د عیسی د وژلو دسیسه

( متی ۲۶: ۱-۵، لوقا ۲۲: ۱-۲، یوحنا ۱۱: ۴۵-۵۳)

^۱ د فسحې او پتېرې ډوډۍ اختر ته دوه ورځې پاتې وې، لوی مذهبي مشرانو او د شرعې عالمانو داسې پلمه لټوله ترڅو عیسی ونیسي او ویې وژني  ^۲ خو هغوی ویل چې دا کار باید د اختر په ورځو کې ونه کړي، ترڅو په قام کې بلوا جوړه نه شي. 

په عطرو سره د عیسی غوړول

( متی ۲۶: ۶-۱۳، یوحنا ۱۲: ۱-۸)

^۳ او کله چې هغه په بیت‌عنیا کې د شمعون جذامي په کور کې ډوډۍ ته ناست ؤ، نو یوه ښځه راغله او ډېر قیمتي خالص عطر یې د مرمرو په عطر دانۍ کې راوړل، د بوتل سر یې مات کړ او د هغۀ په سر یې واچول.  ^۴ نو ځینو یو له بل سره په غصه کې وویل: ولې دا عطر ضایع شول؟  ^۵ ځکه کېدای شول چې دغه عطر له دریو سوو دینارو څخه په لوړه بیه خرڅ شوی او پر بېوزلانو ویشل شوي وای او هغې ته یې سپورې ستغې وویلې.  ^۶ خو عیسی هغوی ته وفرمایل: هغه پرېږدئ! ولې هغه کړوئ؟ هغې زما سره ښه کار کړی  ^۷ ځکه چې بېوزلان تل لتاسو سره دي او هر وخت کولای شئ چې له هغوی سره نیکي وکړئ، خو زه به د تل لپاره تاسو سره نه یم  ^۸ هغې چې څه کولی شول، هغه یې وکړل او زما بدن یې ترښخولو وړاندې په عطر وغوړ کړ.  ^۹ زه تاسو ته په یقین سره وایم چې د نړۍ په هرځای کې د دې انجیل وعظ کېږي، نو څه چې دې ښځې وکړل دا به د هغې د یادونې په موخه یادېږي. 

د یهودا خیانت

( متی ۲۶: ۱۴-۱۶، لوقا ۲۲: ۳-۶)

^۱۰ نو یهودا اسخریوطي چې یو له دولسو شاګردانو څخه ؤ، لوی مذهبي مشرانو ته ورغی ترڅو عیسی ورته تسلیم کړي.  ^۱۱ هغوی د هغۀ خبره واورېده او خوشاله شول او له هغۀ سره یې وعده وکړه چې پیسې به ورکړي او د هغه وخت نه وروسته هغه د جاسوسۍ د فرصت په لټه کې ؤ ترڅو عیسی هغوی ته په لاس ورکړي. 

د فسحې تیاري

( متی ۲۶: ۱۷-۲۵، لوقا ۲۲: ۷-۱۴، یوحنا ۱۳: ۲۱-۳۰)

^۱۲ او د پتېرې د اختر په لومړۍ ورځ چې په هغې کې یې د فسحي د ګډوري قرباني کوله، شاګردانو یې هغۀ ته وویل: کوم ځای ته غواړې چې موږ لاړ شو او ستا لپاره د فسحې خوراک تیار کړو؟  ^۱۳ نو خپل دوه تنه شاګردان یې ولېږل او هغوی ته یې وفرمایل: ښار ته لاړ شئ، هلته به یو سړی د اوبو له منګي سره تاسو سره مخامخ شي، نو هغۀ پسې لاړ شئ  ^۱۴ او هر چېرته چې ننوځي نو د هغه کور څښتن ته ووایئ: استاذ وايي چې مېلمستون چېرې دی، ترڅو هلته له خپلو شاګردانو سره فسحه وخورم؟  ^۱۵ نو هغه به تاسو ته یوه لویه او فرش شوې بالاخانه دروښايي او هلته زموږ لپاره تیاری ونیسئ  ^۱۶ نو شاګردان لاړل او لکه څنګه چې ورته هغۀ ویلي وو، هرڅه یې هماغه شان وموندل او فسحه یې تیاره کړه.  ^۱۷ بیا عیسی ماښام له هغو دولسو سره راغی  ^۱۸ او کله چې ډوډۍ ته کېناستل نو عیسی وفرمایل: په یقین سره تاسو ته وایم، یو لتاسوڅخه چې زما سره ډوډۍ ته ناست دی، له ما سره به خيانت وکړي.  ^۱۹ هغوی ډېر غمژن شول او یو یو هغۀ ته ویل: آیا زه هغه یم؟  ^۲۰ نو هغۀ ورته وفرمایل: یو لتاسو دولسو څخه چې زما سره په کاسه کې لاس ښکته کوي.  ^۲۱ دا سمه ده چې د انسان زوی به هماغه شان مړشي لکه څرنګه چې دهغۀ په هکله لیکل شوي دي،خو افسوس دهغه چا پرحال چې د انسان د زوی جاسوسي کوي، د هغۀ لپاره دا غوره وه چې هېڅ پېدا شوی نه وای. 

