توبې ته بلنه

^۱ په هغه وخت کې ځینو شته خلکو هغۀ ته د هغو ګلیلیانو یادونه وکړه چې پېلاطوس د هغوی وینې د هغوی له قربانیو سره ګډې کړې وې.  ^۲ نو هغۀ هغوی ته وفرمایل: آیا ګمان کوﺉ چې دغه ګلیلیان د ګلیل له نورو اوسېدونکو څخه ډېر ګنهګار وو چې پدې ډول ووژل شول؟  ^۳ زه تاسو ته وایم چې نه، که تاسو توبه ونکړﺉ، تاسو به هم هماغه شان هلاک شئ.  ^۴ یا هغه اتلس تنه چې د سیلوخ مناره پر هغوی راولوېده او ویې وژل، آیا ګمان کوﺉ چې هغوی د اورشلیم له ټولو اوسېدونکو څخه ډېر ګنهګار ؤ؟  ^۵ زه تاسو ته وایم چې نه، که تاسو توبه ونکړﺉ، تاسو ټول به هم هماغه شان هلاک شئ. 

د اینځر د بې‌مېوي ونې مثال

^۶ هغۀ دا مثال هم بیان کړ: یو تن په خپل باغ کې د اینځر ونه کینولې وه، کله چې راغی ترڅو له هغې څخه مېوه واخلي، نو هېڅ یې ونه موندل.  ^۷ بیا یې خپل باغوان ته وویل، وګوره! دری کاله وشول چې راځم او د دې اینځر د ونې مېوې پسې ګرځم، خو هېڅ مېوه مې پکې ونه موندله، دا پرې کړه، ځکه دې ونې هسې ځای نیولی دی  ^۸ خو هغۀ ځواب ورکړ، باداره! دا کال یې هم پرېږده، ترڅو زه د هغې شا او خوا وسپړم او پارو به ور واچوم.  ^۹ بیا یې که مېوه ونیوله، نو ښه ده، او که نه نو پرې یې کړه. 

د خالي په ورځ د ملا کړوپې ښځې روغتیا

^۱۰ او د خالي په ورځ هغۀ په یوې کنیسه کې تعلیم ورکاوه،  ^۱۱ هلته یوه ښځه وه چې له اتلس کلونو راهیسې یې د معیوبۍ پېریان لرل، ملا یې کړوپه شوې وه او نېغه درېدلې نشوه.  ^۱۲ کله چې عیسی هغه ولیدله، نو هغه یې راوغوښتله او ورته یې وفرمایل: ای ښځې ته له خپلې معیوبۍ څخه خلاصه شوې  ^۱۳ بیا یې خپل لاسونه پر هغې کېښودل، هماغه شیبه نېغه شوه او د خدای ستاینه یې وکړه.  ^۱۴ خو د کنیسې مشر خوابدی شو، ځکه چې عیسی هغې ته د خالي په ورځ روغتیا ورکړه، هغۀ خلکو ته وویل: شپږ ورځې ټاکل شوي دي چې په هغې کې خلک کار وکړي، نو پدغو ورځو کې راشئ او روغتیا واخلئ، نه د خالي په ورځ.  ^۱۵ مالک هغۀ ته ځواب ورکړ او ویې فرمایل: ای ځان ښودونکو! آیا له تاسو څخه هر یو د خالي په ورځ خپل غوایي یا خر له آخوره نه خلاصوﺉ او بهر ته یې د اوبو څکلو لپاره نه وړئ؟  ^۱۶ نو دا ښځه چې د ابراهیم لور ده او شېطان له اتلس کلونو راهیسې تر اوسه تړلې وه، آیا د خالي په ورځ لدې بند څخه آزاده نه کړای شي؟  ^۱۷ او کله چې هغۀ دا خبرې وکړې، نو د هغۀ ټول مخالفین خجالته شول او ټول خلک د هغو لویو کارونو په موخه چې هغۀ کړي ؤ، خوشاله شول. 

