د اېلعازر مرګ او ژوندي کېدل

^۱ او اېلعازر نومې سړی ناروغه ؤ، هغه د بېت‌عنیا اوسېدونکی ؤ کوم چې د مریمې او د هغې د خور مرتا کلی ؤ.  ^۲ او دا هغه مریمه وه چې په مالک یې عطر اچولي وو او د هغۀ پښې یې په خپلو وېښتانو وچې کړې وې او د هغې ورور اېلعازر ناروغه ؤ.  ^۳ نو د هغۀ خویندو عیسی ته پیغام ولېږه ویې ویل: مالکه! ته چې له چا سره مینه کوې هغه ناروغه دی.  ^۴ او کله چې عیسی دا واورېدل نو ويې فرمایل: دا ناروغتیا مرګوني نده بلکې دا د خدای د جلال د څرګندونې لپاره ده، ترڅو د خدای زوی لدې لارې جلال ومومي.  ^۵ لکه څرنګه چې عیسی له مرتا او د هغې له خور او اېلعازر سره مینه درلوده  ^۶ خوکله یې چې واورېدل چې هغه ناروغ دی، نو په کوم ځای کې چې ؤ هملته دوه ورځې تم شو.  ^۷ او له هغې وروسته یې خپلو شاګردانو ته وفرمایل: راځئ چې بېرته یهودیې ته لاړ شو  ^۸ نو شاګردانو یې هغۀ ته وویل استاذه! ډېره موده نده شوې چې یهودو غوښتل تا سنګسار کړي، آیا ته غواړې چې بیا هلته لاړ شې؟  ^۹ عیسی ځواب ورکړ: آیا ورځ دولس ساعته نده؟ که چېرې څوک د ورځې ګرځي هېڅکله به تیندک ونخوري ځکه چې هغه د دې نړۍ رڼا ویني  ^۱۰ خو که چېرې څوک په شپه کې ګرځي نو خامخا به تیندک خوري، ځکه چې رڼا پکې نشته.  ^۱۱ تر دې وېنا وروسته عیسی وفرمایل: زموږ دوست اېلعازر وېده دی او زه ورځم ترڅو هغه راویښ کړم.  ^۱۲ د هغۀ شاګردانو وویل: مالکه! که چېرې وېده وي نو روغ به شي.  ^۱۳ عیسی د هغۀ د مړینې په هکله خبره کوله خو هغوی ګمان کاوه چې ګوندې د هغۀ د عادي خوب په هکله وايي.  ^۱۴ خو بیا عیسی هغوی ته په ډاګه وویل چې اېلعازر مړ شوی دی  ^۱۵ نو تاسو لپاره خوشاله یم چې هلته نه وم ځکه اوس کولای شئ چې ایمان راوړئ، راځئ چې هغۀ ته ورشو  ^۱۶ او بیا توما چې غبرګونی هم ورته وايي نورو شاګردانو ته وویل: راځئ چې موږ هم لاړ شو ترڅو له هغۀ سره مړه شو. 

عیسی قیامت او ژوندون دی

^۱۷ او کله چې عیسی هلته ورسېد نو خبر شو چې د الېعازر له ښخېدو څخه څلور ورځې تېرې شوي دي.  ^۱۸ او بېت‌عنیا تقریباً درې کیلومتره له اورشلیم څخه لرې ؤ  ^۱۹ او تردې دمه ګڼ شمېر یهودیان، مریمې او مرتا ته د هغوی د ورور د غمرازۍ لپاره راغلي وو.  ^۲۰ او کله چې مرتا د عیسی له راتګ څخه خبره شوه نو د هغۀ هرکلي ته راووتله، خو مریمه په کور کې پاتې شوه.  ^۲۱ نو مرتا عیسی ته وویل: مالکه! که چېرې ته دلته وای نو زما ورور به نه مړ کېده.  ^۲۲ خو اوس هم پوهېږم چې ته له خدایه هرڅه وغواړې نو خدای به یې تاته درکړي  ^۲۳ عیسی هغې ته وفرمایل: ستا ورور به بیا راژوندی شي.  ^۲۴ مرتا هغۀ ته وویل: پوهېږم چې هغه به راژوندی شي خو دقیامت په ورځ  ^۲۵ نو عیسی هغې ته وفرمایل: زه قیامت او ژوندون یم، څوک چې پرما ایمان راوړي که چېري هغه مړ هم شي نو بیا به راژوندی شي.  ^۲۶ او څوک چې ژوندی وي او پرما ایمان راوړي نو تر ابده به مړنشي، آیا ته پدې باور لرې؟  ^۲۷ هغې وویل، هو مالکه! زه ایمان لرم چې ته مسیح د خدای زوی یې کوم چې نړۍ ته راتلونکی دی.  ^۲۸ او کله یې چې دا وویل نو لاړه او خپله خور مریمه یې په پټه راوبلله او ورته یې وویل: استاذ راغلی او تا غواړي.  ^۲۹ او کله چې هغې دا واورېدل نو ژر را پاڅېدله او د هغۀ څنګ ته راغله.  ^۳۰ او عیسی لا کلي ته نه ؤ رسېدلی بلکې په هماغې ځای کې ؤ، چېرې چې مرتا هغه لیدلی ؤ  ^۳۱ او کوم یهودیان چې هغې ته د غمرازۍ لپاره راغلي وو، کله یې چې ولیدل مریمه له کور څخه په منډه ده نو د هغې پسې شول، ځکه هغوی دا فکر کاوه چې ګوندې هغه قبر ته د ژړا لپاره روانه ده  ^۳۲ نو مریمه هغې ځای ته لاړه چېرې چې عیسی ؤ او کله یې چې هغه ولید نو پرپښو ورپرېوته او ویې ویل، مالکه! که چېرې ته دلته وای نو زما ورور به نه مړ کېده.  ^۳۳ او کله چې عیسی هغه او ورسره یهودیان په ژړا ولیدل نو یو اسویلې یې وکړ او ډېر زهیر شو  ^۳۴ او پوښتنه یې وکړه چې، هغه مو په کوم ځای کې ښخ کړی دی؟ هغۀ ته یې وویل، مالکه راشه اوګوره!  ^۳۵ نو عیسی په ژړا شو.  ^۳۶ یهودو وویل: وګورئ هغه ورته څومره ګران ؤ  ^۳۷ له هغوی څخه ځینو وویل: آیا دغه سړی چې د هغه ړوند سړي سترګې یې بینا کړې وې، آیا دا یې نشو کولای ترڅو هغه یې له مرګ څخه ژغورلی وای؟ 

