وچ لاسي سړي ته روغتیا ورکول

( متی ۱۲: ۹-۱۴، لوقا ۶: ۶-۱۱)

^۱ هغه بیا کنیسې ته ننوت او هلته یو سړی ؤ چې لاس یې وچ شوی ؤ.  ^۲ نو هغوی عیسی ته کتل چې آیا هغه به د خالي په ورځ هغۀ ته روغتیا ورکړي که نه، ځکه هغوی غوښتل پر هغۀ تور ولګوي.  ^۳ نو هغۀ وچ لاسي سړي ته وفرمایل: راشه او په منځ کې ودرېږه!  ^۴ او هغوی ته يې وفرمایل: د خالي په ورځ کوم کار روا دی، نیکي کول که بدي، د چا ژغورل یا وژل؟ نو هغوی غلي پاتې شول.  ^۵ او هغۀ ګېر چاپېره هغوی ته په غصې سره وکتل ځکه چې زړونه یې سخت وو اوهغه سړي ته یې وفرمایل: خپل لاس را اوږد کړه، هغۀخپل لاس وراوږد کړ او لاس يې روغ شو.  ^۶ فریسیان سمدلاسه بهر لاړل او له هېرودیانو سره يې د هغۀ په هکله مشوره وکړه چې څنګه یې ووژني.  ^۷ بیا عیسی له خپلو شاګردانو سره د بحیرې غاړې ته لاړ او له ګلیل او یهودیې څخه ګڼ شمېر خلک دهغۀ پسې روان وو.  ^۸ او کله چې د یهودیې، اورشلیم، ادومیې، د اردن د بلې غاړې او د صور او صیدون د شاوخوا ډېروخلکو دهغۀ دکارونو په هکله واورېدل، نو هغۀ ته راغلل.  ^۹ او خپلو شاګردانو ته يې وفرمایل چې، ماته یوه کشتۍ تیاره کړئ، ترڅو د خلکو د ګڼې ګوڼې له ټېل څخه لرې واوسم.  ^۱۰ ځکه هغۀ ډېروته روغتیا ورکوله، حتی چې په چا به ډېر درد ؤ، نو دهغۀ لور ته به يې زور واهه، ترڅو هغه لمس کړي.  ^۱۱ او کله به چې پېریانو هغه ولید، نو د هغۀ په مخکې به په خاورو کې ولوېدل او چیغې به یې وهلی چې، ته د خدای زوی یې.  ^۱۲ او هغوی ته يې په کلکه امر وکړ چې، مابه خلکو ته نه ښکاره کوئ. 

د دولسو شاګردانو ټاکل

( متی ۱۰: ۱-۴، لوقا ۶ : ۱۲-۱۶)

^۱۳ بیا د یو غرۀ سر ته لاړ او څوک یې چې غوښتل ځان ته یې وبلل او هغوی ورغلل.  ^۱۴ هغۀ دولس تنه وټاکل او د رسولانو نوم یې ورکړ چې له هغۀ سره به اوسېږي او د وعظ لپاره به ولېږل شي.  ^۱۵ او د پېریانو د ویستلو واک هم ولري.  ^۱۶ نو دولس تنه یې وټاکل او په شمعون یې پطروس نوم کېښود،  ^۱۷ بیا د زبدي زامن یعقوب او د هغۀ ورور یوحنا راغلل او هغوی يې د تندر زامن ونومول،  ^۱۸ اندریاس، فیلیپوس، برتولما، متی، توما، د حلفي زوی یعقوب، تدي او شمعون ننګیالی  ^۱۹ او یهودا اسخریوطي کوم چې د هغۀ جاسوسي وکړه. 

مذهبي مشران پر عیسی تور پورې کوي

( متی ۱۲ : ۲۲-۳۲، لوقا ۱۱: ۱۴-۲۳ او ۱۲: ۱۰)

^۲۰ بیا هغه کور ته ننوت او یوځل بیا پرې دومره خلک راټول شول چې هغوی د ډوډۍ خوړلو وخت ونه موند.  ^۲۱ او کله چې د هغۀ خپلوانو دا خبرې واورېدې، نو بهر لاړل ترڅو هغه راپورته کړي، ځکه ځینو ویل چې هغه بېخوده شوی دی.  ^۲۲ او د شرعې هغه عالمان چې له اورشلیم څخه راغلي وو، ويې ویل چې: هغه بعلزبول لري او د پېریانو د مشر په مرسته پېریان باسي.  ^۲۳ نو هغوی يې ځان ته راوغوښتل او په مثالونو کي یي ورته وفرمایل: څنګه کېدای شي چې یو شېطان بل شېطان وباسي؟  ^۲۴ که چېرې یوه پاچاهي په خپل منځ کې وویشل شي، نو هغه پاچاهي پاتې کېدای نه شي.  ^۲۵ او کله چې یو کور پر خپل ضد وویشل شي، نو هغه کور پایداره پاتې کېدای نه شي.  ^۲۶ او که چېرې شېطان له خپل ځان سره مقاومت وکړي او وویشل شي، نو هغه نه شي کولای چې کلک پاتې شي بلکې هلاکېږي.  ^۲۷ او هېڅوک نه شي کولای ترڅو د زورور سړي کور ته ننوځي او د هغۀ اسباب لوټ کړي، خو دا چې لومړی هغه وتړي او له هغې وروسته د هغۀ کور لوټ کړي.  ^۲۸ او په یقین سره تاسو ته وایم چې، د انسان ټول ګناهونه او هر ډول کُفر يې چې ویلی وي بخښل کېږي،  ^۲۹ خوڅوک چې د سپېڅلی روح په مقابل کې کُفر ووايي، نو تر ابده به ونه بخښل شي، بلکې هغه به د تلپاتې ګناه مجرم وي.  ^۳۰ هغۀ ځکه دا وفرمایل چې، هغوی ویل، هغه پېریانی دی. 

عیسی خپله کورنۍ معرفې کوي

( متی ۱۲: ۲۶-۵۰، لوقا ۸: ۱۹-۲۱)

^۳۱ بیا د هغۀ مور او وروڼه راغلل، بهر ودرېدل او پېغام یې واستاوه ترڅو هغه راوغواړي.  ^۳۲ نو کوم خلک چې له هغۀ څخه ګېرچاپېره ناست وو هغۀ ته یې وویل: ستا مور او وروڼه بهر ولاړ دي او تا لټوي.  ^۳۳ نوهغوی ته يې په ځواب کې وفرمایل: زما مور او زما وروڼه څوک دي؟  ^۳۴ او هغو ګېرچاپېره ناستو خلکو ته یې وکتل او ويې فرمایل: دوی زما مور او وروڼه دي.  ^۳۵ ځکه هرڅوک چې دخدای رضا غواړي، هماغه زما ورور، خور او مور ده.