د هدېرې لېوني ته روغتیا ورکول

( متی ۸ : ۲۸-۳۴، لوقا ۸: ۲۶-۳۹ )

^۱ او بیا د بحیرې بلې غاړې ته د جدریانو سیمې ته راغلل  ^۲ او کله چې هغه له کشتۍ څخه راکوز شو، نو سمدلاسه یو سړی چې پېریان یې درلودل له هدېرې څخه راووت ترڅوله هغۀ سره وویني.  ^۳ هغه په هدېره کې اوسېده او هېچا نشو کولای چې حتی په زنځیرونو کې یې هم تړلی وساتي  ^۴ ځکه چې ډېر ځلې یې په زولنو او زنځیرونو تړلی ؤ، خوهغۀ زنځیرونه شلولي او زولنې یې ماتې کړې وې او هغه دومره قوي ؤ چې هېچا نشو کولای ترڅو هغه را ایسار کړي  ^۵ هغه به شپه او ورځ د غرونو او قبرونو په شاوخوا کې چیغې وهلې او ځان به يې په تیږو ټپي کاوه.  ^۶ او کله یې چې د لرې نه عیسی ولید، نو ورمنډه یې کړه او په پښو ورپریوت.  ^۷ په لوړ غږ یې چیغه کړه او ويې ویل: ای عیسی، د لوی خدای زویه! زما سره څه کار لرې؟ د خدای پخاطرما مه په عذابوه  ^۸ ځکه هغۀ پېریانو ته وفرمایل چې له دې سړي څخه راووځئ  ^۹ او بیا یې له هغۀ څخه پوښتنه وکړه: نوم دې څه دی؟ هغۀ ورته وویل: زما نوم لښکر دی، ځکه چې ډېر یو.  ^۱۰ نو هغۀ ته یې ډېره زاري وکړه چې هغوی له هغې سیمې څخه بهر ونه شړي.  ^۱۱ او هغه وخت د خوګانو یوه غټه رمه د غونډۍ د پاسه څرېدله  ^۱۲ نو پېریانو له هغۀ څخه غوښتنه وکړه ويې ویل: موږ خوګانو ته ولېږه ترڅو په هغوی کې ننوځو  ^۱۳ هغۀ، هغوی ته اجازه ورکړه، نو هغه پېریان راووتل او په خوګانو کې ننوتل او هغه رمه چې نږدې دوه زره خوګان وو، د غونډۍ له پېچومي څخه په ذغاسته ښکته بحیرې ته ولوېدله او ډوبه شوله.  ^۱۴ خوګ څرونکي وتښتېدل او دا خبر یې د ښار په خواوشا کې خپور کړ او خلک د دې پېښې د لیدلو لپاره بهر راووتل  ^۱۵ او کله چې عیسی ته راغلل نو هغه سړی یې ولید چې د پېریانو لښکر نیولی ؤ، هغۀ جامې اغوستې وې او روغ شوی ؤ، نو سختې وېرې واخیستل  ^۱۶ او هغوی چې دا هرڅه لیدلي وو، نو د پېریاني سړي او خوګانو له کیسې یې ټول خبرکړل.  ^۱۷ او له هغۀ څخه یې وغوښتل چې د هغوی له سیمې څخه ووځي  ^۱۸ او کله چې عیسی په کشتۍ کې سپور شو، نو هغۀ پېریاني سړي غوښتل چې له هغۀ سره لاړشي  ^۱۹ خو هغۀ اجازه ورنه کړه او ورته یې وفرمایل: خپل کور او ملګرو ته ورشه او څه چې خدای له تا سره وکړل له هغې څخه یې خبرکړه او دا چې خداى څه ډول پرتا رحم وکړ.  ^۲۰ نو هغه سړی لاړ او په دیکاپولس کې یې دهغه څه په هکله خبرې وکړې چې عیسی له هغۀ سره کړي وو او ټول خلک حېران شول. 

