ساؤل کلیسا ځوروي

^۱ او ساؤل له هغو کسانو څخه ؤ چې د اسټیفان پرمرګ راضي ؤ، نو په هماغه ورځ د اورشلیم د کلیسا ربړول پېل شول او له رسولانو پرته نور ټول ایمانداران د یهودیې او سامريې په سیموکې خواره واره شول  ^۲ ایماندارانو سټېفان ښخ کړ او ډېر ویر ژړا یې پرې وکړه  ^۳ پدغه موده کې ساؤل غوښتل ترڅو د کلیسا بنسټ ونړوي، هغه کور په کور ګرځېده، ایمانداران سړي او ښځې یې را نیول او په زندان کې یې اچول. 

په سامریه کې د زیري وعظ

^۴ او هغه ایمانداران چې خواره واره شوي وو، هغوی چې چېرې تلل نو دکلام تعلیم یې ورکاوه  ^۵ نو فیلیپوس د سامریې یو ښار ته ولاړ او هلته یې د مسیح په هکله وعظ وکړ  ^۶ او خلکو په ډېر شوق سره د فیلیپوس خبرې اورېدې او کومې مُعجزې چې هغۀ کولې هغه یې لیدلې  ^۷ پدې ډول چې له ډېرو پېریان نیولو څخه پېریان په چیغو سره راوتل او ډېرو شلانو او ګوډانو روغتیا وموندله  ^۸ او په هغه ښارکې لویه خوشالي راغله  ^۹ او په هغه ښار کې شمعون نومې یو سړی ؤ چې له څه مودې راهیسې یې په جادو سره د ډېرو سامریانو پام د خپل ځان لور ته را اړولی ؤ او ځان یې د لویې مرتبې مالک ګڼلو  ^۱۰ او هغوی ټولو لویانو او کوچنیانو د هغۀ خبرې په غور سره اورېدې او ویل یې چې دا سړی د خدای هغه قدرت دی چې ورته لوی ویل کېږي  ^۱۱ هغوی ځکه د هغۀ خبرې اورېدلې چې له ډېرې مودې راهیسې یې هغوی د خپل جادو له کبله حېران کړي وو  ^۱۲ خوکله چې هغوی ټولو د فیلیپوس په هغه زیري ایمان راوړ، کوم یې چې د خدای د پاچاهۍ او د عیسی مسیح د نوم په هکله اوراوه، نو هغو ټولو ښځو او سړو تعمید واخیست  ^۱۳ تر دې چې خپله شمعون هم ایمان راوړ او تعمید یې واخیست او له هغې وروسته له فیلیپوس سره ؤ او کله یې چې د هغۀ په لاس حېرانوونکي کارونه او مُعجزې لیدلې نو حېران پاتې کېده  ^۱۴ او کله چې رسولانو په اورشلیم کې واورېدل چې سامریانو دخدای کلام منلی، نوهغوی پطروس او یوحنا ورولېږل  ^۱۵ هغوی هلته لاړل او د ایماندارانو لپاره یې دعا وکړه ترڅو پر هغوی سپېڅلی روح نازل شي  ^۱۶ ځکه تر دغه دمه پر هېچا هم سپېڅلی روح نه ؤ نازل شوی او هغوی یواځې د مالک عیسی په نامه تعمید اخیستی ؤ  ^۱۷ نو پطروس او یوحنا پرهغوی لاسونه کېښودل اوهغوی سپېڅلی روح ترلاسه کړ ^۱۸ او کله چې شمعون ولیدل چې د رسولانو په لاس کېښودلو سپېڅلی روح ورکول کېږي نو هغۀ هغوی ته د پیسو وړاندیز وکړ  ^۱۹ او ويې ویل چې ماته هم دغه قدرت راکړئ چې کله پرچا لاس کېږدم نو سپېڅلی روح څخه تر لاسه کړي  ^۲۰ خو پطروس ځواب ورکړ چې ستا پیسې دې لتا سره ورکې شي، ځکه ته فکر کوې چې ګوندې د خدای دا نعمت په پیسو سره اخیستل کېږي  ^۲۱ پدې خبره کې ستا هېڅ ډول برخه نشته، ځکه چې ته خدای ته بدنیته یې  ^۲۲ لدې بدۍ څخه توبه وباسه او مالک ته دعا وکړه ګواکې تاته د داسې فکر کولو بخښنه وکړي  ^۲۳ ځکه زه وینم چې ته ډېر له کینې ډک او د ګناه غلام شوی یې  ^۲۴ نو شمعون ځواب ورکړ چې: تاسو زما لپاره مالک ته دعا وکړئ ترڅو دا هرڅه چې تا وویل په ما رانشی  ^۲۵ بیا هغوی د ګواهۍ او د مالک دکلام له اورولو وروسته بېرته اورشلیم ته ستانه شول او په لارکې یې د سامریانو ډېرو کلیو ته د زیري پېغام ورکړ. 