د مالک آخري ماښامنی

(متی ۲۶: ۲۶-۳۰، لوقا ۲۲: ۱۴ - ۲۰، لومړۍ قرنتیان ۱۱ : ۲۳- ۲۵)

^۲۲ او دخوراک په وخت عیسی ډوډۍ راواخیسته، شُکریې وویست، ماته یې کړه، هغوی ته یې ورکړه او ويې فرمایل: واخلئ او وخورئ، دا زما بدن دی.  ^۲۳ یوه پیاله یې راواخیسته، شکر يې وویست، هغوی ته یې ورکړه او هغو ټولو ورڅخه وڅښل  ^۲۴ او هغوی ته يې وفرمایل: دا زما د تړون وینه ده چې د ډېرو لپاره توئېږي  ^۲۵ او په یقین سره تاسو ته وایم چې، له نن وروسته به د انګورو اوبه ونه څښم، ترڅو چې د خدای په پاچاهۍ کې یې تازه ونه څښم. 

د پطروس د انکار پېش بینی

( متی ۲۶: ۳۱-۳۵، لوقا ۲۲: ۳۱-۳۴، یوحنا ۱۳: ۳۶-۳۸)

^۲۶ او بیا هغوی د یوې مذهبي سندرې له ویلو وروسته د زیتون غرۀ ته لاړل.  ^۲۷ نو عیسی هغوی ته وفرمایل: نن شپه به تاسو ټول ما پرېږدئ، ځکه لیکل شوي چې: شپونکی به ووهم او پسونه به یې خواره واره شي  ^۲۸ خو له راپورته کېدو وروسته به لتاسو وړاندې ګلیل ته لاړ شم.  ^۲۹ پطروس هغۀ ته وویل: که چېرې ټول تا پرېږدي، خو زه به هېڅکله تا پرېنږدم.  ^۳۰ عیسی هغۀ ته وفرمایل: په یقین سره تاته وایم چې همدا نن شپه مخکې له دې چې چرګ دوه ځلې بانګ وکړي، ته به درې ځلې زما څخه انکار وکړې.  ^۳۱ خو هغۀ په کلکه وویل: که چېرې زه لتاسره مړ هم شم، خو هېڅکله به درنه انکار ونکړم او نورو هم همدغه شان وویل. 

په ګیتسمني کې دعا کول

( متی۲۶: ۳۶-۴۶، لوقا ۲۲: ۳۹-۴۶)

