د واده د میلمستیا مثال

( لوقا ۱۴: ۱۵-۲۴ )

^۱ عیسی بیا هم هغوی ته بل مثال راوړ او ویې فرمایل:  ^۲ د آسمان پاچاهي د هغه پاچا په څېر ده چې د خپل زوی د واده ډوډۍ يې تیاره کړه  ^۳ او خپل خادمان یې ولېږل ترڅو رابلل شوي د واده ډوډۍ ته راولي، خو هغوی رانغلل  ^۴ بیا یې نور خادمان ولېږل او ورته يې وویل: رابلل شوو ته ووایئ چې خپل دسترخوان مې تیار کړی، خپل غوایان اوچاغ خوسکي مې حلال کړي او هرڅه تیار دي، نو د واده ډوډۍ ته راشئ  ^۵ خو هغوی بې پروايي وکړه خپله لار يې ونیوله او لاړل، یوخپل پټي ته او بل خپل تجارت ته  ^۶ او نورو دهغۀ خادمان راونیول، شکنځلې یې ورته وکړې او ويې وژل  ^۷ پاچا غصه شو، خپل لښکريې ورولېږه، هغه قاتلان یې ووژل او دهغوی ښاريې وسوزاوه  ^۸ بیا یې خپلوخادمانوته وویل: واده تیار دی، خو رابلل شویو د هغې وړتیا نه درلوده  ^۹ اوس نو لویو لارو ته لاړ شئ او هرڅوک چې پېدا کړئ واده ته يې راوبلئ  ^۱۰ بيا خادمان لویو لارو ته ووتل، ښه او بد هرڅوک يې چې وموندل را ټول يې کړل، تر دې چې د واده کور له میلمنو څخه ډک شو  ^۱۱ خو کله چې پاچا د میلمنو د لیدلو لپاره راننوت، نو یو تن يي ولید چې د واده جامې یې نه وې اغوستې  ^۱۲ نو هغۀ ته یې وویل: ای دوسته ته څنګه دلته راغلی يې او ولې دې د واده جامې ندي اغوستې؟ نوهغه غلی شو  ^۱۳ هماغه وخت پاچا خپلو خادمانو ته وویل: دا سړی لاس تړلی او پښې تړلی پورته کړئ، او بهر په تیاره کې یې وغورزوئ، چېرې چې ژړا او د غاښونو چیچل وي  ^۱۴ ځکه رابلل شوي ډېر دي، خو غوره شوي لږ دي. 

د مالیې په هکله پوښتنه

( مرقس ۱۲ : ۱۳-۱۷، لوقا ۲۰ : ۲۰-۲۶ )

^۱۵ بیا فریسیان لاړل او پلان يې جوړ کړ چې څنګه هغه په خپلو خبرو کې راونیسي  ^۱۶ هغوی خپل شاګردان له هېرودیانو سره هغۀ ته ورولېږل او وویل: استاذه! موږ پوهېږو چې ته رېښتینی یې، په رېښتیا سره د خدای د لارې تعلیم ورکوې او دچا پروا نه لرې، ځکه چې دخلکو ظاهر ته نه ګورې  ^۱۷ نو موږ ته ووایه چې ستا څه نظر دی، آیا موږ د روم قیصر ته په مالیې ورکولو مکلف یو که نه؟  ^۱۸ خو عیسی د هغوی بده اراده درک کړه او ويې فرمایل: ای ریاکارانو! ولی زما آزمېښت کوئ؟  ^۱۹ د مالیې سېکه ماته وښایاست نو هغوی ورته یودینار راوړ  ^۲۰ نوعیسی هغوی ته وفرمایل: دا انځور او نوم دچا دی؟  ^۲۱ هغوی ځواب ورکړ: د قیصر، نو هغوی ته يې وفرمایل: د قیصر مال قیصرته او دخدای مال خدای ته ورکړئ  ^۲۲ او کله چې هغوی دا واورېدل نو حېران شول، هغه یې پرېښود او ترې لاړل. 