د شړشمو د تخم او تومنې مثال

(متی ۱۳: ۳۱-۳۲، مرقس ۴: ۳۰-۳۲، متی ۱۳: ۳۳)

^۱۸ بیا هغۀ وفرمایل: د خدای پاچاهي د څه شي پشان ده او هغې ته د څه شي سره ورته والې ورکړم؟  ^۱۹ هغه د شړشمو د تخم په څېر ده چې یو سړي هغه واخیست، په خپل باغ کې یې وکاره، راشین شو، د ونې پشان لویه شوه او د هوا مرغانو د هغې په څانګو کې ځالې جوړې کړې. ^۲۰ او بیا یې وفرمایل: د خدای پاچاهي د څه شي سره تشبیه کړم؟  ^۲۱ د هغې خمیرې په څېر ده، چې یوې ښځې واخیسته او په درې پیمانو اوړو کې یې ګډه کړه، تر څو ټول اوړه خمیره شول. 

نرۍ لاره

( متی ۷: ۱۳-۱۴، او ۲۱-۲۳)

^۲۲ اورشلیم ته د تللو پر مهال، هغه د لارې په اوږدو کې کلیو او ښارونو ته تللو او خلکو ته یې تعلیم ورکاوه.  ^۲۳ بیا یو تن هغۀ ته وویل: ای مالکه! آیا لږ شمېر خلک به وژغورل شي؟ نو هغوی ته یې وفرمایل:  ^۲۴ کوښښ وکړﺉ چې له تنګې دروازې څخه دننه شئ. ځکه چې تاسو ته وایم: ډېر خلک به د ننوتو په لټه کې وي، خو و به نشي کړای.  ^۲۵ بیا کله چې د کور خاوند را پاڅېږي او دروازه بنده کړي، تاسو به بهر پاتې شئ او دروازه به ټکوﺉ او و به واياست: مالکه! راخلاصه یې کړه، هغه به تاسو ته ځواب درکړي، تاسو نه پېژنم چې د کوم ځای یاست.  ^۲۶ بیا به تاسو وایاست: موږ لتا سره خوړلې او څښلې او تا به زموږ په کوڅو کې تعلیم ورکاوه.  ^۲۷ خو هغه به ووایي: زه درته وایم: تاسو نه پېژنم چې د کوم ځای یاست. ای ټولو بد کارانو! زما څخه لري شئ.  ^۲۸ هلته به ژړا او د غاښونو چېچل وي، کله چې تاسو ابراهیم، اسحاق، یعقوب او ټول انبیاء ‎د خدای په پاچاهۍ کې دننه او ځانونه بهر شړل شوي ووینئ.  ^۲۹ هغوی به له ختیځ او لویدیځ، شمال او سویل څخه راشي او د خدای د پاچاهۍ په مېلمستیا کې به کېني.  ^۳۰ او ګورئ! هلته به ځينې چې وروستي دي، هغوی به لومړي شي او ځينې چې لومړي دي هغوی به وروستي شي. 

د اورشلیم لپاره ژړا

( متی ۲۳: ۳۷-۳۹)

^۳۱ په هماغه وخت کې څو تنه فریسیان راغلل او هغۀ ته یې وویل: لدې ځایه ووځه او دا سیمه پرېږده، ځکه چې هیرودیس غواړي تا ووژني.  ^۳۲ نو هغوی ته یې وفرمایل: لاړ شئ او هغه ګیدړ ته وواياست: دا دی نن او سبا پېریان وباسم، روغتیا ورکوم، او په دریمه ورځ به کمال ته ورسېږم.  ^۳۳ خو نن، سبا او بله ورځ خپل سفر جاري ساتم، ځکه دا ناشونې ده چې نبي له اورشلیم څخه بهر مړ شي.  ^۳۴ ای اورشلیمه! ای اورشلیمه! ای هغه ښاره چې انبیاء وژنې او درلېږل شوي سنګساروې، څو ځلې مې وغوښتل چې ستا بچي د هغې چرګې پشان سره راټول کړم، کومه چې خپل چرګوړي د وزرو لاندې راټولوي، خو تا و نه غوښتل.  ^۳۵ دا دی ستاسو کور تاسو ته وران پرېښودل کېږي او تاسو ته وایم، چې نور به ما و نه وینئ، ترڅو هغه وخت راشي چې ووایاست: مبارک دی هغه څوک چې د مالک خدای په نوم راځي.