فیلیپوس او حبشي خصي

^۲۶ بیا د مالک فرښتې فیلیپوس ته وویل: پورته شه او پر هغه سړک روان شه کوم چې له اورشلیم څخه غزې ته د سویل لور ته تللی دی او دا سړک په دښته کې دی  ^۲۷ نو هغه روان شو او په لار کې یې یو حبشي خصي ولید چې راروان دی، هغه د حبشې د ملکې چې کنداکه نومېدله لوی چارواکې او د هغې د خزانې واکمن ؤ، هغه د عبادت لپاره اورشلیم ته راغلی ؤ  ^۲۸ اوس هغه بېرته خپل کورته روان ؤ، هغه په خپله بګۍ کې ناست ؤ او داشعیا نبي صحیفه یې لوستله  ^۲۹ نوسپېڅلي روح فیلیپوس ته وویل چې لاړ شه او هغې بګۍ ته ورنږدې شه ^۳۰ نو فیلیپوس ورمنډه کړه او کله یې چې واورېدل هغه د اشعیا نبي صحیفه لولي نو ورته یې وویل: آیا ته چې څه لولې پر هغې پوهېږې؟  ^۳۱ هغۀ ورته وویل: زه پرې څنګه پوهېدای شم، ترڅو چې څوک یې را ته تشریح نکړي، نو هغۀ له فیلیپوس څخه وغوښتل ترڅو بګۍ ته راوخېژي او د هغۀ په څنګ کې کیني  ^۳۲ هغۀ چې د صحیفې کومه برخه لوستله، هغه دا وه: د هغې پسه په څېر چې حلالولو ته وړل کېږي، یا یو ګډوری چې د وړۍ کلوونکي په مخکې چوپ ولاړه وي، هغۀ هم له خُلې نه یوه خبره ونه ویستله  ^۳۳ هغه سپک کړای شو او ورسره انصاف ونشو او څوک به د هغۀ د نسل په هکله خبرې وکړي؟ ځکه چې د هغۀ ژوند له مځکې څخه ختم کړای شو  ^۳۴ نو هغه خصي فیلیپوس ته وویل: زه غواړم چې دا راته ووايې چې دلته پیغمبر د چا په هکله خبرې کوي؟ د خپل ځان په هکله یا د بل چا په هکله؟  ^۳۵ نو فیلیپوس د صحیفې لدې برخې څخه خبرې پېل کړې او د عیسی په هکله یې زیری واوراوه  ^۳۶ او کله چې دوی په سړک روان وو نو یو داسې ځای ته ورسېدل چې هلته اوبه وې نو خصي وویل: ګوره! دلته اوبه هم شته نو اوس څه شی ما له تعمید اخیستلوڅخه منع کولای شي؟  ^{۳۷  ۳۸} نو هغۀ د بګۍ درولو امر وکړ، بیا فیلیپوس او هغه خصي دواړه اوبو ته کوز شول او هغۀ ته یې تعمید ورکړ  ^۳۹ کله چې هغوی له اوبو څخه راووتل نو د مالک سپېڅلي روح فیلیپوس ویوړ او خصي بیا هغه ونه لید او په خوشالۍ سره پرخپله لار روان شو  ^۴۰ بیا فیلیپوس ناڅاپه اشدود نومي ښار ته رسېدلی ؤ، قیصریې ته له رسېدو مخکې په ټوله سیمه کې وګرځېد او په ټولو ښارونو کې یې د زیري اعلان کاوه.