د قیامت په هکله پوښتنه

( مرقس ۱۲ : ۱۸-۲۷، لوقا ۲۰ : ۲۷-۴۰ )

^۲۳ او په هماغه ورځ صدوقیان چې له قیامت څخه منکر وو، هغۀ ته راغلل او پوښتنه يې وکړه چې  ^۲۴ ای استاذه! موسی ویلي، که چېرې څوک بې‌اولاده مړ شي نو باید ورور يې د هغۀ له ښځې سره واده وکړي ترڅو دځان لپاره نسل پېدا کړي  ^۲۵ یو وخت زموږ په منځ کې اووه وروڼه اوسېدل، لومړي ښځه وکړه او مړ شو او لکه څرنګه چې اولاد يې نه درلود، نو ښځه يې ورور ته پاتې شوه  ^۲۶ په همدې ډول تر دویم، دریم، تر اووم  ^۲۷ او په پای کې هغه ښځه هم مړه شوه  ^۲۸ نو په قیامت کې به له هغو اوو څخه د چا ښځه وي، ځکه ټولو له هغې سره واده کړی ؤ؟  ^۲۹ عیسی هغوی ته ځواب ورکړ: تاسو ګمراه یاستئ، ځکه چې تاسو نه په کلام پوهېږئ او نه د خدای په ځواک  ^۳۰ ځکه د قیامت په ورځ به ښځې او سړي یو له بل سره ودونه نه کوي، هغوی به د آسمان د فرښتو په څېر وي  ^۳۱ خو د مړو د راژوندي کېدلو په هکله مو د خدای کلام ندی لوستی چې خدای په خپله تاسوته فرمایلي دي،  ^۳۲ زه د ابراهیم خدای، د اسحاق خدای او د یعقوب خدای یم، خدای د مړو خدای نه بلکې د ژوندو خدای دی  ^۳۳ او کله چې هغې ډلې دا هرڅه واورېدل، نو د هغۀ له تعلیم څخه حېران شول. 

تر ټولو لوی حکم

( مرقس ۱۲ : ۲۸-۳۴، لوقا ۱۰ : ۲۵-۲۸ )

^۳۴ او کله چې فریسیانو واورېدل چې عیسی صدوقیان قانع کړي دي، نو سره را ټول شول  ^۳۵ او له هغوی څخه یو تن چې عالم ؤ، د آزمېښت په موخه یې له هغۀ څخه پوښتنه وکړه چې  ^۳۶ ای استاذه! په شریعت کې ترټولو لوی حکم کوم یو دی؟  ^۳۷ عیسی هغۀ ته وفرمایل: دا چې دخپل مالک خدای سره په ټول زړه، په ټول ځان او ټول فکرسره مینه وکړې  ^۳۸ دا تر ټولو لومړی او لوی حکم دی  ^۳۹ او دویم حکم همدی ته ورته دی، یانې له خپل ګاونډي سره د خپل ځان پشان مینه وکړه  ^۴۰ او په همدې دوو حکمونو باندې شریعت او د انبیاو ټولې صحیفې ولاړې دي. 

مسیح د چا زوی دی

( مرقس ۱۲: ۳۵-۳۷، لوقا ۲۰ : ۴۱-۴۴ )

^۴۱ بیا کله چې فریسیان سره یوځای راټول شوي وو نو عیسی له هغوی څخه پوښتنه وکړه چې،  ^۴۲ د مسیح په هکله څه فکر کوئ؟ هغه د چا زوی دی؟ هغوی ورته وویل: د داؤد زوی دی  ^۴۳ نو هغوی ته يې وفرمایل: نو بیا ولی داؤد هغۀ ته په روح کې مالک وايي؟  ^۴۴ لکه څرنګه چې وايي: مالک خدای زمامالک ته وفرمایل: زماښي لاس ته کېنه ترڅوستا دښمنان ستا دپښولاندې کړم  ^۴۵ نوکله چې داؤد هغه مالک ګڼي، څنګه به د هغۀ زوی وي؟  ^۴۶ او هېچا دهغۀ په ځواب کې څه ونه شو ویلي او له هغې ورځې وروسته هېچا جرأت ونکړ چې له هغۀ څخه پوښتنه وکړي.