اېلعازر ژوندی کېږي

^۳۸ عیسی بیا یو اسویلې وکړ او د قبر څنګ ته ورغی او دا یو غار ؤ چې ګټ ورته ایښودل شوی ؤ.  ^۳۹ عیسی وفرمایل: ګټ پورته کړئ، نو د مړي خور مرتا هغۀ ته وویل: مالکه! اوس به هغۀ بوی کړی وي ځکه چې څلور ورځې پرې تېرې شوې دي.  ^۴۰ نو عیسی هغې ته وفرمایل: آیا ما تاته ندي ویلي چي، که چېرې ایمان ولرې نو د خدای جلال به ووینې؟  ^۴۱ نو ګټ یې د قبر له خُلې څخه پورته کړ، عیسی پورته د آسمان لور ته وکتل او ویې فرمایل: ای پلاره! ستا شُکر په ځای کوم چې تا زما واورېدل  ^۴۲ او زه پوهېږم چې ته تل زما خبره اورې، خو د دې حاضرې ډلې په خاطر مې وویل ترڅو دوی ایمان راوړي چې تا زه رالېږلی یم  ^۴۳ او کله یې چې دا وفرمایل نو په لوړ غږ یې وویل: ای اېلعازره! بهر راووځه.  ^۴۴ نو هغه مړ سړی چې پښې او لاسونه یې په کفن کې تړلي وو او مخ یې په دستمال کې نغښتی ؤ بهر راووت، عیسی هغوی ته وفرمایل: هغه پرانېزئ او پرېږدئ چې لاړ شي.  

د عیسی د وژلو پلان

( متی ۲۶: ۱ - ۵، مرقس ۱۴: ۱ - ۲ او لوقا ۲۲: ۱ - ۲ )

^۴۵ بیا هغه ګڼ شمېر یهودیان چې له مریمې سره راغلي وو او هغه څه یې ولیدل چې عیسی وکړل نو پر هغۀ یې ایمان راوړ.  ^۴۶ خو ځینې یې فریسیانو ته ورغلل او له هغو کارونو څخه یې خبر کړل چې عیسی کړي وو  ^۴۷ بیا لوی مذهبي مشرانو او فریسیانو جرګه راغونډه کړه او ویې ویل: موږ باید څه وکړو؟ ځکه دغه سړی ډېرې مُعجزې ښکاره کوي  ^۴۸ او که چېرې هغه همداسې پرېږدو نو ټول به پر هغۀ ایمان راوړي، رومیان به راشي او زموږ ملک او قام به ونیسي.  ^۴۹ له هغوی څخه یو تن چې کیاپاس نومېده او په هغه کال د مذهبي مشرانومشر ؤ هغوی ته وویل: تاسو هېڅ نه پوهېږئ  ^۵۰ او فکر نه کوئ چې تاسو لپاره ګټوره ده ترڅو یو تن د قام لپاره مړ شي، نه دا چې ټول ملت برباد او لمنځه لاړ شي.  ^۵۱ او دا یې له ځانه ونه ویل بلکې دا چې په هغه کال، هغه د مذهبي مشرانو مشر ؤ نو پېش بینی یې وکړه چې عیسی باید د قام لپاره مړ شي. ^۵۲ او نه یواځې د قام لپاره، بلکې ددې لپاره چې د خدای خواره واره بچي په یوځای کې سره راغونډ کړي.  ^۵۳ او له همغې ورځې وروسته هغوی د هغۀ د وژلو پلان جوړ کړ ^۵۴ او لدې وروسته عیسی د یهودو په منځ کې ښکاره نه ګرځېده بلکې له هغې ځایه راووت، هغه سیمه یې پرېښوده او د صحرا له لوري افرایم نومي ښار ته لاړ او له خپلو شاګردانو سره هلته مېشت شو.  ^۵۵ او کله چې د یهودو د فسحې اختر رانږدې شو نو له فسحې وړاندې ډېر خلک له کلیو څخه اورشلیم ته راغلل ترڅو ځانونه پاک کړي.  ^۵۶ هغوی د عیسی په لټه کې وو او کله چې په سپېڅلي کور کې ولاړ وو نو یو بل ته ویل: څه ګمان کوئ آیا د اختر لپاره به رانشي؟  ^۵۷ لوی مذهبي مشرانو او فریسیانو امر کړی ؤ چې که هرڅوک د هغۀ په هکله خبر ترلاسه کړي نو موږ ته دې ووايي ترڅو هغه ونیسو.