^۳۲ اوکله چې هغوی ګیتسمني نومي ځای ته ورسېدل نو شاګردانو ته یې وفرمایل: دلته کېنئ ترڅو دعا وکړم  ^۳۳ پطروس، یعقوب او یوحنا یې له ځان سره بوتلل، اندېښمن او زړه تنګی ؤ  ^۳۴ او هغوی ته یې وفرمایل: زړه مې له غمه چوي او مرګ ته نږدې یم، دلته پاتې شئ او ویښ اوسئ.  ^۳۵ بیا لږ وړاندې لاړ، پرمځکه ولوېد او دعا یې وکړه چې، که کېدای شي دا ساعت له هغۀ څخه ليرې شي  ^۳۶ او بیا یې وفرمایل: یا ابا، یانې ای پلاره! هر څه تاته شوني دي، دا پیاله زما څخه لرې کړه، لېکن زما په خوښه نه، بلکې ستا په اراده.  ^۳۷ او کله چې بېرته راغی، هغوی یې ویده ولیدل، نو پطروس ته یې وفرمایل: ای شمعونه! آیا ته ویده یې؟ آیا یو ساعت ویښ پاتي کېدای نشوئ؟  ^۳۸ ویښ اوسئ او دعا وکړئ، ترڅو په آزمېښت کې ونه لوېږئ، روح تیار دی خو بدن کمزوری.  ^۳۹ هغه یوځل بیا لاړ او هماغه شان دعا یې وکړه  ^۴۰ او کله چې بیا راستون شو نو هغوی یې ویده وموندل، ځکه چې سترګې یې درندې شوې وې او نه پوهېدل چې هغۀ ته څه ځواب ورکړي.  ^۴۱ او کله چې بیا دریم ځلي راغی نو هغوی ته یې وفرمایل: اوس هم لا ویده یاست او آرام کوئ؟ بس دی، وخت راورسېد، دا دی د انسان زوی د ګنهګارانو لاسونو ته سپارل کېږي  ^۴۲ راپورته شئ چې ځو! زما سپارونکی نږدې راغلی دی. 

د عیسی نیول کېدل

( متی ۲۶: ۴۷-۵۶، لوقا ۲۲: ۴۷-۵۳، یوحنا ۱۸: ۳-۱۲)

^۴۳ هغۀ لا خبرې کولې چې سمدلاسه یهودا، چې یو له دولسو شاګردانو څخه ؤ راورسېد او له هغۀ سره یوه غټه ډله خلک وو، چې تورې او کوتکي ورسره ؤ او دغه خلک د لوی مذهبي مشرانو، د شرعې د عالمانو او ولسي مشرانو لخوا رالېږل شوي وو.  ^۴۴ او د هغۀ سپارونکي هغوی ته نخښه ورکړې وه چې: څوک مې ښکل کړ نو هماغه دی، ویې نیسئ او په کلکې پاملرنې سره یې بوځئ.  ^۴۵ نو هماغه شېبه هغۀ ته ورنږدې شو او ورته یې وویل: ای استاذه! او هغه یې ښکل کړ.  ^۴۶ هغوی ناڅاپه پرهغۀ یرغل وکړ، ویې نیوه.  ^۴۷ په ولاړو کسانو کې یو تن خپله توره راوویسته، د مذهبي مشرانو د مشر پرخادم یې ګذار وکړ او د هغۀ غوږ یې پرې کړ.  ^۴۸ بیا عیسی هغوی ته مخ کړ او ويې ویل: آیا تاسو ما غل ګڼئ چې له تورو او کوتکو سره زما د نیولو لپاره راوتلي یاست؟  ^۴۹ هره ورځ مې په سپېڅلي کور کې تاسو ته تعلیم درکاوه، خو تاسو ونه نیولم، دا خو اړینه ده ترڅو د کتابونو لېکنې بشپړې شي.  ^۵۰ نو ټولو شاګردانو هغه پرېښود او وتښتېدل  ^۵۱ او یو ځوان چې فقط د کتان یوه ټوټه یې له ځانه راتاوه کړې وه، د هغۀ پسې روان شو، خو هغوی، هغه ونیو  ^۵۲ نو هغۀ د کتان هغه ټوټه هم پرېښوده او بربنډ وتښتېد. 

د جرګې پر وړاندې د عیسی محاکمه

( متی ۲۶: ۵۷-۶۸، لوقا ۲۲: ۵۴-۵۵ او ۶۳-۷۱، یوحنا ۱۸ : ۱۳- ۱۴ او ۱۹-۲۴)

