د عیسی بیا راژوندي کېدل

( متی ۲۸: ۱-۱۰، مرقس ۱۶: ۱- ۸، یوحنا ۲۰: ۱-۱۰)

^۱ د اونۍ په لومړۍ ورځ، سهار د وخته یې هغه تیاره کړي خوشبویي حنوط له ځانه سره واخیسته او قبر ته راغلې.  ^۲ خو ګټ د قبر له خُلې څخه رغړول شوی ولید.  ^۳ خو کله چې دننه ورغلې نو د مالک عیسی مړی یې و نه موندلو  ^۴ او هغوی لا حېرانې ولاړې وې چې ناڅاپه دوه سړي په ځليدونکوجامو کې د هغوی ترڅنګ ودرېدل،  ^۵ کله چې هغوی ووېرېدلې او خپل سرونه یې مځکې ته ټيټ کړي ؤ، نو هغو سړو ورته وویل: ولې ژوندي د مړو په منځ کې لټوﺉ؟  ^۶ هغه دلته نشته بلکې پاڅېدلی دی، هغه څه چې یې په ګلیل کې تاسو ته ویلي ؤ، هغه رایاد کړﺉ،  ^۷ چې ویل یې: ضرورې ده چې د انسان زوی به دګنهګارو خلکو لاسونو ته وسپارل شي، په صلیب به وخېژول شي او په دریمه ورځ به بیا راپورته شي.  ^۸ نو د هغۀ خبرې یې رایادې کړې.  ^۹ بیا له قبره راستنې شوې، هغه یوولس رسولان او نور ټول یې لدې ټولو کارونو څخه خبر کړل.  ^۱۰ داخبرې مریمې مجدلیې، یونا، مریمې د یعقوب مور او نورې چې ورسره وې، رسولانو ته وکړې.  ^۱۱ خو د هغوی خبرې ورته عبث ښکاره شوې او پر هغوی یې باور ونکړ،  ^۱۲ خو پطروس پاڅېد، د قبر لور ته یې منډه کړه، ورکوز شو او له کفن پرته یې نور هېڅ هم و نه لیدل او له رامنځته شوې پېښې څخه حېران بېرته ستون شو. 

عماؤس ته په لار

( مرقس ۱۶: ۱۲-۱۳)

^۱۳ په هماغه ورځ له هغوی څخه دوه تنه د عماؤس نومې کلي ته چې له اورشلیم څخه اووه میله لري دی روان ؤ  ^۱۴ او یو له بل سره یې د دې ټولو رامنځته شوو پېښو په تړاو خبرې کولې.  ^۱۵ او کله چې دوی په بحث او خبرو بوخت ؤ، ناڅاپه خپله عیسی ورنږدې شو او له هغوی سره روان شو،  ^۱۶ خو د هغوی په سترګو پرده واچول شوه ترڅو هغه ونه پېژني.  ^۱۷ هغۀ ورته وفرمایل: په لار کې د تللو پر وخت ستاسو د بحث موضوع څه وه؟ هغوی پداسې حال کې چې غمژن ؤ ودرېدل.  ^۱۸ یو یې چې کلیوپاس نومیده په ځواب کې ورته وویل: ګواکې په اورشلیم کې له سیلانیانو څخه یوازې ته یې چې د وروستیو ورځو له رامنځته شوو پېښوڅخه خبر نه یې؟  ^۱۹ هغوی ته یې وفرمایل: څه خبره شوې ده؟ هغوی ورته وویل: د عیسی ناصري په هکله، چې هغه د خدای او ټولو خلکو په وړاندې په وېنا او عمل کې ځواکمن نبي ؤ  ^۲۰ او دا چې څه ډول لوی مذهبي مشرانو او حاکمانو هغه په مړینې محکوم کړ او پرصلیب یې وخېژاوه.  ^۲۱ خو موږ هیله من ؤ چې همدی به اسرائیلو ته ژغورنه ورکړي. پر دې ټولو سر بېره نن د دې پېښې د رامنځته کېدو دریمه ورځ ده.  ^۲۲ او زموږ ځینو ښځو موږ حېران کړي یو، ځکه کله چې نن سهار وختي هغوی قبر ته تللې وې،  ^۲۳ خو د هغۀ مړی یې ونه موند، هغوی راستنې شوې او ویې ویل چې په رؤیا کې یې فرښتې ولیدلې چې ویل یې، هغه راژوندی شوی دی.  ^۲۴ بیاځینې خلک چې زموږ سره وو، قبر ته لاړل او څه چې ښځو ویلي ؤ، ویې لیدل خوهغه یې و نه لید.  ^۲۵ بیا یې هغوی ته وفرمایل: ای ناپوهانو او د انبیاؤ د وېناو په منلو کې د ناراستو زړونو لرونکو!  ^۲۶ آیا ضروري نه وو چې مسیح دا کړاوونه وویني او خپل جلال ته ورسېږي؟  ^۲۷ بیا یې له موسی او ټولو انبیاؤ څخه پېل وکړ او په هره برخه کې یې هغه خبرې تشریح کړې کومې چې په صحیفو کې راغلې وې.  ^۲۸ کله چې هغوی هغې کلي ته نږدې شول، کوم ته چې ورروان ؤ، نو هغۀ داسې ښکاره کړه چې ګوندې نور هم مخکې روان دی  ^۲۹ خو هغوی ټینګار وکړ او ویې ویل: زموږ سره پاتې شه، ځکه چې ماښام نږدې دی او ورځ هم پای ته رسېدلې، نو دننه شو او له هغوی سره پاتې شو.  ^۳۰ او کله چې له هغوی سره دخوراک لپاره کېناست، ډوډۍ یې را واخیسته، برکت یې ورکړ، ماته یې کړه او هغوی ته یې ورکړه.  ^۳۱ ناڅاپه د هغوی سترګې خلاصې شوې او هغه یې وپېژانده، خو هغه د هغوی له نظر څخه پناه شو.  ^۳۲ هغوی یو بل ته وویل: کله چې په لارکې هغۀ زموږ سره خبرې کولې او د صحیفو تفسیر یې کاوه، آیا زموږ زړونو لمبې نه کولې؟  ^۳۳ او هماغه وخت پاڅېدل، اورشلیم ته ستانه شول، هلته یې یوولس شاګردان او نور خلک ورسره ومندل.  ^۳۴ او ویل یې، په حقیقت کې مالک راژوندی شوی او شمعون ته ښکاره شوی دی. ^۳۵ هغو د لارې پېښې بیان کړې او هم دا چې څه ډول یې د ډوډۍ ماتولو پر مهال هغه پېژندلی ؤ. 

