د عیسی مسیح بیا راژوندي کېدل

( متی ۲۸: ۱ - ۸، مرقس ۱۶: ۱-۸ او لوقا ۲۴: ۱-۱۲ )

^۱ او د یکشنبې په ورځ سحر د وخته چې لا سمه رڼا شوې نه وه نو مریمه مجدلیه قبر ته راغله او ويې لیدل چې د قبرله خُلې څخه ګټ لرې شوی ؤ.  ^۲ نو په منډه منډه شمعون پطروس او هغه بل شاګرد ته چې عیسی ته ګران ؤ ورغله او هغوی ته یې وویل: هغوی مالک له قبر څخه ویستلی او مالومه نده چې چېرې یې ښخ کړی دی.  ^۳ نو پطروس او هغه بل شاګرد راپاڅېدل او د قبر لور ته روان شول.  ^۴ هغوی دواړو منډې وهلې خو هغه بل شاګرد له پطروس څخه وړاندې قبر ته ورسېد.  ^۵ هغه ورټیټ شو او ویې لیدل چې کفن هلته پروت دی خو وردننه نشو.  ^۶ بیا شمعون پطروس د هغۀ پسې راغی، قبر ته ورننوت او د کتان کفن یې ولید چې هلته پروت ؤ  ^۷ او کوم دستمال چې د عیسی سر یې پرې تړلی ؤ له کفن سره نه ؤ خو بېل په یوه ځای کې رانغښتی پروت ؤ  ^۸ او بیا هغه شاګرد چې مخکې راغلی ؤ هغه هم قبر ته ننوت، ویې لیدل او یقین یې وکړ  ^۹ ځکه ترهغه وخته هغوی د خدای په کلام پوه نه وو چې باید هغه له مړو څخه راپورته شي.  ^۱۰ او بیا هغه دواړه شاګردان خپل ځای ته ستانه شول. 

عیسی مریمې مجدلیې ته ځان ښکاره کوي

( متی ۲۸: ۹-۱۰ او مرقس ۱۶: ۹-۱۱)

^۱۱ خو مریمه له قبر څخه بهر ولاړه وه او ژړېدله، کله چې هغې د ژړا په حالت کې قبر ته سر وردننه کړ  ^۱۲ نو هلته یې په سپینو جامو کې دوه فرښتې ولیدلې چې د مړي په ځای کې یوه د سر او بله د پښو لور ته ناسته وه.  ^۱۳ هغوی ورته وویل: ای ښځې ولې ژاړې؟ نو هغې ورته وویل: زما مالک یې لدې ځایه وړی دی او نپوهېږم چې چېرې یې دفن کړی دی.  ^۱۴ او کله یې چې دا وویل نو شاته یې وکتل، نو ویې لیدل چې عیسی هلته ولاړ دی خو ویې نه پېژانده چې هغه عیسی دی.  ^۱۵ عیسی هغې ته وفرمایل: ای ښځې ولې ژاړې؟ ته څوک لټوې؟ هغې دا ګمان وکړ چې ګوندې باغوان دی نو ورته یې وویل: باداره! که چېرې تا هغه وړی وي نو ماته ووایه چې هغه دې په کوم ځای کې ښخ کړی دی ترڅو زه هغه یوسم.  ^۱۶ نو عیسی هغې ته وفرمایل: ای مریمې! نو هغې، هغۀ ته مخ وروګرځاوه او په ارامي ژبه کې یې ورته وویل: ربوني، چې مانا یې ده استاذه.  ^۱۷ نو عیسی هغې ته وفرمایل: ما لمس نکړې، ځکه چې تراوسه خپل پلار ته پورته تللی نه یم خو زما وروڼو ته ورشه او ورته ووایه چې زه د خپل پلار او ستاسو پلار، د خپل خدای او ستاسو د خدای لور ته روان یم.  ^۱۸ نو مریمه مجدلیه راغله او شاګردان یې خبر کړل چې ما مالک ولید او داسې یې راته وفرمایل. 

عیسی خپلو شاګردانو ته ځان ښکاره کوي

(متی ۲۸: ۱۶-۲۰، مرقس ۱۶: ۱۴-۱۸ او لوقا ۲۴: ۳۶-۴۹)

^۱۹ او هماغه ورځ ماښام چې د یکشنبې ورځ وه نو شاګردان د یهودو له وېرې په یوځای کې راټول شوي وو او ټولې دروازې یې بندې کړې وې چې ناڅاپه عیسی راغی، دهغوی په منځ کې ودرېد او ویې فرمایل: پتاسو دی سلامتي وي.  ^۲۰ بیا یې خپل لاسونو او پښتۍ هغوی ته وښودلې او کله چې شاګردانو مالک ولید نو ډېر خوشاله شول.  ^۲۱ بیا عیسی هغوی ته وفرمایل: په تاسو دې سلامتي وي، لکه څرنګه چې پلار زه رالېږلی یم نو همدغه شان زه هم تاسو لېږم  ^۲۲ او کله یې چې دا وویل نو پرهغوی یې پوکې وکړ او ويې فرمایل: سپېڅلی روح واخلئ.  ^۲۳ که چېرې تاسو د چا ګناهونه وبخښئ هغوی به وبخښل شي خو که تاسو هغوئ ونه بخښئ نو هغوی به ونه بخښل شي. 

عیسی او توما

^۲۴ او توما چې له دولسو شاګردانو څخه یو ؤ او په غبرګوني هم مشهور ؤ، د عیسی د راتګ پرمهال هلته نه ؤ.  ^۲۵ نو نورو شاګردانو هغه خبر کړ چې مالک مو لیدلی، نو هغوی ته یې وویل: ترڅو چې مې د هغۀ په لاسونو کې د میخونو سوري نه وي لیدلي او په کوم ځای کې چې میخونه ټک وهل شوي پرهغې مې ګوتې نه وي وهلي او د هغۀ پښتۍ مې لمس کړی نه وي نو یقین به ونکړم.  ^۲۶ او اته ورځې وروسته کله چې شاګردان بیا په یو کور کې راټول وو نو توما هم هلته ؤ او ټولې دروازې تړلې وې، ناڅاپه عیسی راغی او د هغوی په منځ کې ودرېد او ویې فرمایل: په تاسو دې سلامتي وي.  ^۲۷ او توما ته یې وفرمایل: خپله ګوته دلته کېږده او زما لاسونه وګوره، خپل لاس را اوږد کړه او زما په پښتۍ یې ولګوه، نور شک مه کوه او یقین وکړه.  ^۲۸ نو توما وویل: زما مالکه زما خدایه!  ^۲۹ نو عیسی ورته وفرمایل: کله دې چې ولیدم نو ایمان دې راوړ؟ بختور دي هغه خلک چې زه یې لیدلی نه یم او ایمان راوړي  ^۳۰ او عیسی د خپلو شاګردانو په وړاندې لدې پرته نورې ډېرې مُعجزې هم وکړې چې پدې کتاب کې لیکل شوي ندي.  ^۳۱ خو دومره لیکل شوي ترڅو ایمان راوړئ چې عیسی، مسیح او د خدای زوی دی او د ایمان په وسیله د هغۀ په نوم کې ژوندون ولرئ.