د انګورو د باغ مزدوران

^۱ د آسمان پاچاهي د کور د هغۀ څښتن په څېر ده چې سهار د وخته بهر لاړ، ترڅو دخپل انګورو د باغ لپاره مزدوران ونیسي  ^۲ او کله یې چې له مزدورانو سره د ورځې یو دینار قرارداد وکړ نو هغوی يې د انګورو باغ ته ولېږل  ^۳ نږدی نهه بجې بیا بهرلاړ او ځیني نور يې په بازار کې ولیدل چې اوزګار ولاړ وو  ^۴ هغوی ته يې وویل: تاسو هم د انګورو باغ ته لاړ شئ او څه چې ستاسو حق کېږي تاسو ته يې درکوم  ^۵ نو هغوی لاړل، بیا غرمه مهال او همدغه راز درې بجې لاړ او همدغسې یې وکړل  ^۶ او بیا له لمر لوېدو یو ساعت ترمخه لاړ او څو تنه چې اوزګار ولاړ وو هغوی ته يې وویل: دڅه لپاره دلته ټوله ورځ اوزګار ولاړیاست؟  ^۷ هغوی ورته وویل: نن هېچا موږ د مزدورۍ لپاره ونه نیولو، نو هغوی ته يې وویل: تاسو هم د انګورو باغ ته لاړ شئ  ^۸ او کله چې ماښام شو نو دباغ څښتن خپل ناظر ته وویل: مزدوران راوغواړه او له آخري څخه تر لومړني پورې، د هغوی مزدوري ورکړه  ^۹ نو څوک چې له لمر پریواته څخه یوساعت مخکې راغلي وو راغلل او هرتن یو دینار واخیست  ^۱۰ او څوک چې لومړي راغلي وو او ګمان یې کاوه چې ډېرې به واخلي، خو هغوی هم یو دینار واخیست  ^۱۱ او کله يې چې پیسې واخیستې نو د باغ څښتن ته يې شکایت وکړ ^۱۲ ويې ویل: دغو وروستنیو تش یوساعت کار وکړ او موږ سره چې سختي او ګرمي مو تېره کړې یوشان شول  ^۱۳ نو له هغوی څخه یو تن ته یې وویل: ملګریه! لتا سره خو مې زیاتی ندی کړی، آیا په یوه دینار دې ماسره فېصله نه وه کړی؟  ^۱۴ خپل حق واخُله او لاړ شه، زه غواړم چې دې وروستي ته هم ستاپشان ورکړم  ^۱۵ آیا زه نشم کولای چې په خپل مال کې څه وغواړم هغه وکړم؟ آیا ته زما سخاوت ته په بد نظر ګورې؟  ^۱۶ نو لدې کبله به لومړي وروستي او وروستي به لومړي شي. 

د خپلې مړینې په هکله د عیسی دریمه پېش بینې

( مرقس ۱۰: ۳۲-۳۴، لوقا ۱۸: ۳۱-۳۴ )

^۱۷ او کله چې عیسی د اورشلیم لورته تلو نو دولس شاګردان يې ګوښه کړل او ورته يې وفرمایل:  ^۱۸ دادی اورشلیم ته ځو. او هلته به د انسان زوی لویومذهبي مشرانواو دشرعی عالمانو ته وسپارل شي. هغوی به هغه په مرګ محکوم کړي.  ^۱۹ هغه به غېر یهودو ته وسپارل شی، ترڅو دهغۀ سپکاوی وکړي، په قمچېنو يې ووهي، په صلیب يې وخېژوي او په دریمه ورځ به ژوندی راپورته شي. 

د یو مور غوښتنه

( مرقس ۱۰: ۳۵-۴۵)

^۲۰ بیا د زبدي د زامنو مور له خپلو زامنو سره هغۀ ته ورغله، په ګونډو شوه او له هغۀ څخه يې غوښتنه وکړه  ^۲۱ نو هغې ته يې وفرمایل: ته څه غواړې؟ هغې وویل: مهرباني وکړه ترڅو زما دا دوه زامن، ستا په پاچاهۍ کې یوستا ښي او بل کېڼ لاس ته کېني  ^۲۲ عیسی ځواب ورکړ: تاسو نپوهېږئ چې څه غواړئ، آیا کولای شئ له هغه جام څخه چې زه یې څښم تاسوهم وڅښئ؟ هغۀ ته يې وویل، هو کولای شو  ^۲۳ نو هغوی ته يې وفرمایل: سمه ده، تاسو به زما له جام څخه وڅښئ خو زما ښي او کېڼ لاس ته کېنول زما انتخاب ندی، بلکې دا د هغوخلکو لپاره دی چې زما پلار ورته داځای له وړاندې نه ټاکلی دی  ^۲۴ او کله چې هغو نورو لسو دا واورېدل، نو له هغو دوو وروڼو څخه سخت خوابدي شول  ^۲۵ خو عیسی هغوی را وغوښتل او ورته یې وفرمایل: تاسو پوهېږئ چې غېر یهودي چارواکي ولسونه ترخپل لاس لاندې ساتي او لویان یې هغوی ته خپل زور ښایی  ^۲۶ خو ستاسو په منځ کې باید داسې نه وي، بلکې هرڅوک چې غواړي ستاسو په منځ کې مشرشي، هغه دې ستاسو خادم وي  ^۲۷ او څوک چې غواړي ستاسو په منځ کې مخکې شي نو هغه باید ستاسو غلام وي  ^۲۸ لکه څرنګه چې د انسان زوی ددې لپاره ندی راغلی چې دهغۀ خدمت وکړای شي، بلکې ددې لپاره راغلی ترڅو خدمت وکړي او خپل ځان د ډېرو د خلاصون لپاره فدیه کړي. 

د دوو ړندو سوالګرو بینا کول

( مرقس ۱۰ : ۴۶-۵۲، لوقا ۱۸: ۳۵-۴۳)

^۲۹ او کله چې له اریحا څخه بهر تلل، نو یوه لویه ډله د هغوی پسې روانه وه  ^۳۰ هلته د لارې په غاړه دوه ړانده ناست وو او کله يې چې واورېدل، عیسی لدې لارې څخه تېرېږي، نوچیغې یې کړې چې، مالکه، ای د داؤد زویه پرموږ رحم وکړه!  ^۳۱ خو هرڅومره چې خلکو هغوی ستغل ترڅو غلي شي، هغوی لا زیاتې چیغې وهلې چې مالکه، ای د داؤد زویه! پرموږ رحم وکړه  ^۳۲ نو عیسی ودرېد هغوی یې راوبلل او ورته يې وفرمایل: څه غواړئ چې ستاسو لپاره يې وکړم؟  ^۳۳ هغۀ ته يې وویل: مالکه! غواړو چې زموږ سترګې بینا شي  ^۳۴ نو عیسی پرهغوی رحم وکړ او د هغوی سترګې يې لمس کړې هماغه شېبه هغوی بینا شول او د هغۀ پسې روان شول.