عیسی خپلو شاګردانو ته ځان ښکاره کوي

( متی ۲۸: ۱۶-۲۰، مرقس ۱۶: ۱۴-۱۸، یوحنا ۲۰: ۱۹-۲۳، اعمالو ۱: ۶ - ۸)

^۳۶ هغوی لا د دې پېښو په هکله خبرې کولې، چې ناڅاپه عیسی د هغوی په منځ کې ودرېد او هغوی ته یې وویل: پر تاسو دې سلامتي وي.  ^۳۷ هغوی وبوږنېدل، ووېرېدل او ګمان یې وکړ چې کوم پېری ګوري.  ^۳۸ خو هغوی ته یې وفرمایل: ولې وارخطا شوﺉ؟ او د څه لپاره ستاسو په زړونو کې وسوسې پېدا کېږي؟  ^۳۹ زما لاسونه او پښې وګورﺉ، چې زه خپله يم، پر ما لاس کېږدﺉ او وګورﺉ، ځکه چې پېری غوښه او هډوکي نلري خوتاسو وینئ چې زه یې لرم.  ^۴۰ کله یې چې دا وفرمایل، نو خپل لاسونه او پښې یې هغوی ته وښودل.  ^۴۱ لا تر اوسه هغوی د خوښۍ په موخه باور نه ؤ کړي او حېران پاتي ؤ، چې ورته یې وفرمایل: آيا دلته د خوراک لپاره څه لرﺉ؟  ^۴۲ هغوی ورته یوه ټوټه وریت شوی کب کېښود،  ^۴۳ نو هغه یې واخیست او د هغوی په مخ کې یې وخوړلو.  ^۴۴ بیا یې هغوی ته وفرمایل: دا زما هغه خبرې دي کله چې زه لتاسو سره وم او تاسو ته به مې ویلې: هغه څه چې د موسی په تورات، د انبیاؤ په صحیفو او زبور کې زما په هکله لیکل شوي دي باید پوره شي.  ^۴۵ بیا یې د هغوی ذهنونه روښانه کړل ترڅو د صحیفو په لیکنو پوه شي  ^۴۶ او هغوی ته یې وفرمایل: او په همدې لیکل شوي چې مسیح به کړاو وزغمي او په دریمه ورځ به له مړو څخه راپورته شي.  ^۴۷ او د هغۀ په نوم به ټولو قامونو ته د توبې او له ګناه څخه د بخښنې پېغام اعلان شي چې د هغې پېل به له اورشلیم څخه وي.  ^۴۸ او تاسو پردې ټولو شیانو ګواهان یاستئ.  ^۴۹ او دا وګورﺉ چې زه د خپل پلار ژمنه تاسو ته درلېږم، خو تاسو ترهغې پدې ښار کې پاتې شئ، ترڅو له لوړ ځواک څخه برخمن شئ. 

آسمان ته ختل

( مرقس ۱۶: ۱۹-۲۰، اعمالو ۱: ۹-۱۱)

^۵۰ او هغوی یې له ښار څخه بهر تر بیت‌عنیا پورې بوتلل، خپل لاسونه یې پورته کړل او هغوی ته یې برکت ورکړ.  ^۵۱ او پداسې حال کې چې هغوی ته یې برکت ورکاوه له هغوی څخه بېل شو او د آسمان لور ته وېوړل شو.  ^۵۲ هغوی د هغۀ عبادت وکړ او په ډېرې خوشالۍ د اورشلیم لورته ستانه شول،  ^۵۳ په پرله پسې توګه په سپېڅلي کور کې وو او د خدای ستاينه یې کوله.