د خدای حکمونه او انساني رواجونه

( متی ۱۵: ۱-۹)

^۱ بیا هغه فریسیان او د شرعې عالمان چې له اورشلیم څخه راغلي وو له هغۀ څخه راتاو شول  ^۲ ځکه د هغۀ ځینې شاګردان يې لیدلي وو چې په ناوینځلو لاسونو ډوډۍ خوري  ^۳ ځکه چې فریسیان او ټول یهودیان د خپلو مشرانو د رواج کلک پابند دي او ترڅو چې لاسونه سم ونه وینځي نو ډوډۍ نه خوري.  ^۴ او کله به چې له بازار څخه راغلل، نو ترڅو به یې چې ځانونه ونه وینځل، ډوډۍ یې نه خوړله او داسې نور ډېر رواجونه لکه د پیالو، دېګونو او مِسي کاسو وینځل.  ^۵ نو فریسیانو او د شرعې عالمانو له هغۀ څخه پوښتنه وکړه چې: ولې ستا شاګردان د مشرانو رواجونو ته ژمن ندي او په ناوینځلو لاسونو ډوډۍ خوري؟  ^۶ نو هغوی ته يې په ځواب کې وفرمایل: اشعیا نبي ستاسو منافقانو په هکله څومره سمه پېش بینی کړی، لکه څرنګه چې لیکل شوي دي: داخلک تش په خُله زما درناوی کوي، خو زړونه یې زما څخه لرې دي  ^۷ نو بې‌ځایه زماعبادت کوي، ځکه دفرائضوپرځای د انسانې رواجونو تعلیم ورکوي.  ^۸ تاسو د خدای حکم پریښې او د انساني رواجونو تقلید کوئ.  ^۹ نو هغوی ته یې وفرمایل: تاسو د خدای احکام په چالاکۍ سره یو خوا ته کوئ، ترڅو خپل رواجونه ترسره کړئ.  ^۱۰ لکه چې موسی وفرمایل: د خپل مور او پلار احترام وکړئ او هر څوک چې خپل مور یا پلار ته بد رد ووايي، نو باید ووژل شي  ^۱۱ خو تاسو وایاست: که چېرې څوک خپل مور او پلار ته ووايي: هغه څه چې باید تاسو ته یې درکړم، هغه مې خدای ته وقف کړي  ^۱۲ نو له هغې وروسته اجازه نه ورکوئ ترڅو د خپل مور او پلار خدمت وکړي.  ^۱۳ نو د خدای کلام په خپل جوړ کړي رواج سره باطلوئ او داسې نور ډېر کارونه کوئ. 

پلیت شیان

( متی ۱۵: ۱۰ -۲۰ )

^۱۴ نو هغه ډله يې بیا راوبلله او ورته یې وفرمایل: ټول ماته غوږ ونیسئ او ځان پوه کړئ  ^۱۵ داسې هېڅ شی نشته چې له بهر نه د انسان بدن ته داخل شي او هغه پلیت کړي، خو هغه څه چې د انسان له دننه څخه راوځي، هغه انسان پلیتوي.  ^۱۶ هرڅوک چې اورېدونکي غوږونه لري نو وادې وري  ^۱۷ کله چې عیسی له دې ډلې څخه بېل شو او کور ته ننوت، نو شاګردانو یې ترې د دې مثال په هکله پوښتنه وکړه.  ^۱۸ هغۀ هغوی ته وفرمایل: تاسو هم دغه شان ناپوهه یاست او نه پوهېږئ چې کوم شی له بهر نه په انسان کې ننوځي نو له هغې سره نه پلیتېږي.  ^۱۹ ځکه چې د هغۀ زړه ته نه ننوځي، بلکې خېټې ته یې ځي او بیا له هغۀ څخه بهر وځي او په دې توګه هغۀ ټولو خوراکونو ته پاک وویل  ^۲۰ او ویې فرمایل: هغه څه چې د انسان له څخه راووځي هغه انسان پلیتوي  ^۲۱ هغه دادې چې د انسان له زړه څخه راووځي بد خیالونه، حرام کارونه، غلا، وژنه، زنا  ^۲۲ حرص، بدي، ټګي، فحاشي، کینه، غیبت، غرور، کبر اوحماقت.  ^۲۳ دغه ټول شیان له دننه څخه راوځي او انسان پلیتوي. 

له یوې انجلۍ څخه د پېریانو ویستل

( متی ۱۵ : ۲۱ - ۲۸ )

^۲۴ بیا له هغه ځایه روان شو، د صور او صیدون سیمې ته لاړ او یو کور ته ننوت، هغۀ غوښتل چې هېڅوک ترې خبر نه شي، خو پټ پاتې نه شو  ^۲۵ ځکه یوه ښځه چې لور يې پېریان لرل، کله چې د هغۀ له راتګ څخه خبره شوه، نو راغله او د هغۀ په پښو یې ځان وغورځاوه.  ^۲۶ هغه ښځه یونانۍ او د سوریې د فنیقیې اوسېدونکې وه اوهغۀ ته یي زاري وکړې ترڅو له لورڅخه یې پېریان وشړي.  ^۲۷ نوعیسی هغې ته وفرمایل: پرېږده چې لومړی بچي ماړه شي او دا مناسبه نه ده چې د بچو ډوډۍ واخیستل شي او سپوته واچول شي.  ^۲۸ هغې ښځې په ځواب کې وفرمایل: ای مالکه! سمه ده، خو د کور سپي هم د بچو د خوراک پاتې شوي خوري.  ^۲۹ نو هغې ته یې وفرمایل: ستا د دې خبرې پخاطر، زه لاړه شه، پېری ستا د لور نه وتلی دی  ^۳۰ او کله چې کور ته لاړه، نو ویې لیدل چې پېری د هغې د لور نه وتلی ؤ او انجلۍ په خپله بستره کې آرام کاوه. 

د عیسی له مُعجزو څخه د خلکو حېرانتیا

^۳۱ بیا هغه د صور له سیمی څخه روان شو او د صیدون له لارې د دیکاپولوس په حدودو تېر شو او د ګلیل بحیرې ته ورسېد.  ^۳۲ نو هلته یې هغۀ ته یوکوڼ راوست چې ژبه یې هم بندېدله او غوښتنه یې ترې وکړه چې پرهغۀ لاس کېږدي.  ^۳۳ نو هغه یې د ډلې له منځ څخه یوې ګوښې ته ویوړ، خپلې ګوتې یې د هغۀ په غوږونو کي کېښودې، لاړې یې ورتو کړې او د هغۀ ژبه یې لمس کړه.  ^۳۴ د آسمان لور ته یې وکتل، اسویلی یې وویست اوهغۀ ته یې وفرمایل: افتح، یانې پرانیستل شه.  ^۳۵ نوهماغه شېبه دهغۀ غوږونه خلاص او د ژبی غوټه یې پرانیستل شوه او په سم ډول یې خبرې وکړې.  ^۳۶ او هغوی ته یې په کلکه وفرمایل چې په دې هکله هېچاته څه ونه وایئ، خو څومره ډېر چې هغۀ تاکید کاوه، هغوی له هغې څخه زیات دا خبره خپروله.  ^۳۷ هغوی ډېر زیات حېران وو او ویل یې: ټول کارونه یې ښه کړي دي، کڼو ته غوږونه، او ګونګیانو ته ژبې ورکوي.