د خالی ورځې په هکله پوښتنه

( مرقس ۲: ۲۳-۲۸، لوقا ۶: ۱-۵)

^۱ په هغه وخت کې عیسی د خالي په ورځ دغنمو له پټوڅخه تېرېده، د هغۀ شاګردان چې اوږي شوي وو، نو د وږو په شکولو او خوړلو يې پېل وکړ  ^۲ کله چې فریسيانو دا ولیدل نوهغۀ ته یې وویل: وګوره! ستا شاګردان داسې کار کوي چې د خالي په ورځ د هغې کول ناروا دي  ^۳ نو هغوی ته يې وفرمایل: آیا تاسو لوستلي ندي چې کله داؤد او د هغۀ ملګري اوږي وو نو څه يې وکړل؟  ^۴ هغه څنګه د خدای کور ته ننوت او د نذر ډوډۍ یې وخوړه، چې دهغې خوړل له مذهبي مشرانو پرته، هغۀ او د هغۀ ملګرو ته روا نه وه  ^۵ آیا تاسو په تورات کې لوستي ندي چې مذهبي مشران په سپېڅلي کور کې د خالي په ورځو کې د خالي د ورځې درنښت نکوي، خو بیا هم بیګناه شمېرل کېږي  ^۶ خو تاسوته وایم چې دلته څه نور هم شته کوم چې د سپېڅلي کور نه هم لوی دی  ^۷ او که چېرې تاسو د دې آیت په مانا پوهېدلای چې: زه رحم غواړم نه قرباني نو تاسو به هم بېګناه خلک نه ملامتول  ^۸ ځکه چې د انسان زوی د خالي د ورځې مالک هم دی. 

د وچ لاسي سړي روغتیا

( مرقس ۳: ۱-۶، لوقا ۶: ۶-۱۱)

^۹ نوله هغې ځای څخه لاړ او د هغوی کنیسې ته ورننوت  ^۱۰ هلته يې یو سړی ولید چې لاس يې وچ شوی ؤ، نو له عیسی څخه يې پوښتنه وکړه: آیا د خالي په ورځ روغتیا ورکول روا دي که نه؟ هغوی پدې لټه کې وو، ترڅو د هغۀ د تورنولو لپاره دلیل پېدا کړي  ^۱۱ نو هغۀ ورته وفرمایل: آیا ستاسوڅخه داسې څوک شته چې یوه مېږه ولري او هغه د خالي په ورځ په کنده کې ولوېږي او هغه دې یې راونباسي؟  ^۱۲ نو انسان له مېږې څخه څومره ډېر غوره دی، نو لدې کبله د خالي په ورځو کې نېکي کول روا دي  ^۱۳ بیا يې هغه سړي ته وفرمایل: لاس دې را اوږد کړه، هغۀ لاس ور اوږد کړ او هغه وچ لاس یې د بل لاس په څېرروغ شو ^۱۴ خو فریسیان بهرلاړل او غونډه یې وکړه چې څه ډول هغه ووژني  ^۱۵ او کله چې عیسی د هغوی په پلان پوه شو نو له هغې ځای څخه روان شو او یوه لویه ډله د هغۀ پسې ور روانه وه، نوهغو ټولو ته يې روغتیا ورکړه  ^۱۶ او هغوی ته يې په کلکه وفرمایل چې هغۀ ته شهرت ورنکړي  ^۱۷ ترڅو هغه وېنا پوره شي کومه چې د اشعیا نبي په ژبه ویل شوې وه:  ^۱۸ دا دی زما هغه خادم کوم چې ما غوره کړی دی، زما محبوب چې روح مې ترې خوشاله دی، زه به پرهغۀ د خپل روح سیوری وکړم، ترڅو غېر یهودو ته انصاف اعلان کړي  ^۱۹ شخړه او شور به ونکړي او هېڅوک به په کوڅو کې د هغۀ غږ وانوري  ^۲۰ رالوېدلې دُرمه به ماته نکړي او نیمه سوې پلته به غلې نکړي ترڅو انصاف بریالی کړي  ^۲۱ او قامونه به د هغۀ د نوم پورې هېلې وتړي. 

د مذهبي مشرانو تور

( مرقس ۳: ۲۰-۳۰، لوقا ۱۱: ۱۴-۲۳)

^۲۲ او بیا خلکو یو پېریانی چې ړوند او ګونګ ؤ هغۀ ته راوست، نو هغۀ ته يې روغتیا ورکړه او هغه ړوند او ګونګ بینا او ویاند شو  ^۲۳ هغه ټوله ډله حېرانه شوه او ويې ویل: آیا دا سړی د داؤد زوی ندی؟  ^۲۴ خو کله چې فریسیانو دا هرڅه واورېدل نو ويې ویل: دا سړی د پېریانو د مشر بعلزبول په مرسته پېریان وباسي  ^۲۵ او کله چې عیسی د هغوی په خیالاتو پوه شو نو ورته يې وفرمایل: هره پاچاهي چې پرخپل ضد وویشل شي لمنځه ځي او په هر کور کې چې کورګوټي جوړ شي هغه را نسکورېږي  ^۲۶ نو که چېرې شېطان، شېطان وباسي خامخا په خپل ځان کې وېشل کېږي، نو د هغۀ پاچاهي به څنګه پاتې شي؟  ^۲۷ او که چېرې زه د بعلزبول په مرسته پېریان وباسم، نو بیا ستاسو زامن د چا پواسطه پېریان راوباسي؟ لدې امله به هغوی ستاسو قضاوت کوونکي واوسي  ^۲۸ خو که چېرې زه د خدای د روح پواسطه پېریان وباسم، نو په یقین سره د خدای پاچاهي پرتاسو راغلې ده  ^۲۹ او څرنګه څوک کولای شي چې د یو زورور سړي کورته ننوځي او د هغۀ اسباب لوټ کړي، خو دا چې لومړی هغه زورور وتړي او بیا دهغۀ کور لوټ کړي  ^۳۰ هرڅوک چې ماسره ندی، هغه زما پرخلاف دی او څوک چې زما سره راټول نشي نو شیندل کېږي  ^۳۱ نو لدې کبله تاسو ته وایم چې، د انسان هر ډول کُفر او ګناه بخښل کېږي، خو د سپېڅلي روح پرخلاف کُفر به ونه بخښل شي  ^۳۲ او هرڅوک چې د انسان د زوی پرخلاف خبرې وکړي، وبه بخښل شي، خوڅوک چې د سپېڅلي روح پرخلاف خبرې وکړي، هغه به ونه بخښل شي، نه پدې دنیا او نه په راتلونکې دنیا کې. 