یایروس د لور ژوندي کول

( متی ۹: ۱۸-۲۶، ۸ : ۴۰-۵۶)

^۲۱ او کله چې عیسی په کشتۍ کې بلې غاړې ته پورېوت، نو هغه لا د بحیرې په غاړه ؤ چې ډېرخلک ترې راتاو شول.  ^۲۲ نو د یایروس په نامه د کنیسې له مشرانو څخه یو تن راغی او کله يې چې عیسی ولید نو د هغۀ پرپښو پرېوت  ^۲۳ له هغۀ څخه يې غوښتنه وکړه او ويې ویل: زما لور مرګي حال پرته ده، راشه لاس پرې کېږده، روغه یې کړه او ژوند یې وژغوره.  ^۲۴ نو هغه له هغوی سره لاړ، ډېرخلک دهغۀ پسې وو او پرهغۀ به يې ټیل کاوه.  ^۲۵ په هغوی کې یوه ښځه هم وه چې له دولسو کلونو راهیسې د وینې بهېدنې په ناروغۍ اخته وه.  ^۲۶ هغې د ډېرو طبیبانو کړاو لیدلی ؤ او خپله ټوله شتمني يې په ځان مصرف کړې وه خو روغه شوې نه وه او تکلیف یې نورهم زیاتېده.  ^۲۷ هغې دعیسی په هکله اورېدلي وو، نو هغه په ګڼه ګوڼه کې د شا لخوا راغله او د هغۀ جامې یې لمس کړې  ^۲۸ ځکه هغې له ځان سره ویلي وو چې که چېرې د هغۀ جامې هم لمس کړم نو زه به روغه شم.  ^۲۹ هماغه شېبه د هغې وینه ودرېدله او په ځان پوهه شوه چې له هغې بلاڅخه خلاصه شوه.  ^۳۰ عیسی هماغه شېبه په ځان پوه شوچې یوځواک ترې ووت، نوهغې ډلې ته يې مخ راوګرځاوه او ويې فرمایل: زما جامې چا لمس کړې.  ^۳۱ نو شاګردانو يې هغۀ ته وویل: ته ګورې چې خلکو درباندې بیروبار جوړ کړی، خو بیا هم وايې چې زه چا لمس کړم؟  ^۳۲ خو هغۀ ګېرچاپېره کتل ترڅو هغه ښځه وویني کومې چې دا کار کړی ؤ.  ^۳۳ خو هغه ښځه چې پوهه شوی وه روغتیا يې موندلې، پداسې حال کې چې له وېرې رپېدله هغۀ ته راغله، د هغۀ په وړاندې په ګونډو شوه او ټول حقیقت يې بیان کړ.  ^۳۴ نو هغې ته يې وفرمایل: ای لورې! ته خپل ایمان روغه کړې، په سلامتۍ سره لاړه شه او د تل لپاره له دې بلا څخه خلاصه اوسه.  ^۳۵ هغۀ لا دا خبرې کولې چې د کنیسې د مشر له کوره ځینې راغلل او ويې ویل: لور دې مړه شوه، نور د څه لپاره استاذ ته زحمت ورکوې؟  ^۳۶ کله چې عیسی د هغوی خبره واورېدله، نو دکنیسې مشر ته یې وفرمایل: مه وېرېږه، فقط ایمان ولره  ^۳۷ او له پطروس، یعقوب او د یعقوب د ورور یوحنا پرته یې بل هېچا ته اجازه ورنه کړه ترڅو له هغۀ سره لاړ شي.  ^۳۸ او کله چې د کنیسې د مشر کور ته ورسېد، نو یوه غمژنه ډله يې ولیدله چې سخت ویر او ماتم يې کاوه.  ^۳۹ نو دننه لاړ او هغوی ته یې وفرمایل: ولی ویر او ژړا کوئ؟ انجلۍ مړه نه بلکې ویده ده.  ^۴۰ هغوی د هغۀ پورې خندا وکړه خو هغۀ، هغوی ټول بهر ولېږل، د انجلۍ مور پلار او خپل ملګري یې له ځان سره واخیستل او چېرې چې انجلۍ ویده وه هلته ننوت  ^۴۱ د انجلۍ لاس یې ونیو او ورته یې وفرمایل: تلیتا قامي! چې مانا یې ده: ای لورې، راپورته شه!  ^۴۲ هماغه شېبه انجلۍ راپورته او روانه شوه، هغه دولس کلنه وه او هغه خلک ډېرسخت حېران شول  ^۴۳ او هغوی ته يې په کلکه وفرمایل چې له دې کاره څوک خبرنکړي او ويې ویل چې هغې ته د خوراک لپاره څه ورکړي.