کلام جسم شو

^۱ په ازل کې کلام ؤ او کلام د خدای سره ؤ او کلام خدای ؤ  ^۲ او هغه په ازل کې د خدای سره ؤ.  ^۳ هرڅه د هغۀ پواسطه پېدا شول او هېڅ شی له هغۀ پرته پېدا نه شو  ^۴ په هغۀ کې ژوندون ؤ او ژوندون د انسانانو رڼا وه.  ^۵ رڼا په تیاره کې ځلېږي او تیاره پرهغې برلاسې نشوه.  ^۶ یو سړی د خدای له لوري راولېږل شو او دهغۀ نوم یحیی ؤ  ^۷ هغه د ګواهۍ لپاره راغی ترڅو د رڼا ګواهي ورکړي او ټول خلک پرهغۀ ایمان راوړي  ^۸ هغه خپله رڼا نه ؤ، بلکې راغی ترڅو پرهغې رڼا ګواهي ورکړي  ^۹ او هغه حقیقي رڼا چې ټولو ته روښنایي ورکوي نړۍ ته راتلونکې وه  ^۱۰ هغه په نړۍ کې ؤ او نړۍ د هغۀ پواسطه پېدا شوه، خو نړۍ هغه ونه پېژانده.  ^۱۱ هغه خپل ځای ته راغی، خو د هغۀ خپلو خلکو هغه ونه منلو  ^۱۲ خو کومو خلکو چې هغه ومنلو او د هغۀ په نوم یې ایمان راوړ، هغوی ته یې حق ورکړ ترڅو د خدای بچیان شي  ^۱۳ ځکه هغوی نه له وینې، نه له جسماني غوښتنې او نه د انسان په رضا، بلکې له خدای څخه پېدا شول.  ^۱۴ نو کلام جسم شو او زموږ په منځ کې مېشت شو، هغه له جلال او ریښتینولۍ څخه ډک ؤ او موږ د هغۀ جلال ولید، هغه جلال چې د پلار د یواځیني زوی لایق دی  ^۱۵ یحیی پرهغۀ ګواهي ورکړه او نارې یې وهلې چې، دا هغه څوک دی چې ما به د هغۀ په هکله ویل چې زما څخه وروسته به راځي خو زما څخه به لومړی شي، ځکه زما څخه وړاندې یې شتون درلود  ^۱۶ د هغۀ له ډکون څخه موږ ټول برخمن شو، دفېض لپاسه فېض  ^۱۷ ځکه چې شریعت د موسی پواسطه ورکړل شو، خو فېض او حقیقت دعیسی مسیح پواسطه راغلل.  ^۱۸ خدای هېڅکله هېچا هم ندی لیدلی خو د خدای یواځیني زوی چې له ټولو نه پلار ته نږدې دی د پلار په څنګ کې دی، هغۀ موږ ته راوپېژانده. 

د یحیی ګواهي

( متی ۳ : ۱-۱۲، مرقس ۱: ۱-۸ او لوقا ۳: ۱-۱۸ )

^۱۹ او دا د یحیی ګواهي ده، کله چې یهودو له اورشلیم څخه مذهبي مشران او لاویان ورولېږل، ترڅو له هغۀ څخه پوښتنه وکړي چې ته څوک یې  ^۲۰ نو هغۀ اعتراف وکړ او انکار یې ونکړ، هغۀ اقرار وکړ چې زه مسیح نه یم  ^۲۱ او هغوی له هغۀ څخه پوښتنه وکړه چې بیا ته څوک یې، آیا ته الیاس یې؟ نو هغۀ وویل: زه هغه نه یم، آیا ته هغه نبي یې چې موږ یې په تمه یو؟ ویې ویل، نه  ^۲۲ بیا یې هغۀ ته وویل، نو ته څوک یې، ترڅو موږ هغو خلکو ته ځواب ولرو چا چې موږ رالېږلي یو او ته د ځان په هکله څه وايې؟  ^۲۳ نو ويې وویل، زه په دښته کې د هغه نارې وهونکي ناره یم چې وایي: د خدای لاره نېغه کړئ، لکه چې اشعیا نبي ویلي وو  ^۲۴ نو قاصدان چې فریسیان وو  ^۲۵ له هغۀ څخه يې پوښتنه وکړه: که چېرې ته نه مسیح، نه الیاس او نه نبي یې نو بیا ولې تعمید ورکوې؟  ^۲۶ یحیی هغوی ته ځواب ورکړ، زه تاسو ته په اوبو تعمید درکوم، خو ستاسو په منځ کې داسې څوک ولاړ دی چې تاسو هغه نه پېژنئ  ^۲۷ هغه چې زما څخه وروسته راځي حتی زه د دې لیاقت نلرم ترڅو د هغۀ د څپلیو بندونه پرانیزم.  ^۲۸ او دا پېښه په بېت‌عنیا کې، چې د اردن بلې غاړې ته دی او یحیی به خلکو ته تعمید ورکاوه رامنځ ته شوه. 

