د یو رومي افسر ایمان

( متی ۸: ۵ - ۱۳)

^۱ او کله یې چې خپلې ټولې خبرې خلکو ته ورسولې نو کپرناحوم ته لاړ.  ^۲ هلته د یو افسرخادم چې ډېر ورته ګران ؤ، ناروغ او مړینې ته نږدې ؤ  ^۳ کله چې هغه له عیسی څخه خبر شو نو د یهودو څو تنه مشران یې ورولېږل، ترڅو له هغۀ څخه وغواړي چې راشي او د هغۀ خادم ته روغتیا ورکړي  ^۴ هغوی عیسی ته راغلل او په زارۍ سره یې هغۀ ته وویل: هغه د دې احسان وړ دی  ^۵ ځکه چې هغه زموږ له ولس سره مینه لري او یوه کنیسه یې هم موږ ته جوړه کړې ده  ^۶ عیسی له هغوسره لاړ، کله چې د هغۀ کورته نږدی شو، هغه افسرخپل دوستان د عیسی مخې ته ورولېږل او هغۀ ته یې وویل: مالکه! تاسو خپل ځان مه کړوئ، ځکه زه د دې وړ نه یم چې ته زما دبام لاندې راشې  ^۷ لدې کبله مې ځان د دې وړ ونه ګڼلو ترڅو تاته درشم، له هماغه ځایه څه ووایه زما خادم به روغ شي  ^۸ زه پخپله د امر لاندې یم او ترخپل امر لاندې هم سرتیري لرم. کله چې یو ته ووایم: لاړ شه نو ځي او بل ته ووایم چې راشه نو راځي او چې خپل غلام ته ووایم دا کار وکړه هغه یې کوي.  ^۹ کله چې عیسی دا واورېدل، حېران شو او هغې ډلې ته چې ورپسې روان ؤ مخ کړ او ویې فرمایل: تاسو ته وایم: دا ډول پوخ ایمان مې حتی په اسرائیلو کې هم ندی ليدلی ^۱۰ کله چې لېږل شوي کسان کورته راستانه شول، ناروغ خادم یې روغ وموند. 

د کونډې د زوی را ژوندي کول

^۱۱ په سبا ورځ هغه نائین نومې ښار ته لاړ، د هغۀ شاګردان او یوه لویه ډله خلک هم ورسره لاړل.  ^۱۲ او کله چې د ښار دروازې ته نږدې شول نو د یو سړي جنازه یې ولیده چې وړل کېدله، هغه د خپلې مور یو زوی ؤ، هغه ښځه کونډه وه او د ښار ګڼ شمېر خلک له هغې سره روان ؤ.  ^۱۳ کله چې مالک عیسی هغه ولیدله، زړه یې پرې وسوځېد او ورته یې وفرمایل: مه ژاړه.  ^۱۴ بیاهغه را وړاندې شو او پرتابوت یې لاس کېښود، کومو خلکوچې تابوت په اوږو کړی ؤ ودرېدل، بیا هغۀ وفرمایل: ای ځوانه! زه تاته وایم راپورته شه.  ^۱۵ نو هغه مړ ځوان کېناست او په خبرو یې پېل وکړ اوعیسی هغه خپلې مورته وسپاره.  ^۱۶ هغوی ټول وېرې ونیول، د خدای ثنا یې بیانوله چې ویل یې: زموږ په منځ کې لوی نبي راغلی او خدای د خپل قام د کتنې لپاره راغلی دی.  ^۱۷ د هغۀ په هکله دغه خبر په ټوله یهودیه او خواوشا سیمو کې خپور شو. 

تعمید ورکوونکی یحیی عیسی ته پېغام

( متی ۱۱: ۲-۱۹)