^۵۳ او عیسی یې د مذهبي مشرانو د مشر کور ته بوتلو، لوی مذهبي مشران، د شرعې عالمان او ولسي مشران پرهغۀ راټول شول.  ^۵۴ پطروس د هغۀ پسې لرې روان ؤ، تر دې چې د مذهبي مشرانو د مشر کور ته ورسېد، له خادمانو سره کېناست او اور ته یې ځان توداوه.  ^۵۵ لوی مذهبي مشران او د جرګې ټول غړي په دې لټه کې وو، ترڅو د عیسی پرخلاف ګواهي پېدا کړي او هغه ووژني، خو هېڅ یې هم ونه موندل.  ^۵۶ ډېرو د هغۀ پرخلاف د دروغو ګواهي ورکوله، خو د هغوی ګواهي یو له بل سره موافقه نه وه.  ^۵۷ بیا ځینې راپاڅېدل، په دروغو یې ګواهي ورکوله او ویل یې:  ^۵۸ موږ د ده له خُلې څخه اورېدلي چې ویل يې: زه به دغه سپېڅلی کور چې د انسانانو په لاس جوړ شوی ورانوم او په درې ورځو کې به یو بل جوړوم، چې په لاسونو جوړ شوی نه وي.  ^۵۹ خو پدې هکله هم د هغوی ګواهي موافقه نه وه.  ^۶۰ بیا د مذهبي مشرانو مشر د هغوی له منځه راپاڅېد او عیسی ته یې وویل: ولې ځواب نه ورکوې؟ او دا څه خبرې دي چې دوی ستا په هکله دهغې ګواهي ورکوي؟  ^۶۱ خو هغه غلی پاتې شو او هېڅ ځواب یې ورنه کړ، نو د مذهبي مشرانو مشر بیا له هغۀ څخه پوښتنه وکړه ويې ویل: آیا ته د مبارک خدای زوی یې؟  ^۶۲ عیسی وفرمایل: زه یم او تاسو به د انسان زوی ووینئ چې د لوی خدای ښي لاس ته به ناست او دآسمان په وریځو کې به راروان وي.  ^۶۳ بیا د مذهبي مشرانو مشر خپل ګریوان څیرې کړ او ویې ویل: نور نو ګواهانو ته څه اړتیا لرو؟  ^۶۴ تاسو د هغۀ کُفر واورېد، اوس په څه کې مصلحت ګڼئ؟ نو ټولو پر هغۀ حکم وکړ چې د وژلو لایق دی.  ^۶۵ ځینو په هغۀ لاړې توکولې، د هغۀ مخ یې پټ کړ، په سوکونو یې واهه او ورته یې ویل: نبوت وکړه او عسکرو هم هغه په څپېړو وواهه. 

د پطروس انکار

( متی ۲۶: ۶۹-۷۵، لوقا ۲۲: ۵۶-۶۲، یوحنا ۱۸: ۱۵-۱۸ او ۲۵- ۲۷)

^۶۶ په دې وخت کې لا پطروس په لاندیني انګړ کې ؤ چې د مذهبي مشرانو د مشر یوه وینځه راغله.  ^۶۷ او پطروس یې ولید چې ځان تودوي، نو هغۀ ته یې وکتل او ويې ویل: ته خو هم له ناصري عیسی سره وې  ^۶۸ نو هغۀ انکار وکړ او ويې ویل: ماته مالومات نشته او زه نپوهېږم چې ته څه وایې! او کله چې د کور انګړ ته بهر شو نو چرګ بانګ وکړ  ^۶۹ او یو ځل بیا هغې وینځې هغه ولید او خلکو ته یې وویل: دا سړی هم له هغوی څخه یو دی.  ^۷۰ هغۀ بیا انکار وکړ او لږ څه وروسته ولاړو خلکو بیا پطروس ته وویل چې، بې له شکه ته هم له هغوی څخه یې، ځکه چې ته ګلیلي یې.  ^۷۱ خو هغۀ ښېرې پېل کړې او په قسم سره يې وویل چې: کوم سړی تاسو یادوئ زه هغه نه پېژنم  ^۷۲ او ناڅاپه چرګ یو ځل بیا بانګ وکړ، نو پطروس ته د عیسی هغه وېنا وریاده شوه چې ورته یې فرمایلي وو: وړاندې له دې چې چرګ دوه ځلې بانګ وکړي، نو ته به درې ځلې زما څخه انکار وکړې او کله چې دا وریاد شول نو ډېر سخت یې وژړل.