ونه او د هغې مېوه

( لوقا ۶: ۴۳ – ۴۵ )

^۳۳ ښه ونه وکرئ نو د هغې مېوه به هم ښه وي او که چېرې بده ونه وکرئ نو د هغې مېوه به هم بده وي، ځکه چې ونه د هغې له مېوې څخه پېژندل کېږي.  ^۳۴ ای د مار بچو! څنګه کولای شئ چې ښه خبره وکړئ پداسې حال کې چې بد یاست، ځکه چې ژبه له ډک زړه څخه خبرې کوي  ^۳۵ ښه سړی د خپل زړه له ښې خزانې څخه ښه شیان راوباسي او بد سړی د خپل زړه له بدې خزانې څخه بد شیان راوباسي  ^۳۶ خو تاسو ته وایم: هره غلطه خبره چې خلک يې کوي، د قیامت په ورځ به د هغې حساب ورکوي  ^۳۷ ځکه چې تاسو به د خپلو خبرو له امله یا برأت واخلئ او یا به د خپلو خبرو له امله ملامته کړای شئ. 

دمُعجزې غوښتنه

( مرقس ۸: ۱۱-۱۲، لوقا ۱۱: ۲۹ - ۳۲ )

^۳۸ بیا ځینو د شریعت عالمانو او فریسیانو هغۀ ته په ځواب کې وویل: ای استاذه! موږ غواړو چې لتا څخه مُعجزه ووینو  ^۳۹ نو هغۀ ورته په ځواب کې وفرمایل: بدکار او زناکار نسل مُعجزه غواړي خو هغوی ته به د یونس نبي له مُعجزې پرته بله ورنکړل شي  ^۴۰ لکه څرنګه چې یونس درې شپې او ورځې د کب په ګېډه کې پاتې شو، نو په همدې ډول به د انسان زوی هم درې شپې او ورځې د مځکې په ګېده کې تېرې کړي  ^۴۱ د نینوا خلک به د قیامت په ورځ لدې طایفې سره راپورته شي او هغوی به ملامته کړي، ځکه هغوی د یونس د موعظې له کبله توبه وویستله، خو څوک چې دلته دی هغه له یونس څخه هم لوی دی  ^۴۲ د قیامت په ورځ به د سویل ملکه، لدې طایفې سره راپورته شي او دوی به ملامته کړي، ځکه هغه د مځکې له آخري برخې څخه راغله ترڅو د سلیمان حکمت واوري، خو دلته چې څوک دی هغه تر سلیمانه ډېر لوی دی. 

د پېریانو بېرته راتلل

( لوقا ۱۱: ۲۴ - ۲۶ )

^۴۳ او کله چې پېری له یو سړي څخه ووځي نو د آرام لپاره په بې‌اوبو دښتو کې ګرځي او کله چې د آرام ځای ونه مومي  ^۴۴ نو وايي: له کوم کور څخه چې راغلی وم، بېرته ورستنېږم او کله چې راشي او خپل کور پاک او جارو شوی وویني  ^۴۵ نو بیا ځي او له ځانه سره نور اووه سخت پلیت پېریان راولي، په هغه کې ننوځي او هلته مېشت کېږي او د هغه سړي پایلې له پېل څخه هم خرابې شي، نو په همدې ډول به لدې بدکار نسل سره هم وشي. 

عیسی خپله اصلي کورنۍ راپېژني

( مرقس ۳: ۳۱-۳۵، لوقا ۸: ۱۹-۲۱)

^۴۶ هغۀ لا د هغې ډلې سره خبرې کولې چې مور او وروڼه یې راښکاره شول او له هغۀ سره د خبرو کولو په موخه بهر ولاړ وو  ^۴۷ نو یو تن هغۀ ته وویل: ستا مور او وروڼه بهر ولاړ دي او غواړي چې لتا سره خبرې وکړي  ^۴۸ نو خبرې کوونکي ته يې په ځواب کې وفرمایل: زما مور څوک ده؟ او زما وروڼه څوک دي؟  ^۴۹ خپل لاس يې د شاګردانو لور ته اوږد کړ او ويې فرمایل: دوی زما مور او وروڼه دي  ^۵۰ ځکه هرڅوک چې زما د آسماني پلار رضا ترسره کړي، نو هماغه زما ورور، خور او مور ده.