی دننه راوبلل او اخطار یې ورکړ چې د عیسی په نوم به هېڅ ډول خبرې یا تعلیم نه ورکوي  ^۱۹ خو پطروس او یوحنا ځواب ورکړ: تاسو پخپله قضاوت وکړئ چې آیا د خدای په نزد دا خبره سمه ده چې موږ دې د هغۀ پرځای ستاسو حکم ومنو  ^۲۰ موږ چې څه لیدلي او اورېدلي، نو د هغې په هکله له وېنا څخه نشو منع کېدای  ^۲۱ جرګې هغوی ته په کلکه اخطار ورکړ او خوشې یې کړل، هغوی پوهېدل چې دوی ته سزا ورکول ناشونې ده، ځکه ټول خلک د شوي کار له امله د خدای په ثنا ویلو بوخت وو  ^۲۲ او په کوم سړي چې دا مُعجزه څرګنده شوې وه د هغۀ عمر له څلویښتو کلونو پورته ؤ  ^۲۳ کله چې پطروس او یوحنا آزاد شول نو هغوی خپلو ملګرو ته ورغلل او هغه څه چې لوی مذهبي مشرانو او د قام مشرانو ورته ویلي وو، هغوی ته یې وویل  ^۲۴ او کله چې هغوی دا هرڅه واورېدل، نو ټولو په یوۀ زړۀ خدای ته داسې دعا وکړه: ای مالکه! ای د آسمان، مځکې بحر او هرهغه څه چې پدوی کې دي، د هغې پېداکوونکیه!  ^۲۵ تا د سپېڅلي روح پوسیله د خپل خادم او زموږ د نیکه داؤد په خُله فرمایلي وو: ولې د نړۍ خلک په قهرشول او ولې قامونه بیځایه توطیې کوي؟  ^۲۶ د نړۍ پاچاهان را پورته شول او حاکمان د مالک او د هغۀ د مسیح پر ضد سره یو ځای شول  ^۲۷ په حقیقت کې هیرودیس، پنطوس پېلاطوس، له غېر یهودو او اسرائیلو سره پدې ښار کې ستا د سپېڅلي خادم عیسی، کوم چې تا مسح کړی، پر ضد را ټول شول  ^۲۸ ترڅو ټول هغه کارونه تر سره کړي، کوم چې تا په خپل قدرت او ارادې سره مقرر کړي وو  ^۲۹ نو اوس ای مالکه! د هغوی ګواښونو ته پاملرنه وکړه او خپلو خادمانو ته ځواک ورکړه چې په ډاډ سره ستا کلام بیان کړي  ^۳۰ خپل لاس را اوږد کړه ترڅو ستا دسپېڅلي خادم عیسی په نامه د روغتیا ورکولو مُعجزې او حېرانوونکي کارونه جاري پاتې شي  ^۳۱ او کله چې د هغوی دعا پای ته ورسېده، نو د هغوی د را ټولیدو کور ولړزېد او ټول له سپېڅلي روح څخه ډک شول او د خدای کلام یې په زړورتیا سره بیان کړ. 

د ایماندارانو تر منځ یووالی

^۳۲ ټول ایمانداران په زړۀ او ځان سره یو لاس وو او هېچا خپله شتمني، خپله نه ګڼله، بلکې ټول د یوبل په شتمنۍ کې سره شریک وو  ^۳۳ رسولانو په لوی قدرت سره د مالک عیسی د بیا را ژوندي کېدو ګواهي ورکوله، نو پرخلکو یې ډېر تاثیر کاوه او د خدای فېض له هغوی سره ؤ  ^۳۴ په هغوی کې هېڅوک هم محتاج نه وو، ځکه هر چا چې مځکه یا کور درلود نو هغه یې خرڅول او دهغې قیمت یې راوړلو  ^۳۵ او پیسې یې رسولانو ته ورکولې او هغوی به د بیوزلو په منځ کې ویشلې  ^۳۶ لکه یوسف چې د لاوی قبیلی څخه ؤ او رسولانو ورته برنابا یانی تشویقوونکی ویل، چې اصلا د قبرص اوسېدونکی ؤ  ^۳۷ هغۀ مځکه درلوده چې خرڅه یې کړه او پیسې یې رسولانو ته وسپارلې.