د مشرانو رواجونه

( مرقس ۷: ۱-۱۳)

^۱ بیا فریسیان او د شرعې عالمان له اورشلیم څخه عیسی ته راغلل او ويې ویل  ^۲ ولې ستا شاګردان د مشرانو رواجونه ماتوي او کله چې ډوډۍ خوري خپل لاسونه نه وینځي؟  ^۳ هغۀ ځواب ورکړ: تاسو ولې د خپلو رواجونو پخاطر د خدای حکم ماتوئ؟  ^۴ ځکه خدای امر کړی چې د خپل مور او پلار احترام وکړئ اوڅوک چې خپل پلار یا مورته ښکنځلې وکړي باید ووژل شي  ^۵ خو تاسو وایاست چې که څوک خپل پلار یا مور ته ووايي: ستاسو هرحق چې زما په غاړه ؤ، لدې وروسته مې هغه خدای ته وقف کړل  ^۶ نو له هغې وروسته اړینه نده چې د خپل پلار یا مور احترام وکړي، نو په خپل رسم و رواج سره مو د خدای حکم باطل کړی دی  ^۷ ای ریاکارانو! اشعیا ستاسو په هکله څومره ښه نبوت کړی او فرمایلي يې دي:  ^۸ دا خلک په خپلو شونډو سره زما ستاینه کوي، خو زړونه يې زماڅخه لرې دي  ^۹ هغوی زما عبادت ضایع کوي، ځکه چې د فرائضو پرځای د انسانانو د احکامو تعلیم ورکوي. 

هغه شیان چې انسان پلیتوي

(مرقس ۷: ۱۴-۲۳)

^۱۰ بیا یې هغه ډله راوبلله او هغوی ته يې وفرمایل: غوږ شئ او ځان پوه کړئ  ^۱۱ هغه څه چې د خُلې له لارې ښکته ځي انسان نه پلیتوي، بلکې هغه څه چې له خُلې څخه راؤځي انسان پلیتوي  ^۱۲ همغه مهال د هغۀ شاګردان راغلل او هغۀ ته یې وویل: آیا پوهېږې، کله چې فریسیانو دا خبره واورېدله، نو خوابدي شول؟  ^۱۳ نوهغۀ په ځواب کې وفرمایل: هرهغه نیالګی چې زما آسماني پلار نه وي کرلی، باید له بېخه وویستل شي  ^۱۴ هغوی پرېږدئ، دا ړانده لارښوونکي دي او کله چې ړوند د ړوند لارښود شي، نو دواړه په کوهي کې لوېږي  ^۱۵ بیا پطروس ورته وویل: دا مثال زموږ لپاره تشریح کړه  ^۱۶ عیسی وفرمایل: آیاتاسو تراوسه هم ناپوهه یاست؟  ^۱۷ آیا تاسو نپوهېږئ چې کوم شی د خُلې له لارې ښکته کېږي، هغه ګېډې ته ځي او بیا بهر غورځول کېږي؟  ^۱۸ خوهغه څه چې په خُله ویل کېږي، هغه له زړه څخه راؤځي او همدغه شیان انسان پلیتوي  ^۱۹ ځکه چې بد فکرونه لکه، قتل، زنا، بد اخلاقۍ، غلا، د دروغو ګواهۍ او تور پورې کول له زړه څخه راؤځي  ^۲۰ همدغه شیان انسان پلیتوي خو په نا وینځلو لاسونو خوراک کول انسان نه پلیتوي. 

د کنعاني ښځې ایمان

( مرقس ۷: ۲۴-۳۰)

^۲۱ بیا عیسی له هغې ځایه راووت او د صور او صیدون سیمې ته لاړ  ^۲۲ ناڅاپه یوه کنعانۍ ښځه له هغه ځایه راووتله او په لوړ غږ يې هغۀ ته وویل: ای مالکه، ای د داؤد زویه! پرما رحم وکړه، ځکه زما لور پېریانو سخته نیولې ده  ^۲۳ خو هغۀ هېڅ ځواب ورنکړ، ترڅو چې شاګردان يې رامخ ته شول او له هغۀ څخه یې غوښتنه وکړه، دا ښځه رخصت کړه، ځکه چې موږ پسې ډېرې چیغې وهي  ^۲۴ هغۀ هغوی ته په ځواب کې وفرمایل: زه یواځې د اسرائیلو د قام د ورکو شویو پسونو لپاره رالېږل شوی یم  ^۲۵ بیا هغه ښځه راغله، د هغۀ عبادت يې وکړ او ويې ویل: ای مالکه! زما مرسته وکړه  ^۲۶ نو هغۀ ورته په ځواب کې وفرمایل: دا مناسبه نده چې د ماشومانو برخه ډوډۍ واخلو او سپيو ته يې واچوو  ^۲۷ ښځې وویل: هوکې مالکه! خوسپي هم د خپلو بادارنو د دسترخوان غورځول شوي توکړې خوري  ^۲۸ نوعیسی هغې ته په ځواب کې وفرمایل: ای ښځې! ستا ایمان ډېر لوی دی، ستا هیله دې پوره شي او هماغه شېبه د هغې لور روغه شوه. 

د عیسی له معجزو څخه د خلکو حېرانتیا

^۲۹ عیسی له هغه ځایه حرکت وکړ او د ګلیل دبحیرې غاړې ته راغی، د غرۀ لپاسه وخوت او هلته کېناست  ^۳۰ نو ډېرخلک هغۀ ته راغلل چې ګڼ شمېر ګوډان، ړانده، شلان او ګونګیان يې له ځانه سره راوستلي وو د هغۀ پښو ته يې کېښودل او هغۀ هغوی ته روغتیا ورکړه.  ^۳۱ او کله چې هغې ډلې خپل ګونګیان ویانده، شلان روغ، ګوډان ګرځېدونکي او ړانده بینا ولیدل، نو ډېر حېران شول او د اسرائیلو د خدای ستاینه یې وکړه. 

څلور زره کسانو ته خوراک ورکول

( مرقس ۸: ۱-۱۰ )

^۳۲ بیا عیسی خپل شاګردان راوغوښتل او ورته یې وفرمایل: پدې خلکو مې ډېر زړه وسوځېد، ځکه درې ورځې وشوې چې زموږ سره دي، خو د خوراک لپاره هېڅ هم نلري او زه نه غواړم چې هغوی اوږي ولېږم، ګواکې په لارکې بې‌هوښه شي  ^۳۳ شاګردانو ورته وویل: پدې دښته کې به د دومره لويې ډلې د مړولو لپاره ډوډۍ له کومه راپېدا کړو  ^۳۴ نو عیسی هغوی ته وفرمایل: تاسو څو ډوډۍ لرئ؟ هغوی وویل: اووه ډوډۍ او څو کوچني کبان  ^۳۵ نو خلکوته یې وفرمایل ترڅو پرمځکه کېني  ^۳۶ او هغه اووه ډوډۍ او کبان یې راواخیستل، شکر یې وکړ، ماته یې کړه، خپلو شاګردانو ته یې ورکړه او شاګردانو هغې ګڼې ته ورکړه  ^۳۷ ټولو وخوړله او ماړه شول او له پاتې شوې ډوډۍ څخه یې اووه ټوکرۍ ډکې پورته کړلې  ^۳۸ او د ډوډۍ د خوړونکو شمېره له ښځو او ماشومانو پرته څلور زره کسان وو  ^۳۹ بیا يې هغه ګڼه رخصت کړه، په کشتۍ کې سپور شو او د مجدآ سیمې ته لاړ.