د تعمید ورکوونکي یحیی وژل کېدل

( مرقس ۶: ۱۴-۲۹، لوقا ۹: ۷-۹)

^۱ په همغو ورځوکې کله چې هیرودیس تېتراخ دعیسی له شهرته خبرشو  ^۲ نوخپلوخادمانوته یې وویل: همدغه تعمید ورکوونکی یحیی دی چې له مړوڅخه راپورته شوی، نو لدې کبله مُعجزې ښکاره کوي  ^۳ ځکه چې هیرودیس د خپل ورور فیلیپوس د ښځې هیرودیا په خاطر یحیی نیولی ؤ، هغه یې بندي کړی او په زندان کې یې ساتلی ؤ  ^۴ ځکه یحیی هغۀ ته ویلي وو چې ‌‌‌‌دهغې ساتل ستا لپاره حرامه ده  ^۵ او کله یې چې دهغۀ د وژلونیت وکړ نو له خلکو څخه ووېرېد، ځکه خلکوهغه نبي ګڼلو  ^۶ خوکله يې چې د هیرودیس د زوکړې ورځ لمانځله نو د هیرودیا لور په محفل کې داسې ونڅېدله چې هیرودیس يې خوشاله کړ  ^۷ نو لدې کبله هغۀ قسم یاد کړ او ژمنه يې وکړه چې هرڅه وغواړي نو هغې ته به يې ورکړي  ^۸ نوهغې د خپلې مور په لمسون وویل چې باید همدا شېبه دې د تعمید ورکوونکي یحیی سر په یوه لوښي کې ما ته راکړل شي  ^۹ پاچا اندېښمن شو خو د خپل قسم او مېلمنو په خاطر يې امر وکړ چې دهغې غوښتنه دې پوره کړی شي  ^۱۰ هغۀ خپل کسان ولېږل او په زندان کې د یحیی سر له تنې څخه بېل کړ  ^۱۱ د هغۀ سر يې په لوښي کې کېښود، هغې ته یې وسپاره او هغې خپلې مور ته وېوړ  ^۱۲ د هغۀ شاګردان راغلل، د هغۀ مړی يې راپورته کړ او ښخ يې کړ، بیا لاړل اوعیسی يې خبرکړ. 

پنځه زره کسانو ته خوراک ورکول

( مرقس ۶: ۳۰ - ۴۴ ، لوقا ۹: ۱۰ - ۱۷، یوحنا ۶: ۱ - ۱۴)

^۱۳ او کله چې عیسی دا واورېدل نو په کشتۍ کې سپور شو او له هغې ځایه د بېدیا لور ته لاړ، خو کله چې خلک خبر شول، نو له ښارونو څخه د وچې له لارې پیاده د هغۀ پسې ورغلل  ^۱۴ او کله چې هغه غاړې ته راورسېد نو یوه لویه ګڼه یې ولیده، زړه يې پرې وسوځيد او د هغوی ناروغانو ته يې روغتیا ورکړه  ^۱۵ مازدیګر مهال شاګردان یې د هغۀ څنګ ته ورغلل او ورته يې وویل: دا بېدیا ده او ورځ په ختمېدو ده، نو دغه ګڼه رخصت کړه ترڅو کلیو ته لاړ شي او دخپل خوراک لپاره خواړه وپېري  ^۱۶ خو عیسی هغوی ته وفرمایل: د هغوی تللو ته اړتیا نشته، تاسو ورته خواړه ورکړئ  ^۱۷ خو هغوی هغۀ ته وویل: دلته له پنځو ډوډیو او دوه کبانو پرته نور هېڅ هم نلرو  ^۱۸ نو ویې فرمایل: هغه دلته ماته راوړئ  ^۱۹ او هغې ډلې ته يې امر وکړ چې پرواښو کېني، پنځه ډوډۍ او دوه کبان يې راواخیستل، د آسمان لورته يې وکتل، برکت يې ورکړ، ډوډۍ يې ماته کړه، شاګردانو ته يې ورکړه او شاګردانو هغې ډلی ته ورکړه  ^۲۰ ټولو وخوړله، ماړه شول اوله پاتې شویو ټوټو څخه يې دولس ټوکرۍ ډکې پورته کړې  ^۲۱ او ډوډۍ خوړونکي پرښځو او ماشومانو سر بېره نږدې پنځه زره سړي ؤ. 

د اوبو پر مخ ګرځېدل

( مرقس ۶: ۴۵-۵۲، یوحنا ۶: ۱۵-۲۱)

^۲۲ بیا سمدلاسه عیسی خپل شاګردان کشتۍ ته وخېژول ترڅو له هغۀ ترمخه بلې غاړې ته لاړ شي او هغه ډله رخصت کړي  ^۲۳ او کله يې چې خلک ولېږل، نو د عبادت لپاره یواځې د غرۀ سرته وخوت او د شپې مهال هلته یواځې ؤ  ^۲۴ خو دغه مهال کشتۍ له وچې څخه لرې وه په چپو کې را ایساره شوه ځکه چې باد د مخالف لوري نه لګېده  ^۲۵ او د شپې په څلورمه برخه کې عیسی د بحېرې لپاسه د هغوی لورته راروان ؤ  ^۲۶ خو کله چې شاګردانو هغه د بحېرې لپاسه راروان ولید، نو ووېرېدل او چیغې یې کړې چي دا پېری دی  ^۲۷ خو عیسی بې له ځنډه هغوی ته وفرمایل: ډاډه اوسئ، مه وېرېږئ، دا زه یم  ^۲۸ پطروس ځواب ورکړ، مالکه! که چېرې ته يې نو ماته ووایه ترڅو زه هم د اوبو لپاسه درشم  ^۲۹ نو هغۀ ته يې وفرمایل: راشه! نو هماغه شېبه پطروس له کشتۍ څخه راکوز شو او د اوبو لپاسه روان شو، ترڅو د عیسی څنګ ته ورشي  ^۳۰ خو کله يې چې سخت باد ولید نو ووېرېد او کله چې ډوبېده نو چیغې یې کړې مالکه ما وژغوره!  ^۳۱ نو عیسی سمدلاسه لاس وراوږد کړ، هغه يې راونیو او ورته یې فرمایل: ای کم ایمانه! ولې دې شک وکړ؟  ^۳۲ او کله چې په کشتۍ کې کېناستل نو باد کرار شو  ^۳۳ د کشتۍ سپرلۍ راغلې د هغۀ عبادت یې وکړ او ويې ویل: ته واقعاً د خدای زوی یې. 

په ګینسیرت کې روغتیا ورکول

( مرقس ۶: ۵۳-۵۶)

^۳۴ او کله چې هغوی بلې غاړې ته تېرشول او ګینسیرت ته ورسېدل  ^۳۵ نوخلکو هغه وپېژانده نو ټولې سیمې ته يې استازي ولېږل ترڅو ټول ناروغان هغۀ ته راولي  ^۳۶ او له هغۀ څخه يې وغوښتل چې اجازه ورکړي ترڅو د هغۀ د څادر څنډه لمس کړي او چا چې لمس کړه نو هغوی روغ شول.