د خدای ګډوری

^۲۹ او د هغې ورځې په سبا کله چې یحیی ولیدل چې عیسی د هغۀ لور ته راروان دی نو هغۀ وویل: وګورئ! دا د خدای ګډوری دی چې د نړۍ ګناه پورته کوي  ^۳۰ او دا هغه څوک دی چې ما به د هغۀ په هکله ویل چې زما څخه وروسته به یو کس راځي، چې د هغۀ رتبه زما څخه لوړه ده ځکه چې زما څخه وړاندې یې شتون درلود  ^۳۱ ما هغه نه پېژانده، خو زه راغلم او په اوبو تعمید ورکوم ترڅو هغه بني اسرائیلو ته وروپېژنم.  ^۳۲ یحیی خپلې ګواهۍ ته ادامه ورکړه او ويې ویل: ما د خدای روح د یوې کوترې په څېر ولید چې له آسمانه راکوز شو او پر هغۀ یې ځای ونیو  ^۳۳ ما هغه نه پېژانده، خو چا چې زه رالېږلی یم ترڅو په اوبو سره تعمید ورکړم، هغۀ ماته وفرمایل: هرکله چې ووینې چې روح پرچا نازل شي او پرهغۀ ځای ونیسي، نو هغه به په سپېڅلي روح سره تعمید ورکوي  ^۳۴ نو ما ولیدل او ګواهي ورکوم چې دا د خدای زوی دی. 

د عیسی لومړني شاګردان

^۳۵ او بله ورځ هم یحیی له خپلو دوو تنو شاګردانو سره ولاړ ؤ  ^۳۶ چې عیسی د هغۀ له څنګه تېریده، نو یحیی د هغۀ لور ته وکتل او ویې ویل: وګورئ! دا د خدای پسۀ دی  ^۳۷ او کله چې هغو دوو شاګردانو د هغۀ خبره واورېدله، نو د هغۀ پسې روان شول.  ^۳۸ کله چې عیسی شاته وکتل نو ویې لیدل چې هغه دوه تنه د هغۀ پسې روان وو، نو هغوی ته یې وفرمایل: تاسو د څه شي لټون کوئ؟ هغوی وویل، ربّي، یانې ای استاذه! ته چېرې اوسېږې؟  ^۳۹ نو عیسی ځواب ورکړ، راشئ او وګورئ، نو هغوی راغلل او ویې لیدل چې هغه چېرې اوسېږي او هغه ورځ یې له هغۀ سره تېره کړه، ځکه چې د مازدیګر څلور بجې وې.  ^۴۰ او له هغو دوو څخه یو تن چې د یحیی د خبرو له اورېدلو وروسته عیسی پسې لاړ، د شمعون پطروس ورور اندریاس ؤ  ^۴۱ هغه تر ټولو د مخه شمعون وموند او ورته یې وویل: موږ مسیح یانې مسح شوی موندلی دی.  ^۴۲ او کله یې چې هغه عیسی ته راوست نو عیسی هغۀ ته وکتل او ورته یې وفرمایل: ته د یوحنا زوی شمعون یې، چې تر دې وروسته به کیپاس یانې پطروس وبلل شې.  ^۴۳ او کله چې سبا عیسی غوښتل ګلیل ته لاړ شي نو فیلیپوس یې وموند او هغۀ ته یې وفرمایل چې زما پسې راشه  ^۴۴ او فیلیپوس هم د اندریاس او پطروس دښار بېت‌صېدا اوسېدونکی ؤ.  ^۴۵ فیلیپوس نتنائیل پېدا کړ او ورته یې وویل: هغه کس چې موسی په شریعت کې او انبیاو د هغۀ یادونه کړې موږ هغه موندلی دی، هغه د ناصري یوسف زوی عیسی دی  ^۴۶ نتنائیل هغۀ ته وویل: آیا کېدای شي چې په ناصریه کې هم ښه شی پېدا شي؟ نو فیلیپوس هغۀ ته وویل: راشه او وګوره!  ^۴۷ او کله چې عیسی نتنائیل ولید چې د هغۀ لور ته راروان دی نو ویې فرمایل: دا یو رېښتینی اسرائیلي دی چې پده کې هېڅ ډول ټګي نشته.  ^۴۸ نتنائیل هغۀ ته وویل: ما څنګه پېژنې؟ نو عیسی ورته په ځواب کې وفرمایل: وړاندې لدې چې فیلیپوس تا راوبلي، کله چې ته د اینځر د ونې لاندې وې نو ما ولیدلې  ^۴۹ نو نتنائیل ځواب ورکړ: استاذه! ته د خدای زوی يې، ته د اسرائیلو پاچا یې  ^۵۰ عیسی ورته وفرمایل: آیا دا چې تاته مې وویل چې ته مې د اینځر د ونې لاندې ولیدې، نو تا ایمان راوړ؟ لدې وروسته به تر دې هم لوی شیان ووینې.  ^۵۱ بیا هغۀ وفرمایل: تاسو ته په یقین سره وایم چې آسمان به پرانېستی ووینئ او د خدای فرښتې به په داسې حال کې ووینئ چې د انسان د زوی په وړاندې پورته او ښکته کېږي.