^۱۸ بیادیحیی شاګردانودغه ټولې خبرې هغۀ ته ورسولې.  ^۱۹ یحیی خپل دوه تنه شاګردان راوغوښتل، عیسی ته یې ورولېږل او ورته یې ویل: آیا ته هماغه راتلونکی یې که موږ د بل چا انتظار وکړو؟  ^۲۰ کله چې هغه سړي هغۀ ته ورغلل، نو هغوی وویل: تعمید ورکوونکي یحیی موږ تاته رالېږلي یو اوویل یې: آیا ته هماغه راتلونکی یې که موږ د بل چا انتظار وکړو؟  ^۲۱ او په هماغه ساعت کې هغۀ ډېرو خلکوته له ناروغیو څخه روغتیا ورکړه، طاعون او پېریان یې ترې وویستل او ډېرو ړندو ته یې بینایي ورکړه  ^۲۲ بیا هغۀ هغوی ته ځواب ورکړ: لاړ شئ او هغه څه چې مو لیدلي او اورېدلي یحیی ته یې ووایاست، چې څه ډول ړانده بینايي مومي، ګوډان ګرځي، د جزام ناروغان پاکېږي، کاڼه اوري، مړي راژوندي کېږي او بېوزلان ښه زیری اوري.  ^۲۳ او بختور دی هغه څوک چې پر ما شک ونکړي.  ^۲۴ کله چې د یحیی قاصدان لاړل نو عیسی د یحیی په هکله له خلکو سره خبرې پېل کړې او ویې فرمایل: د څه شي د لیدلو لپاره دښتې ته تللي وئ؟ آیا د هغې لوښې لپاره چې د باد په وسیله خوځېږي؟  ^۲۵ د څه شي د لیدلو لپاره بهر تللي وئ؟ د هغه سړي لپاره چې ورېښمینې جامې یې اغوستې وې؟ بېشکه هغه خلک چې ښکلې جامې اغوندي، د عیش اوعشرت ژوند تېروي، هغوی په ماڼیو کې اوسېږي.  ^۲۶ خو دڅه شي د لیدلو لپاره بهر تللي وئ؟ د یو نبي؟ هوکی! زه تاسو ته وایم چې د یو نبي څخه هم لوی.  ^۲۷ دا هغه سړی دی چې د هغۀ په هکله لیکل شوي دي: زه لتا څخه وړاندې خپل پېغمبر لېږم ترڅو تاته لار جوړه کړي.  ^۲۸ زه تاسو ته وایم: چې له یحیی څخه پرته بل څوک لوی ندی زېږول شوی خو بیا هم د خدای په پاچاهۍ کې تر ټولو کوچنی له هغۀ څخه لوی دی.  ^۲۹ کله چې ټولو خلکو د هغۀ خبرې واوریدې، حتی مالیه ټولوونکو هم د خدای رېښتینولي بیان کړه، ځکه چې د یحیی په لاس یې تعمید اخیستی ؤ.  ^۳۰ خو فریسیانو او د شرعې عالمانو د ځان لپاره د خدای غوښتنه رد کړې وه ځکه چې د هغۀ په لاس یی د تعمید غسل نه ؤ اخیستی.  ^۳۱ او د دې نسل خلک له څه شي سره مقایسه کړم او هغوی د څه شي پشان دي؟  ^۳۲ هغوی د هغو ماشومانو په څېر دي چې په بازارونو کې ناست وي، یو بل ته نارې وهي او وایي: موږ تاسو ته شپېلۍ ووهله او تاسو نڅا ونکړه او موږ تاسو ته ویر وکړ خو تاسو ژړا ونکړه.  ^۳۳ ځکه چې تعمید ورکوونکی یحیی راغی، نه یې ډوډۍ خوړه او نه یې شراب څښل، خو تاسو وایاست چې هغه پېری لري.  ^۳۴ اوس چې د انسان زوی راغلی، کوم چې خوراک او څښاک کوي، خو تاسو وایاست چې وګورﺉ یو ګیډور، شرابي، د مالیه ټولونکو او ګنهګارانو ملګری دی.  ^۳۵ خو د حکمت رېښتینولي، د هغۀ د بچېانو په وسیله چې هغه یې منلی، ثابته شوې ده. 

ګنهګاره ښځه بخښل کېږي

^۳۶ یوفریسي له هغۀ څخه وغوښتل ترڅو له هغۀ سره ډوډۍ وخوري.هغه دفریسي کورته ورغی او دهغۀ دسترخوان ته کېناست  ^۳۷ بیا کله چې د هغه ښار یوه ګنهګاره ښځه خبره شوه، چې عیسی د فریسي په کور کې دسترخوان ته ناست دی، نو د مرمرو په عطردان کي یي یو بوتل عطر راوړل  ^۳۸ او د هغۀ شا ته د پښو ترڅنګ په ژړا ودرېدله او د هغۀ پښې د هغې په اوښکو لمدې شوي چې، هغې پخپلو اوښکو د هغۀ پښې په خپلو وېښتانو وچې کړې، بیا یې د هغۀ پښې ښکل کړې او هغه عطریې پرې واچول.  ^۳۹ او کله چې هغه فریسي چې هغۀ ته یې بلنه ورکړې وه دا هرڅه ولیدل نو له ځانه سره یې وویل: که چېرې دا نبي وای نو خامخا به پوه شوی وای چې دا څوک اوڅه ډول ښځه ده چې ده ته لاس وروړي، ځکه داخو یوه ګنهګاره ده  ^۴۰ عیسی ځواب ورکړ او هغۀ ته یې وفرمایل: شمعونه! غواړم تاته څه ووایم. هغۀ ورته وویل: استاذه! وفرمایه، نو ویې فرمایل:  ^۴۱ یو تن پور ورکوونکي دوه پوروړي لرل چې یو یې پنځه سوه دیناره او بل یې ترې پنځوس دیناره پوروړی ؤ.  ^۴۲ هغوی هېڅ هم نلرل چې خپل پور ادا کړي، نو هغه دواړه یې وبخښل. ووایه: لدې دواړو به کوم یو له هغۀ سره ډېره مینه وکړي؟  ^۴۳ شمعون ځواب ورکړ، زما په آند هغه چې ډېر پور وروبخښل شو. نو هغۀ ورته وفرمایل: تا سم قضاوت وکړ.  ^۴۴ بیا یې هغې ښځې ته مخ کړ او شمعون ته یې وفرمایل: دا ښځه وینې؟ کله چې ستا کور ته راننوتم تا زما د پښو د وینځلو لپاره اوبه رانوړې، خو هغې پخپلو اوښکو زما پښې ووینځلې او پخپلو وېښتانو یې وچې کړې.  ^۴۵ تا زه ښکل نکړم، خوله کومه وخته چې زه دلته راننوتی یم هغې زما د پښو له ښکلولو څخه سر نده پورته کړې  ^۴۶ تا زماسرپه تیلو غوړ نکړخو هغې زما په پښو عطر واچول.  ^۴۷ لدې امله زه تاته وایم، دهغې ګناهونه چې ډېر ؤ، ټول وبخښل شول، ځکه چې هغې ډېره مینه وکړه خو چا ته چې لږه بخښنه شوې وي، لږه مینه ښائي.  ^۴۸ بیا یې هغې ښځې ته وفرمایل: ستا ګناهونه وبخښل شول.  ^۴۹ هغه کسان چې له هغۀ سره پر دسترخوان ناست ؤ له ځانو سره یې وویل: دا څوک دی چې حتی ګناهونه هم بخښي.  ^۵۰ بیا یې هغې ښځې ته وفرمایل: ته خپل ایمان وژغورلې، په سلامتۍ لاړه شه.